శృంగార కోరిక కోసం స్నేహితుడిపై లింగ మార్పిడి: హద్దులు దాటిన దారుణం
యువకుడికి తరచుగా తలనొప్పి వస్తుందని శుభం యాదవ్ అతన్ని ఆసుపత్రులకు తీసుకెళ్లేవాడు. అక్కడ యువకుడి అనుమతి లేకుండానే అతనికి హార్మోన్ థెరపీ చేయించాడు.
By: Tupaki Desk | 4 July 2025 9:15 AM IST
భారతదేశం అభివృద్ధి పథంలో దూసుకుపోతున్నప్పటికీ, కొన్ని సంఘటనలు మానవ సంబంధాల విలువలను ప్రశ్నిస్తున్నాయి. స్నేహం, ప్రేమ వంటి పవిత్ర బంధాలను లైంగిక కోరికల కోసం దుర్వినియోగం చేయడం తీవ్ర ఆందోళన కలిగిస్తోంది. ఇటీవల మధ్యప్రదేశ్లో జరిగిన ఒక దారుణమైన సంఘటన దేశవ్యాప్తంగా కలకలం రేపింది.
ఒబేదుల్లాగంజ్కు చెందిన ఒక యువకుడు భోపాల్లో తన బంధువుల ఇంట్లో చదువుకుంటున్నాడు. అక్కడ నర్మదాపురంకు చెందిన శుభం యాదవ్తో అతనికి పరిచయం ఏర్పడింది. వారి పరిచయం స్నేహంగా మారి, ఇద్దరూ కలిసి అశోక్ గార్డెన్ ప్రాంతంలో అద్దె ఇంట్లో నివసించడం ప్రారంభించారు. అయితే, ఈ స్నేహం ముసుగులో శుభం యాదవ్ తన నిజస్వరూపాన్ని బయటపెట్టాడు.
బలవంతపు హార్మోన్ చికిత్స, లింగ మార్పిడి శస్త్రచికిత్స
యువకుడికి తరచుగా తలనొప్పి వస్తుందని శుభం యాదవ్ అతన్ని ఆసుపత్రులకు తీసుకెళ్లేవాడు. అక్కడ యువకుడి అనుమతి లేకుండానే అతనికి హార్మోన్ థెరపీ చేయించాడు. తన శరీరంలో అనూహ్యమైన మార్పులను గమనించిన యువకుడు అయోమయంలో పడ్డాడు. చివరికి, శుభం యాదవ్ అతన్ని ఇండోర్కు తీసుకెళ్లి బలవంతంగా లింగ మార్పిడి శస్త్రచికిత్స చేయించినట్టు యువకుడు పోలీసులకు ఇచ్చిన ఫిర్యాదులో పేర్కొన్నాడు.
లైంగిక దాడి, బ్లాక్మెయిలింగ్
శస్త్రచికిత్స అనంతరం, శుభం యాదవ్ యువకుడిని నర్మదాపురంకు తీసుకెళ్లి అతనిపై లైంగిక దాడికి పాల్పడ్డాడు. తన కోరికలు తీరే వరకు వేధించేవాడని బాధితుడు తెలిపాడు. అంతేకాకుండా, ఈ విషయం బయటపెడితే జీవితాన్ని నాశనం చేస్తానని బెదిరిస్తూ రూ. 10 లక్షలు డిమాండ్ చేస్తున్నట్టు యువకుడు వెల్లడించాడు.
పోలీసుల విచారణ ప్రారంభం
ఈ దారుణమైన సంఘటనపై బాధితుడు భోపాల్లోని గాంధీనగర్ పోలీస్ స్టేషన్లో ఫిర్యాదు చేశాడు. పోలీసులు వెంటనే జీరో ఎఫ్ఐఆర్ నమోదు చేసి విచారణ ప్రారంభించారు. బాధితుడికి న్యాయం జరిగేలా చర్యలు తీసుకుంటామని ఇన్చార్జ్ విజేంద్ర వెల్లడించారు.
ఇటువంటి దారుణ సంఘటనలు మానవ సంబంధాలపై నమ్మకాన్ని సన్నగిల్లేలా చేస్తున్నాయి. ఇప్పటివరకు మహిళలు, చిన్నారులు, వృద్ధులపై అత్యాచారాలు వెలుగులోకి రాగా, ఇప్పుడు యువకులపై కూడా ఇలాంటి దాడులు జరుగుతుండటం తీవ్ర ఆందోళన కలిగిస్తోంది. నైతిక విలువలు పడిపోతున్న ఈ తరుణంలో, ఇటువంటి ఘటనలు చట్టాలను కఠినతరం చేయాల్సిన అవసరాన్ని నొక్కి చెబుతున్నాయి.
ఈ ఘటన కేవలం ఒక వ్యక్తిపై జరిగిన అన్యాయం మాత్రమే కాదు, ఇది సమాజానికి ఒక హెచ్చరిక. స్నేహం వంటి పవిత్రమైన బంధాన్ని తమ వికృత కోరికలకు సాధనంగా వాడుకునే మానసిక వైకల్యంతో ఉన్నవారిపై కఠిన చర్యలు తీసుకోవడం అత్యవసరం. బాధితులకు న్యాయం జరగాలి. అలాగే, యువతలో అవగాహన పెంపొందించి, ఇలాంటి దుర్మార్గుల బారి నుండి తమను తాము రక్షించుకోవడానికి అవసరమైన జాగ్రత్తలు తీసుకోవాల్సిన అవసరం ఎంతైనా ఉంది.