బ్యాంక్ గేమ్ వెనుక అసలైన కథ తెలుసా? ఇది కేవలం ఆట కాదయ్యా..!

మీరు చిన్ననాటి జ్ఞాపకాలను నెమరువేసుకునేటప్పుడు, బ్యాంక్ గేమ్ (లేదా మోనోపోలీ) మీ మనసులో మెరిసిపోతుంది కదా? డైస్ వేస్తూ పావులను కదుపుతూ స్థలాలు కొనుగోలు చేస్తూ.. హోటల్స్ నిర్మిస్తూ ప్రత్యర్థుల నుండి అద్దె వసూలు చేస్తూ సంపన్నులయ్యే ఈ ఆట ఎంతోమందికి ప్రియమైనది. కానీ ఈ సరదా ఆట వెనుక ఒక లోతైన సామాజిక సందేశం ఉందని మీకు తెలుసా?

-మోనోపోలీ ఆవిష్కరణ వెనుక అసలు కథ!

మోనోపోలీని మొదటగా 1903లో ఎలిజబెత్ మాగీ అనే అమెరికన్ మహిళ "ల్యాండ్‌లార్డ్ గేమ్" పేరుతో రూపొందించారు. ఆమె ఈ ఆటను సృష్టించడానికి ప్రధాన కారణం, అప్పటి సమాజంలో భూముల ఆధిపత్యం, అద్దె వ్యవస్థ వల్ల ఏర్పడుతున్న అన్యాయాలను, ఆర్థిక అసమానతలను ప్రజలకు తెలియజేయడమే. ప్రజల్లో చైతన్యం తీసుకురావడం ఆమె ముఖ్య లక్ష్యం.

ఎలిజబెత్ మాగీ తన గేమ్‌లో రెండు రకాల నియమాలను చేర్చారు.. ఎగ్జాక్ట్ మోనోపోలీ రూల్స్ మనం ఇప్పుడు ఆడుతున్నట్లుగా ఒకరు మాత్రమే విజేతగా నిలిచే నియమాలు. యాంటీ-మోనోపోలీ రూల్స్ లో అందరికీ సమానంగా డబ్బు పంపిణీ చేసి, సామాజిక న్యాయాన్ని పెంపొందించే నియమాలు ఉంటాయి. ఆమె నిజమైన ఉద్దేశం, మోనోపోలీ (ఏకఛత్రాధిపత్యం) ఎలా ప్రజలను దోచుకుంటుందో స్పష్టం చేయడమే.

- వాణిజ్యీకరణతో మారిన ఉద్దేశ్యం

కాలక్రమేణా ఈ ఆట పలు మార్పులకు లోనైంది. 1930లో చార్లెస్ డారో అనే వ్యక్తి ఈ ఆటను తానే తయారు చేసినట్లు ప్రకటించి, హాస్‌బ్రో కంపెనీకి విక్రయించారు. అప్పటి నుంచి ఇది ప్రపంచంలోనే అత్యంత ప్రజాదరణ పొందిన బోర్డ్ గేమ్‌లలో ఒకటిగా మారింది. వాణిజ్యీకరణకు గురైన తర్వాత ఈ ఆట వెనుక ఉన్న సామాజిక సందేశం చాలావరకు కనుమరుగై, కేవలం వినోద సాధనంగా మారిపోయింది.

- ఆట మారినా, కథ నిలిచిపోయింది!

ఇప్పటికీ చాలామంది మోనోపోలీ గేమ్‌ను వ్యాపార నైపుణ్యాలను నేర్చుకునే సాధనంగా చూస్తారు. కానీ, దీని మూల ఉద్దేశం ఆర్థిక అసమానతలపై అవగాహన కల్పించడమే అన్న విషయం చాలామందికి తెలియదు. మనం ఆడే ఆటల వెనుక ఉన్న నిజమైన కథలను మనం ఎంతవరకు అర్థం చేసుకుంటున్నాం అనే ప్రశ్న ఈ ఆట మనల్ని ఆలోచింపజేస్తుంది.

మీ ఇంట్లో మోనోపోలీ గేమ్ ఉందా? అయితే, ఇంకెప్పుడైనా ఆడేటప్పుడు, దీని వెనుక ఉన్న ఈ అద్భుతమైన కథను గుర్తుకు తెచ్చుకోండి. ఆటలోని ప్రతి కదలిక వెనుక ఒక సామాజిక ఉద్దేశం ఉందని గ్రహించండి!