ఆపరేషన్ సిందూర్ సక్సెస్... దేశ వ్యాప్తంగా బీజేపీ బిగ్ ప్లాన్!

పహల్గాంలో జరిగిన ఉగ్రదాడి దేశం మొత్తాన్ని ఒక్కసారిగా కుదిపేసిన సంగతి తెలిసిందే. కాశ్మీర్ లోయలో సందడిగా, ఆహ్లాదంగా గడుపుతున్న పర్యాటకులపై భారత ఆర్మీ దుస్తుల్లో వచ్చిన ఉగ్రమూకలు ఒక్కసారిగా కాల్పులు జరిపాయి. ఈ సమయంలో మతం అడిగి మరీ వారిపై విరుచుకుపడటం గమనార్హం. ఈ పాశవిక దాడిలో 26 మంది పర్యాటకులు మృతి చెందారు.

దీంతో... భారతదేశం ప్రతీకార జ్వాలతో రగిలిపోయింది. ఈ క్రమంలో మే 6, 7 మధ్య రాత్రి పాక్, పాక్ ఆక్రమిత కాశ్మీర్ లోని ఉగ్రశిబిరాలే లక్ష్యంగా భారత సైన్యం విరుచుకుపడింది. అర్ధరాత్రి దాటిన తర్వాత 25 నిమిషాల వ్యవధిలో 9 ఉగ్రశిబిరాలను ధ్వంసం చేసి, 100 మంది ఉగ్రమూకలను మట్టుబెట్టింది.

ఈ విషయంలో భారత సైన్యం దాడి కేవలం సరిహద్దు ప్రాంతాలకే పరిమితం కాలేదు. నేరుగా పాక్ లోని కీలక ప్రాంతాలనూ టచ్ చేసింది. పంజాబ్ లోని ఉగ్రస్థావరాలను నేలమట్టం చేసింది! దీంతో.. ఆపరేషన్ సిందూర్ సక్సెస్ అనే మాట వినిపించింది. ఈ నేపథ్యంలో కేంద్రంలోని అధికారం ఎన్డీయే కూటమిలో కీలకమైన బీజేపీ కీలక నిర్ణయం తీసుకుంది.

అవును... తాజాగా కాల్పుల విరమణ ఒప్పందంపై వినిపిస్తున్న భిన్నాభిప్రాయాల సంగతి కాసేపు పక్కనపెడితే... మే 6, 7 తేదీల్లో పాక్, పీవోకే లో 9 ఉగ్ర శిబిరాలను ధ్వంసం చేసే విషయంలో ఆపరేషన్ సిందూర్ ఫుల్ సక్సెస్ అనే మాట యావత్ భారత్ చెప్పిన సంగతి తెలిసిందే! దీంతో.. దేశవ్యాప్తంగా తిరంగా యాత్ర పేరిట క్యాపెయిన్ చేపట్టనుంది బీజేపీ.

ఇందులో భాగంగా... మే 13 నుంచి ఈ యాత్రను ప్రారంభించి, 11 రోజుల పాటు క్యాపెయిన్ చేపట్టి.. ఈ నెల 23న ముగించాలని బీజేపీ నిర్ణయించింది. ఈ క్యాంపెన్ లో ప్రధానంగా ప్రధాని మోడీ నాయకత్వ పటిమ, భారత సాయుధ దళాల పరాక్రమాన్ని ప్రజలకు వివరించేలా కొనసాగాలని ప్లాన్ చేసినట్లు తెలుస్తోంది.

ఈ నేపథ్యంలో ఈ తిరంగా యత్ర నిర్వహణపై చర్చించేందుకు బీజేపీ జాతీయ అధ్యక్షుడు జేపీ నడ్డాతో పాటు కేంద్రమంత్రులు అమిత్ షా, రాజ్ నాథ్ సింగ్, మొదలైన పలువురు అగ్రనేతలు సమావేశమయ్యరు. ఈ యాత్రలో పలువురు కేంద్రమంత్రులు, బీజేపీ నేతలు, కార్యకర్తలు పాల్గొననున్నారు.