ఖాజా మోహిజుద్దీన్ హత్యపై కుమారుడు ఫర్హాన్ సంచలన ఆరోపణలు

నగరంలో ప్రముఖ న్యాయవాది, వక్ఫ్ బోర్డు ఆస్తుల పరిరక్షణ ఉద్యమకారుడు ఖాజా మోహిజుద్దీన్ దారుణ హత్య స్థానికంగా తీవ్ర కలకలం రేపుతోంది. ప్రజా సమస్యలపై, ముఖ్యంగా ముస్లిం మైనారిటీల వక్ఫ్ భూముల పరిరక్షణకై దశాబ్దాలుగా న్యాయపోరాటం చేస్తున్న ఒక మేధావిని ఇలా నడిరోడ్డుపై అంతమొందించడం రాజకీయ, సామాజిక వర్గాల్లో పెద్ద దుమారమే రేపుతోంది. ఈ ఘోర ఉదంతంపై మృతుడి కుమారుడు ఫర్హాన్ మీడియా ముందుకు వచ్చి చేసిన ఆరోపణలు ఇప్పుడు రాష్ట్రవ్యాప్తంగా సంచలనంగా మారాయి. తమ తండ్రి హత్య వెనుక ఒక పథకం ప్రకారం జరిగిన కుట్ర ఉందని, దీనికి స్థానిక నాయకుడు ఆలం ఖానే పూర్తి కారణమని ఫర్హాన్ తీవ్రమైన ఆరోపణలు గుప్పించారు.

దశాబ్దాల న్యాయపోరాటం.. వక్ఫ్ భూముల వివాదం

వక్ఫ్ బోర్డుకు చెందిన కోట్లాది రూపాయల విలువైన భూములను అక్రమార్కుల బారి నుంచి కాపాడేందుకు ఖాజా మోహిజుద్దీన్ సుదీర్ఘకాలంగా పోరాడుతున్నారు. ఈ క్రమంలోనే పలువురు రాజకీయ బడా బాబుల కన్ను ఆయనపై పడింది. కుమారుడు ఫర్హాన్ తెలిపిన వివరాల ప్రకారం..నాయకుడైన ఆలం ఖాన్, అతని తండ్రి కలిసి వక్ఫ్ బోర్డుకు చెందిన విలువైన భూములను అక్రమంగా ఆక్రమించుకున్నారు. అంతటితో ఆగకుండా ఆ భూముల్లో పెద్ద ఎత్తున ప్రైవేట్ కాలేజీలు, విద్యాసంస్థలను కూడా నిర్మించారు.

ఈ భారీ భూఆక్రమణలపై ఖాజా మోహిజుద్దీన్ వెనక్కి తగ్గకుండా ఎన్నో సంవత్సరాలుగా కోర్టుల్లో కేసులు వేస్తూ న్యాయపోరాటం సాగిస్తున్నారు. అక్రమార్కుల గుట్టు రట్టు చేస్తూ న్యాయస్థానాల్లో వారికి వ్యతిరేకంగా బలమైన ఆధారాలు సేకరిస్తుండటంతోనే మోహిజుద్దీన్‌ను లక్ష్యంగా చేసుకున్నారని కుటుంబ సభ్యులు ఆరోపిస్తున్నారు.

ఇది ఆరోసారి దాడి.. గతంలోనే ప్రత్యక్ష బెదిరింపులు

తమ తండ్రిని చంపేందుకు గతంలో కూడా అనేక రకాలుగా ప్రయత్నాలు జరిగాయని ఫర్హాన్ ఈ సందర్భంగా గుర్తుచేసుకున్నారు. “మా తండ్రిపై భౌతిక దాడి జరగడం ఇది మొదటిసారి కాదు.. ఇది ఆరోసారి. గతంలో కూడా పలుమార్లు మా కార్యాలయాలపై గుర్తుతెలియని వ్యక్తులు, ప్రత్యర్థులు దాడులకు తెగబడ్డారు. అయినప్పటికీ మా నాన్నగారు ఎప్పుడూ భయపడలేదు. సమాజం కోసం, వక్ఫ్ ఆస్తుల రక్షణ కోసం తన ప్రాణాలను సైతం లెక్కచేయకుండా జీవితాంతం పోరాడారు” అని ఫర్హాన్ కన్నీటిపర్యంతమయ్యారు.

