ఫ్రాన్స్ అధ్యక్షుడు మాక్రాన్‌పై డ్రగ్స్ ఆరోపణలు: వైరల్ వీడియో వెనుక నిజమెంత?

మాదక ద్రవ్యాల (డ్ర*గ్స్) వాడకం ఒక వ్యక్తి జీవితాన్ని ఎంతగా నాశనం చేస్తుందో ప్రత్యేకంగా చెప్పాల్సిన పనిలేదు. డ్ర*గ్స్‌కు బానిసైన వారు విచక్షణ కోల్పోతారు. ఈ కారణంగానే ప్రపంచంలోని అనేక దేశాలు డ్ర*గ్స్ వాడకాన్ని పూర్తిగా నిషేధించాయి, వినియోగదారులపై కఠిన చర్యలు తీసుకుంటున్నాయి. డ్ర*గ్స్ తీసుకోవడం ఎంత హానికరమో, వాటికి దూరంగా ఉండటం ఎంత అవసరమో ప్రజలకు చెప్పాల్సిన దేశాధినేత ఒకరు తప్పుదోవ పట్టారనే చర్చ జరుగుతోంది. ఆ ప్రముఖ వ్యక్తి ఎవరో కాదు, ఫ్రాన్స్ అధ్యక్షుడు ఇమ్మాన్యుయేల్ మాక్రాన్ అని అంటున్నారు.

ఫ్రాన్స్ అధ్యక్షుడు ఇమ్మాన్యుయేల్ మాక్రాన్‌కు సంబంధించిన ఒక వీడియో ఇటీవల సోషల్ మీడియాలో సంచలనం సృష్టించింది. ఈ వీడియోలో మాక్రాన్ డ్ర*గ్స్ ప్యాకెట్‌ను దాచిపెడుతున్నారని ఆరోపణలు వెల్లువెత్తాయి. అయితే, ఈ వాదనలను ఫ్రెంచ్ మీడియా, ఎలిసే ప్యాలెస్ గట్టిగా ఖండించాయి. అసలు ఈ వ్యవహారం వెనుక నిజమెంతో పరిశీలిద్దాం.

-వైరల్ వీడియోలో ఏముంది?

ఉక్రెయిన్ పర్యటనలో భాగంగా పోలాండ్ నుంచి రైలులో ప్రయాణిస్తున్న ఇమ్మాన్యుయేల్ మాక్రాన్, యూకే ప్రధాని కైర్ స్టామర్ , జర్మన్ కౌన్సిలర్ ఫ్రెడ్రిచ్ మెర్జ్‌తో సమావేశమయ్యారు. ఈ భేటీ జరుగుతున్న సమయంలో మీడియా ప్రతినిధులు వారి ఫొటోలు, వీడియోలు తీశారు. ఈ వీడియోల్లో ఒకదానిలో, మాక్రాన్ తన ముందు టేబుల్‌పై ఉన్న ఒక చిన్న తెల్లటి వస్తువును వేగంగా తీసుకుని, ఎవరికీ కనిపించకుండా తన చేతిలోకి మార్చుకోవడం కనిపించింది. ఈ దృశ్యం ఆధారంగా, మాక్రాన్ దాచిపెట్టింది కొ*కైన్ పొట్లం అని సోషల్ మీడియాలో విస్తృత ప్రచారం జరిగింది. 'కొకైన్ తో అడ్డంగా దొరికిన దేశ అధ్యక్షుడు' అంటూ పలు వార్తలు, మీమ్స్ వైరల్ అయ్యాయి. వీడియోలో మెర్జ్ పక్కన కనిపించిన మరొక చిన్న వస్తువును కొకైన్ సేవించడానికి ఉపయోగించే స్పూన్ అని కూడా కొందరు ఆరోపించారు.

-ఫ్రెంచ్ మీడియా స్పందన:

సోషల్ మీడియాలో జరుగుతున్న ఈ ప్రచారాన్ని ఫ్రెంచ్ మీడియా సంస్థలు, ముఖ్యంగా 'లిబరేషన్', ఏఎఫ్పీ , అసోసియేటెడ్ ప్రెస్ గట్టిగా ఖండించాయి. వీడియోలో మాక్రాన్ చేతిలోకి తీసుకున్నది కొకైన్ పొట్లం కాదని, అది కేవలం ఒక కర్చీఫ్ అని 'లిబరేషన్' స్పష్టం చేసింది. నాణ్యమైన ఫొటోలు వీడియోలను పరిశీలిస్తే ఆ వస్తువు చుట్టబడిన కర్చీఫ్ అని తెలుస్తుందని పేర్కొంది.ఈ ఆరోపణలు పూర్తిగా కుట్రపూరితమైన ప్రచారంలో భాగమని, పాశ్చాత్య నాయకులను అప్రతిష్ట పాలు చేయాలనే ఉద్దేశ్యంతో ఇలాంటివి ప్రచారం చేస్తున్నారని ఫ్రెంచ్ మీడియా విశ్లేషించింది. ముఖ్యంగా, ఈ ప్రచారం వెనుక రష్యా ప్రభుత్వ పాత్ర ఉండవచ్చని కొన్ని నివేదికలు సూచించాయి.

-ఎలిసే ప్యాలెస్ వివరణ:

ఈ ఆరోపణలపై ఫ్రాన్స్ అధ్యక్ష భవనం ఎలిసే ప్యాలెస్ కూడా స్పందించింది. అధికారికంగా తమ సోషల్ మీడియా ఖాతా ద్వారా ఒక పోస్ట్ చేస్తూ, అది కేవలం టిష్యూ పేపర్ అని, డ్ర*గ్స్ కాదని స్పష్టం చేసింది. ఐరోపా దేశాల ఐక్యతను దెబ్బతీయడానికి తప్పుడు సమాచారాన్ని ప్రచారం చేస్తున్నారని, ఇలాంటి తప్పుడు వార్తలపై అప్రమత్తంగా ఉండాలని సూచించింది. మెర్జ్ పక్కన కనిపించిన వస్తువు టూత్ పిక్ లేదా డ్రింక్ స్టిరర్ అయి ఉండవచ్చని కూడా కొన్ని నివేదికలు పేర్కొన్నాయి.

ఒక వైరల్ వీడియో ఆధారంగా ఫ్రాన్స్ అధ్యక్షుడు ఇమ్మాన్యుయేల్ మాక్రాన్‌పై వచ్చిన డ్ర*గ్స్ ఆరోపణలు నిరాధారమైనవని ఫ్రెంచ్ మీడియా , ఎలిసే ప్యాలెస్ స్పష్టం చేశాయి. వీడియోలో కనిపించిన వస్తువు కొకైన్ ప్యాకెట్ కాదని, అది కేవలం కర్చీఫ్ అని తేలింది. పాలకులపై ఇలాంటి తీవ్రమైన ఆరోపణలు వచ్చినప్పుడు, వాటి వెనుక ఉన్న నిజానిజాలను నిర్ధారించుకోకుండా విశ్వసించడం సరికాదని ఈ సంఘటన మరోసారి రుజువు చేసింది. తప్పుడు సమాచారం మరియు కుట్ర సిద్ధాంతాలు ఎంత వేగంగా వ్యాప్తి చెందుతాయో మరియు అవి వ్యక్తుల ప్రతిష్టను ఎలా దెబ్బతీస్తాయో ఈ ఉదాహరణ తెలియజేస్తుంది.