సింహాన్ని పెంచుకోవడం ఏంట్రా బాబు.. అది చూడు బయటకొచ్చి ఏం చేసిందో?

పాకిస్తాన్‌లోని లాహోర్ నగరంలో ఇటీవల జరిగిన ఒక అసాధారణ సంఘటన స్థానికంగా తీవ్ర కలకలం సృష్టించింది. ఇంట్లో అక్రమంగా పెంచుకుంటున్న ఓ సింహం బయటకు పారిపోయి, వీధిలో వెళ్తున్న ఒక మహిళపై దాడి చేసింది. ఈ ఘటన దేశవ్యాప్తంగానే కాకుండా, సామాజిక మాధ్యమాల్లో కూడా విపరీతంగా వైరల్ అవుతోంది. ఈ దాడికి సంబంధించిన సీసీ కెమెరా ఫుటేజ్ సోషల్ మీడియాలో విపరీతంగా షేర్ అవుతోంది. అయితే, అసలేం జరిగింది? సింహం ఎలా బయటకు వచ్చింది? దీని వెనకున్న నిజాలు ఏంటో తెలుసుకున్న పోలీసులు సైతం ఆశ్చర్యపోయారు.

అసలేం జరిగింది?

లాహోర్ నగరంలోని షాదీ కోయి ప్రాంతానికి చెందిన ఒక సంపన్న కుటుంబం, విదేశాల నుంచి అక్రమంగా ఒక సింహం పిల్లను తెచ్చుకుంది. ఎంతో ప్రేమతో దాన్ని ఇంట్లో పెంచడం ప్రారంభించింది. మొదట్లో అంతా బాగానే సాగింది. కానీ రోజులు గడుస్తున్న కొద్దీ ఆ సింహం పెద్దదైంది. దానిని బోనులో ఉంచడం వల్ల అది క్రూరంగా, కోపంగా మారుతూ ఉండేది.ఒక రోజు యజమాని సింహానికి ఆహారం పెట్టేందుకు బోను తలుపు తెరిచాడు. అదే సమయంలో సింహం ఒక్కసారిగా బయటకు దూకి పారిపోయింది. వీధిలో నడుస్తున్న ఒక మహిళపై దాడికి దిగింది. ఈ దాడిలో ఆమెకు తీవ్ర గాయాలయ్యాయి. ఈ ఊహించని పరిణామంతో స్థానికులు తలుపులు వేసుకుని తీవ్ర భయాందోళనకు గురయ్యారు. కొందరు ధైర్యం చేసి సింహాన్ని దూరం తరిమే ప్రయత్నం చేయగా, అది అక్కడి నుంచి పారిపోయింది.

సీసీ టీవీ ఫుటేజ్ ఆధారంగా అరెస్టులు

ఈ ఘటనపై స్థానికులు పోలీసులకు సమాచారం అందించడంతో అటవీశాఖ అధికారుల సహకారంతో పోలీసులు సింహాన్ని వెతికి పట్టుకున్నారు. మత్తు మందు ద్వారా అదుపులోకి తీసుకుని, దానిని జంతు ప్రదర్శనశాలలోకి తరలించారు. అనంతరం, ఆ కుటుంబం అక్రమంగా సింహం పిల్లను తెచ్చుకున్నట్లు నిర్ధారణ కావడంతో ఆ కుటుంబంలోని సభ్యులను పోలీసులు అరెస్ట్ చేశారు. వారికి సంబంధించిన ఆధారాలతో న్యాయమూర్తి ఎదుట హాజరుపరిచారు. విచారణ అనంతరం న్యాయమూర్తి వారిని జైలుకు తరలించాలని ఆదేశించారు.

స్థానికుల ఆగ్రహం

ఈ ఘటనపై స్థానికులు తీవ్ర ఆగ్రహాన్ని వ్యక్తం చేశారు. "దేశంలో ఇప్పటికే పేదరికం, నీటి కష్టాలు ఉన్నాయి. చాలా మంది ఆకలితో బాధపడుతున్నారు. ఇలాంటి సమయంలో కొంతమంది ధనవంతులు సింహాలను ఇంట్లో పెంచుకుంటున్నారు. అది బయటకు పారిపోయి మనుషులపై దాడి చేస్తోంది. ఇటువంటి వారి మీద కఠిన చర్యలు తీసుకోవాలి. వారి సంపదను ప్రభుత్వమే స్వాధీనం చేసుకుని పేదలకు పంచాలి" అంటూ ఆవేదన వ్యక్తం చేస్తున్నారు.

జంతువులను ప్రేమించడంలో తప్పు లేదు. కానీ వాటిని చట్టబద్ధంగా, భద్రతా ప్రమాణాలకు అనుగుణంగా సంరక్షించాలి. క్రూర మృగాలను నివాస ప్రాంతాల్లో పెంచడం కేవలం అక్రమమే కాకుండా, ప్రాణహానికీ దారితీయొచ్చు. ఈ ఘటన అందరికీ గుణపాఠం కావాల్సిన అవసరం ఉందని నిపుణులు అభిప్రాయపడుతున్నారు. పెంపుడు జంతువులు మనుషులకు మంచి మిత్రులవుతాయి. కానీ వాటిని ఎంచుకునే ముందు మనం ఆ జంతువును సరైన స్థలంలో, సరైన శిక్షణతో పెంచగలమా అనే విషయాన్ని ఆలోచించాలి. లేకపోతే, ప్రేమ పేరుతో పెంచిన జంతువు ప్రాణాంతక మృగంగా మారే ప్రమాదం ఉంది. జంతు ప్రేమతో పాటు, బాధ్యత కూడా ఎంతో ముఖ్యం.