పాకిస్తాన్ ఎన్ని అబద్ధాలు చెప్పినా.. ఆపరేషన్ సింధూర్ నిజం తేల్చేది ఈ టీమే!

భారత్ చేపట్టిన ఆపరేషన్ సింధూర్ తర్వాత పాకిస్తాన్ నిరంతరం దుష్ప్రచారం చేస్తోంది. ఉగ్రవాద స్థావరాలపై చేసిన సర్జికల్ దాడులు, క్షిపణి దాడుల గురించి పాకిస్తాన్ మరణాలు, నష్టానికి సంబంధించిన గణాంకాలను వక్రీకరిస్తోంది. అయితే ఇప్పుడు ఈ అబద్ధాలకు అడ్డుకట్ట వేయడానికి ఐక్యరాజ్యసమితికి సంబంధించిన బృందం రంగంలోకి దిగింది. ఈ బృందం ప్రతి దాడిని విచారిస్తోంది, అంతర్జాతీయ స్థాయిలో ఆపరేషన్ సింధూర్ సత్యాన్ని ప్రపంచానికి తెలియజేసేందుకు పనిచేస్తుంది.

భారతదేశం లక్ష్యంగా చేసుకున్న పాకిస్తాన్ ఆక్రమిత కాశ్మీర్ (PoK)లోని ప్రాంతాలలో ఐక్యరాజ్యసమితి యునైటెడ్ నేషన్స్ మిలిటరీ అబ్జర్వర్ గ్రూప్ ఇన్ ఇండియా అండ్ పాకిస్తాన్ (UNMOGIP) బృందం చేరుకుని నష్టం అంచనాను మొదలు పెట్టింది. ఈ బృందం ప్రకారం.. రాజధాని ముజఫరాబాద్‌లోని బిలాల్ మసీదుపై దాడి జరిగింది. అక్కడ ఒక వ్యక్తి మరణించినట్లు తెలుస్తోంది. స్థానిక అధికారి ముదస్సర్ ఫారూక్ మాట్లాడుతూ.. మసీదుతో పాటు అనేక భవనాలు దెబ్బతిన్నాయని, అయితే పాకిస్తాన్ చెబుతున్న విధ్వంసానికి ఎటువంటి ఆధారాలు లభించలేదని తెలిపారు.

ఐక్యరాజ్య సమితి బృందం ఉనికి చాలా ముఖ్యమైనదిగా చెబుతున్నారు. ఎందుకంటే ఇది 1949 నుండి భారతదేశం, పాకిస్తాన్ మధ్య కాల్పుల విరమణను పర్యవేక్షిస్తోంది. ఫిబ్రవరి 2025 నాటికి ఈ మిషన్‌లో క్రొయేషియా, ఫిలిప్పీన్స్, దక్షిణ కొరియాకు చెందిన సైనిక పరిశీలకులు, పోలీసులు, నిపుణులతో సహా 106 మంది సభ్యులు ఉన్నారు. భారతదేశం చేపట్టిన ఆపరేషన్ తర్వాత ఐక్యరాజ్య సమితి పర్యవేక్షణ బృందం నేరుగా పీవోకికి చేరుకుని దాడులపై విచారణ చేయడం ఇదే మొదటిసారి.

ఆపరేషన్ సింధూర్ కేవలం ఉగ్రవాద స్థావరాలను నిర్మూలించే లక్ష్యంతో మాత్రమే నిర్వహించినట్లు భారత్ స్పష్టం చేసింది. అయితే పాకిస్తాన్ దీనిని సాధారణ పౌరులపై దాడిగా చిత్రీకరించి అంతర్జాతీయ వేదికపై సానుభూతి పొందడానికి ప్రయత్నించింది. ఇలాంటి పరిస్థితుల్లో ఐక్యారాజ్య సమితి నివేదిక పాకిస్తాన్ ఈ అబద్ధాన్ని బట్టబయలు చేస్తుంది. అవసరమైతే తాము స్వయంగా ఉపగ్రహ, రాడార్ డేటా ద్వారా తమ చర్యలకు సంబంధించిన సాక్ష్యాలను అందిస్తామని భారత్ ఇప్పటికే సూచనలు ఇచ్చింది.

ఏది ఏమైనప్పటికీ, ఐక్యరాజ్యసమితి ఈ చర్య ఆపరేషన్ సింధూర్ కేవలం భారతదేశం సైనిక చర్యకు మాత్రమే పరిమితం కాదని, ఇది ఒక దౌత్యపరమైన సమాధానం కూడా అని తెలియజేస్తుంది. పాకిస్తాన్ ఎంత ప్రయత్నించినా, ఇకపై ప్రతి అబద్ధానికి వాస్తవాలతో సమాధానం లభిస్తుంది. ఆ సత్యాన్ని ప్రపంచం ముందు ఉంచడానికి ఒక సాధనంగా మారుతుంది.