స్పేస్ లో నెట్ఫ్లిక్స్..? నాసా సంచలన ప్రకటన!
ఇప్పటివరకు మనం ‘ఇంటర్స్టెల్లార్’ లేదా ‘ది బిగ్ బ్యాంగ్ థియరీ’ వంటి సినిమాలు, సిరీస్ల ద్వారా అంతరిక్షం గురించి తెలుసుకున్నాం.
By: Tupaki Desk | 2 July 2025 10:16 PM IST
సైన్స్ , స్ట్రీమింగ్ ప్రపంచాల మధ్య ఒక ఊహించని భాగస్వామ్యం ఇప్పుడు నిజమైంది. ప్రముఖ OTT ప్లాట్ఫారమ్ నెట్ఫ్లిక్స్, అమెరికా అంతరిక్ష సంస్థ నాసాతో కలిసి చరిత్రలో తొలిసారి ఓ అద్భుత ప్రయోగానికి శ్రీకారం చుట్టింది. ఇకపై అంతరిక్ష ప్రయాణాల ప్రతీ అద్భుత దృశ్యం మీ ఇంటి టీవీల్లో ప్రత్యక్ష ప్రసారంగా చూడవచ్చు!
ఈ సరికొత్త భాగస్వామ్యంతో రాకెట్ ప్రయాణాల లాంచింగ్లు, అంతరిక్షయాత్రికుల స్పేస్వాక్లు, మిషన్ల ప్రత్యక్ష కవరేజీ వంటి కీలక క్షణాలన్నింటినీ నెట్ఫ్లిక్స్ లైవ్ స్ట్రీమ్ చేయనుంది. అంతేకాదు భూమిని అంతరిక్షం నుంచి చూడటం ఎప్పుడూ ఒక కలగా ఉండేది. కానీ ఇప్పుడు మన నీలి గ్రహాన్ని అంతరిక్షం నుంచి ప్రత్యక్షంగా చూసే అవకాశం ఈ కొత్త ప్రాజెక్ట్తో అందుబాటులోకి రానుంది.
ఇప్పటివరకు మనం ‘ఇంటర్స్టెల్లార్’ లేదా ‘ది బిగ్ బ్యాంగ్ థియరీ’ వంటి సినిమాలు, సిరీస్ల ద్వారా అంతరిక్షం గురించి తెలుసుకున్నాం. కానీ ఇప్పుడు అదే నిజంగా జరుగుతుంది. రాకెట్ లాంచింగ్ కౌంట్డౌన్లో వచ్చే ఉత్కంఠ, అంతరిక్షంలో మౌనంగా సాగే స్పేస్వాక్, ఆర్బిట్ నుంచి కాంతివంతంగా కనిపించే సూర్యోదయం.. ఇవన్నీ మనమే ప్రత్యక్షంగా అనుభవించబోతున్నాం.
నాసా ఎల్లప్పుడూ ప్రజలకు ప్రేరణనిచ్చే విధంగా పనిచేసింది. ఇప్పుడు ఈ భాగస్వామ్యంతో కొత్త తరానికి శాస్త్రవేత్తలు, అంతరిక్షయాత్రికులుగా మారేందుకు స్ఫూర్తినివ్వాలన్నది వారి ఆశయం. ఈ ప్రాజెక్ట్ కేవలం వినోదం కోసం కాదు. ఇది చరిత్రలో ఒక మైలురాయిగా నిలిచే ఒక విశేష ఘట్టం.
ఇకపై ప్రేక్షకులు కేవలం చూసేవాళ్ళు కాదు, ఈ అంతరిక్ష ప్రయాణంలో భాగస్వాములవుతున్నారు. నెట్ఫ్లిక్స్, భూమికి అవతల ఉన్న ఆ అద్భుత ప్రపంచాన్ని మీ బెడ్రూంలోకి తెస్తోంది!