మహారాష్ట్ర నది లో గ్యాస్ సిలిండర్ల వరద.. పేలుడు ప్రమాదంపై అధికారుల ఆందోళన

మహారాష్ట్రలో కొద్ది రోజులుగా కురుస్తున్న కుండపోత వర్షాలు రాష్ట్రాన్ని అతలాకుతలం చేస్తున్నాయి. ముఖ్యంగా కొంకణ్ తీర ప్రాంతం, పుణే పరిసరాల్లో కురుస్తున్న భారీ వర్షాలకు వాగులు, వంకలు, నదులు ప్రమాదకర స్థాయికి మించి ప్రవహిస్తున్నాయి. ఈ ప్రకృతి విపత్తులో భాగంగా రాయగఢ్ జిల్లాలోని ఖాలాపూర్ తాలూకా చావణే ప్రాంతంలో హెచ్‌పీసీఎల్‌ ఎల్పీజీ బాట్లింగ్ ప్లాంట్ తీవ్రంగా దెబ్బతింది. వరద నీరు ప్లాంట్‌ను ముంచెత్తడంతో అక్కడ నిల్వ ఉంచిన దాదాపు 3,000 గ్యాస్ సిలిండర్లు పాతాళగంగ నది ఉధృతిలో కొట్టుకుపోయాయి. ఈ వీడియోలు సోషల్ మీడియాలో వైరల్ గా మారాయి.

నదిలో భారీగా సిలిండర్లు కొట్టుకుపోతున్న దృశ్యాలు స్థానికంగా తీవ్ర కలకలం రేపాయి. కొట్టుకొచ్చిన సిలిండర్లను నది ఒడ్డున గమనించిన కొంతమంది స్థానికులు, వాటిని ఇళ్లకు తీసుకెళ్లే ప్రయత్నం చేయడంతో పరిస్థితి మరింత ప్రమాదకరంగా మారింది. సిలిండర్లలో గ్యాస్ నిల్వలు ఉండే అవకాశం ఉన్నందున, ఏమాత్రం అజాగ్రత్తగా వ్యవహరించినా భారీ పేలుళ్లు సంభవించే అవకాశం ఉందని నిపుణులు హెచ్చరిస్తున్నారు. ఈ పరిణామం పట్ల రాయగఢ్ జిల్లా యంత్రాంగం తీవ్ర ఆందోళన వ్యక్తం చేస్తోంది.

ఈ నేపథ్యంలో జిల్లా కలెక్టర్ స్పందిస్తూ, ప్రజలు అప్రమత్తంగా ఉండాలని హెచ్చరికలు జారీ చేశారు. నదిలో కొట్టుకొచ్చిన లేదా ఒడ్డుకు చేరిన ఏ గ్యాస్ సిలిండర్‌ను కూడా ఎవరూ తాకవద్దని, వాటిని ఇళ్లకు తరలించడం ప్రాణాపాయమని ఆయన స్పష్టం చేశారు. సిలిండర్ల నుంచి గ్యాస్ లీకయ్యే ప్రమాదం ఉందని, ఆ సమయంలో చిన్నపాటి నిప్పు రవ్వ తగిలినా పెద్ద ఎత్తున పేలుడు జరిగి ప్రాణనష్టం వాటిల్లే అవకాశం ఉందని పేర్కొన్నారు. ఎక్కడైనా ఇలాంటి సిలిండర్లు కనిపిస్తే వెంటనే స్థానిక అధికారులు, పోలీసులు లేదా డిజాస్టర్ మేనేజ్మెంట్ విభాగానికి సమాచారం అందించాలని ప్రజలకు సూచించారు.

మహారాష్ట్రలో చోటుచేసుకున్న ఈ విపరీత వాతావరణ పరిస్థితులకు పశ్చిమ కనుమల్లో కురుస్తున్న అసాధారణ వర్షాలే కారణమని వాతావరణ శాఖ వెల్లడించింది. ముఖ్యంగా పుణే సమీపంలోని ప్రముఖ పర్యాటక ప్రాంతమైన లోనావాలాలో గత 48 గంటల్లోనే రికార్డు స్థాయిలో 1,290 మి.మీ వర్షపాతం నమోదైంది. వెయ్యేళ్ల చరిత్రలో ఎప్పుడూ లేని విధంగా కురిసిన ఈ భారీ వర్షంతో లోనావాలాతో పాటు మహబలేశ్వర్, భీరా ప్రాంతాల్లో జనజీవనం పూర్తిగా స్తంభించిపోయింది.

ప్రస్తుతం రాయగఢ్ జిల్లా అధికారులు, ఎన్డీఆర్ఎఫ్ బృందాలు, హెచ్‌పీసీఎల్‌ సిబ్బంది సంయుక్తంగా సహాయక చర్యలు చేపడుతున్నారు. నదిలో కొట్టుకుపోయిన సిలిండర్లను గుర్తించి, వాటిని సురక్షితంగా బయటకు తీసే ప్రక్రియను యుద్ధ ప్రాతిపదికన చేపడుతున్నారు. ప్రకృతి వైపరీత్యం సమయంలో ప్రజల భద్రతే లక్ష్యంగా యంత్రాంగం పనిచేస్తున్నప్పటికీ ప్రజల సహకారం అత్యంత కీలకమని, అధికారులు చెప్పే సూచనలను తప్పనిసరిగా పాటించాలని ప్రభుత్వం కోరుతోంది.