గత ఆరు నెలల క్రితం జరిగిన ఒక సంఘటనను ఫర్హాన్ ప్రత్యేకంగా ప్రస్తావించారు. ఆరు నెలల క్రితం కాంగ్రెస్ నేత ఆలం ఖాన్ నేరుగా తమ ఆఫీసుకే వచ్చి తీవ్రస్థాయిలో హెచ్చరించాడని.. కోర్టు కేసుల నుంచి తప్పుకోకపోతే పరిణామాలు తీవ్రంగా ఉంటాయని బెదిరించాడని తెలిపారు. అంతకుముందు కూడా తమ ఆఫీసు సిబ్బందిని భయభ్రాంతులకు గురిచేస్తూ దాడులు చేశారని.. ఇప్పుడు చివరకు అనుకున్నట్లే తమ తండ్రి ప్రాణాలు తీశారని ఫర్హాన్ ఆవేదన వ్యక్తం చేశారు.

మా కుటుంబానికి రక్షణ కల్పించండి: ప్రభుత్వంపై ఒత్తిడి

ఈ ఘోర ఉదంతం తర్వాత తమ కుటుంబం మొత్తం తీవ్ర భయాందోళనల మధ్య కొట్టుమిట్టాడుతోందని ఫర్హాన్ ఆందోళన వ్యక్తం చేశారు. తమ తండ్రిని పొట్టనబెట్టుకున్న శక్తులు ఇప్పుడు తమపై కూడా కక్షగట్టే ప్రమాదం ఉందని వాపోయారు. “ఇకపై నాకు గానీ, నా కుటుంబ సభ్యులకు గానీ ఎలాంటి ఆపద వచ్చినా మాకు ఏ ప్రమాదం జరిగినా దానికి పూర్తి బాధ్యత ఆలం ఖాన్‌దే” అని ఆయన స్పష్టం చేశారు.

ఈ మేరకు రాష్ట్ర ప్రభుత్వానికి, ఉన్నతాధికారులకు ఫర్హాన్ విజ్ఞప్తి చేశారు. తమ కుటుంబానికి తక్షణమే పూర్తిస్థాయి పోలీస్ రక్షణ కల్పించాలని డిమాండ్ చేశారు. అలాగే రాజకీయ ప్రలోభాలకు లొంగకుండా ఈ హత్య వెనుక ఉన్న అసలు సూత్రధారులను, పాత్రధారులను నిష్పాక్షికంగా విచారించి, నిందితులకు కోర్టు ద్వారా కఠినమైన శిక్ష పడేలా చూడాలని కోరారు.

కేసు దర్యాప్తులో పోలీసులు.. రాజకీయ వర్గాల్లో వేడి

న్యాయవాది ఖాజా మోహిజుద్దీన్ హత్య కేసును నగర పోలీసులు అత్యంత ప్రతిష్టాత్మకంగా తీసుకున్నారు. ఘటనా స్థలాన్ని పరిశీలించి, క్లూస్ టీమ్ ద్వారా ఆధారాలు సేకరిస్తున్నారు. భూవివాదాలు, గతంలో జరిగిన బెదిరింపుల కోణంలోనే ప్రాథమిక దర్యాప్తు సాగుతున్నట్లు సమాచారం. అయితే ఈ హత్యపై మృతుడి కుమారుడు ఫర్హాన్ చేసిన తీవ్ర ఆరోపణలపై అటు కాంగ్రెస్ పార్టీ నుంచి కానీ, ఇటు ఆరోపణలు ఎదుర్కొంటున్న కాంగ్రెస్ నేత ఆలం ఖాన్ నుంచి కానీ ఇప్పటివరకు ఎలాంటి అధికారిక స్పందన లేదా ఖండన వెలువడలేదు. వక్ఫ్ భూముల ఆక్రమణల నేపథ్యం ఉన్న ఈ కేసు రాబోయే రోజుల్లో ఎలాంటి మలుపులు తిరుగుతుందోనన్నది నగరంలో ఉత్కంఠ రేపుతోంది.