మిస్ వరల్డ్ వేదికపై క్రీడా సందడి.. తెలంగాణ ఆతిథ్యానికి ఫిదా అయిన ప్రపంచ సుందరీమణులు!

మిస్ వరల్డ్ (Miss World) పోటీదారుల కోసం ప్రత్యేకంగా ఒక స్పోర్ట్స్ డే ఈవెంట్‌ను నిర్వహించారు. హైదరాబాద్‌లోని గచ్చిబౌలి స్టేడియంలో జరిగిన ఈ కార్యక్రమంలో వివిధ దేశాల నుండి వచ్చిన అందాల పోటీదారులు ఎంతో ఉత్సాహంగా పాల్గొన్నారు. మొత్తం పది రకాల క్రీడాంశాలను నిర్వహించారు. ఈ ప్రత్యేక కార్యక్రమానికి బీసీసీఐ వైస్ ప్రెసిడెంట్ రాజీవ్ శుక్లా, తెలంగాణ రాష్ట్ర మంత్రి జూపల్లి కృష్ణారావు, మిస్ వరల్డ్ ఆర్గనైజేషన్ సీఈఓ జూలియా మోర్లీ ముఖ్య అతిథులుగా హాజరయ్యారు.

తెలంగాణ టూరిజం శాఖ ఆధ్వర్యంలో మిస్ వరల్డ్ పోటీలు హైదరాబాద్‌లో అంగరంగ వైభవంగా జరుగుతున్నాయి. ఇందులో భాగంగానే మే 17న గచ్చిబౌలి స్టేడియంలో స్పోర్ట్స్ డేను నిర్వహించారు. ఉదయం నుంచి సాయంత్రం వరకు జరిగిన ఈ కార్యక్రమంలో 100కు పైగా దేశాల నుంచి వచ్చిన మిస్ వరల్డ్ కంటెస్టెంట్లు ఎంతో ఉత్సాహంగా పాల్గొన్నారు. యోగా, బ్యాడ్మింటన్, చెస్ వంటి వివిధ క్రీడల్లో వారు తమ ప్రతిభను చూపించారు. ఒకరినొకరు ప్రోత్సహించుకుంటూ సరదాగా ఆటలాడుకుంటూ సందడి చేశారు.

ఈ సందర్భంగా స్టేడియం మొత్తం సందడి వాతావరణంతో నిండిపోయింది. పోటీదారులు తమ జాతీయ జెండాలను చేతబూని క్రీడా స్ఫూర్తిని చాటారు. కొందరు డ్యాన్స్ చేస్తూ, ప్రేక్షకులకు అభివాదం చేస్తూ ఉత్సాహాన్ని నింపారు. ఈ వేడుకలో తెలంగాణ సంస్కృతి కూడా ప్రతిబింబించింది. ముఖ్య అతిథిగా విచ్చేసిన బీసీసీఐ వైస్ ప్రెసిడెంట్ రాజీవ్ శుక్లా మాట్లాడుతూ.. మిస్ వరల్డ్ వంటి ప్రతిష్టాత్మక వేదికపై క్రీడలను నిర్వహించడం చాలా గొప్ప విషయమని అన్నారు. ఇది యువతకు ఫిట్‌నెస్, ఆరోగ్యం ప్రాముఖ్యతను తెలియజేస్తుందని ఆయన పేర్కొన్నారు. ఇంత పెద్ద ఎత్తున ఈ కార్యక్రమాన్ని నిర్వహిస్తున్న తెలంగాణ ప్రభుత్వాన్ని ఆయన అభినందించారు.

మంత్రి జూపల్లి కృష్ణారావు మాట్లాడుతూ.. మిస్ వరల్డ్ పోటీదారుల సందర్శన తెలంగాణలోని గ్రామీణ ప్రాంతాల ప్రజలకు స్ఫూర్తినిస్తుందని ఆశాభావం వ్యక్తం చేశారు. అంతేకాకుండా, తెలంగాణను ప్రపంచ పటంలో ఒక గొప్ప పర్యాటక కేంద్రంగా నిలపడానికి ఈ వేదిక ఎంతగానో ఉపయోగపడుతుందని ఆయన అన్నారు. ముఖ్యమంత్రి రేవంత్ రెడ్డి త్వరలో తీసుకురానున్న నూతన క్రీడా విధానం మహిళల భాగస్వామ్యాన్ని పెంచడానికి ప్రత్యేక ప్రాధాన్యత ఇస్తుందని ఆయన తెలిపారు. రాష్ట్రంలో క్రీడా ప్రతిభను వెలికి తీయడానికి 'యంగ్ ఇండియా ఫిజికల్ ఎడ్యుకేషన్ అండ్ స్పోర్ట్స్ యూనివర్సిటీ'ని ఏర్పాటు చేయనున్నట్లు ఆయన వెల్లడించారు.

మిస్ వరల్డ్ ఆర్గనైజేషన్ సీఈఓ జూలియా మోర్లీ మాట్లాడుతూ.. స్పోర్ట్స్ డే ఈవెంట్‌ను ఇంత ఘనంగా నిర్వహించినందుకు తెలంగాణ ప్రభుత్వానికి ధన్యవాదాలు తెలిపారు. ఈ పోటీలు కేవలం అందాల వేదిక మాత్రమే కాదని, ప్రపంచవ్యాప్తంగా స్నేహం, శాంతి, సామరస్యాన్ని పెంపొందించే ఒక గొప్ప అవకాశం అని ఆమె అన్నారు.ఈ స్పోర్ట్స్ డే ఈవెంట్ మిస్ వరల్డ్ పోటీదారులకు ఒక ఆహ్లాదకరమైన అనుభవాన్ని అందించింది. వివిధ దేశాల సంస్కృతులు కలగలసిన ఈ వేడుకలో క్రీడా స్ఫూర్తి వెల్లివిరిసింది.