చేతివేళ్లే మౌస్.. మెటా సంచలనం.. విప్లవాత్మక టెక్నాలజీ

ప్రపంచం టెక్నాలజీ వేగంతో దూసుకుపోతోంది. ఈ క్రమంలో సామాజిక మాధ్యమ దిగ్గజం మెటా (Meta) మరో వినూత్న ఆవిష్కరణతో ముందుకు వచ్చింది. మానవ శరీరం నుండి వెలువడే విద్యుత్ సంకేతాలను ఆధారంగా చేసుకుని, కేవలం చేతి వేలు కదలికలతో కంప్యూటర్లను నియంత్రించే స్మార్ట్‌ రిస్ట్‌ బ్యాండ్‌ను మెటా అభివృద్ధి చేసింది. దీనితో ఇక కీబోర్డు, మౌస్‌, టచ్‌ స్క్రీన్, వాయిస్‌ కమాండ్ల అవసరం లేకుండానే కంప్యూటర్‌ను నియంత్రించే రోజులు రానున్నాయి.

-ఏంటీ ఈ స్మార్ట్‌ రిస్ట్‌ బ్యాండ్‌?

మెటా యొక్క 'రియాలిటీ ల్యాబ్స్‌' విభాగంలో రూపొందించిన ఈ బ్రేస్‌లెట్‌, వినియోగదారుడి మణికట్టు వద్ద ఉన్న కండరాల నుండి వెలువడే ఎలక్ట్రోమయోగ్రాఫిక్‌ (EMG) సంకేతాలను గుర్తించి పనిచేస్తుంది. మన మెదడు ఇచ్చే ఆదేశాలతో చేతులు కదిలినప్పుడు వచ్చే అత్యంత సూక్ష్మమైన విద్యుత్ సంకేతాలను ఈ పరికరం గ్రహించి, వాటిని కంప్యూటర్‌కు అర్థమయ్యే ఇన్‌పుట్‌లుగా మారుస్తుంది.

- ఎలా పనిచేస్తుంది?

ఈ స్మార్ట్‌ రిస్ట్‌ బ్యాండ్‌ స్పర్శతేతర పద్ధతిలో పనిచేస్తుంది. దీని ప్రత్యేకతలు.. వాడేవారి వేలు కదలికల ఆధారంగా టైపింగ్‌, ఇతర ఆపరేషన్లు జరుగుతాయి. మనం టేబుల్‌పై రాస్తున్నట్లుగా చేతులు కదిలిస్తే.. ఆ విషయం నేరుగా స్క్రీన్‌పై ప్రత్యక్షమవుతుంది. ఇంకా ఆశ్చర్యకరమైన విషయం ఏమిటంటే, మనం జేబులో చేతులు పెట్టుకుని కూడా ఈ పరికరాన్ని ఉపయోగించవచ్చు. ఇది దీనికి ఉన్న అత్యంత వినూత్నమైన ఫీచర్.

-దివ్యాంగులకు వరం!

ఈ టెక్నాలజీ ముఖ్యంగా దివ్యాంగులు, వాయిస్‌ కమాండ్‌లు ఉపయోగించలేని వారు, లేదా కీబోర్డు వాడలేని వారికి ఎంతో ఉపయోగకరంగా ఉంటుంది. శరీరంలోకి ఎలాంటి ఇంప్లాంట్లు అమర్చాల్సిన అవసరం లేకుండానే, ఈ బ్రేస్‌లెట్‌ వాడటం ద్వారా సులభంగా కంప్యూటర్‌ను నియంత్రించవచ్చు. ఇది వారి దైనందిన జీవితాన్ని మరింత సులభతరం చేస్తుంది.

- ఎస్‌ఈఎమ్‌జీ టెక్నాలజీతో సుసంపన్నం

ఈ పరికరం సర్ఫెస్‌ ఎలక్ట్రోమయోగ్రఫీ (sEMG) టెక్నాలజీ ఆధారంగా పనిచేస్తుంది. అంటే, శరీరం లోపల ఉండే సంకేతాలను బయట నుంచే అత్యంత కచ్చితత్వంతో గుర్తించగల సామర్థ్యం దీనికి ఉంది. చాలా సున్నితమైన విద్యుత్ సంకేతాలను కూడా ఇది రీడ్‌ చేసి, వాటిని డిజిటల్‌ యాక్షన్లుగా మార్చగలదు.

-వాడకాలు:

ఈ స్మార్ట్‌ రిస్ట్‌ బ్యాండ్‌ యొక్క భవిష్యత్ వాడకాలు విస్తృతంగా ఉండనున్నాయి. మెసేజ్‌లు టైప్ చేయడం.. డెస్క్‌ప్లే మెనూలను నియంత్రించడం.. చేతుల కదలికలతో డిజిటల్‌ కంటెంట్‌ను యాక్సెస్ చేయడం..

రహస్యంగా సమాచారాన్ని పంపించడం.. ఇది గోప్యతను కోరుకునే వారికి ఎంతో ప్రయోజనకరం.

- భవిష్యత్తు దిశగా మెటా అడుగులు

ఈ టెక్నాలజీ ఇప్పటికీ అభివృద్ధి దశలో ఉంది. మెటా సంస్థ ఈ రంగంలో మరిన్ని పరిశోధనలకు మద్దతు ఇస్తోంది. డేటా మోడళ్లు, సాఫ్ట్‌వేర్ డిజైన్లు, పరికరాల రూపకల్పనల్లో ఇతర పరిశోధకులకూ సహకరించనుంది. దీని ద్వారా మరిన్ని కొత్త టెక్నాలజీలు వస్తాయని నిపుణులు భావిస్తున్నారు.

ఈ టెక్నాలజీ పూర్తిస్థాయిలో అందుబాటులోకి వచ్చినప్పుడు.. కంప్యూటర్ వాడకంలో గొప్ప విప్లవం సంభవించనుంది. ఇది కేవలం టెక్నాలజీ అభివృద్ధి మాత్రమే కాదు.. మనం ఎలా జీవిస్తున్నామో, ఎలా పని చేస్తున్నామో మార్చివేసే దిశగా ఒక కీలకమైన అడుగు.