కోమటిరెడ్డి వర్సెస్ రేవంత్ రెడ్డి... సలార్ సాంగ్ తో సమాధానం!

కాంగ్రెస్ నేతలు చెప్పుకుంటున్నట్లు 10ఏళ్ల వనవాసం పూర్తయ్యింది.. ఇక రాజయోగం మొదలైంది అన్నట్లుగా తెలంగాణ ఎన్నికల్లో విజయం అనంతరం కాంగ్రెస్ పార్టీలో అనూహ్య మార్పులు చోటుచేసుకుంటున్నాయి. ఇందులో భాగంగా తెలంగాణ మంత్రి, కాంగ్రెస్ పార్టీ కీలక నేత కోమటిరెడ్డి వెంకటరెడ్డి తాజాగా పోస్ట్ చేసిన వీడియో వైరల్ గా మారుతుంది. టి.కాంగ్రెస్ నేతల్లో ఈ ఐకమత్యమే కదా తాము కోరుకున్నది అంటూ శ్రేణులు ఖుషీగా కామెంట్లు పెడుతున్నాయి.

అవును... రేవంత్ రెడ్డి, కోమటిరెడ్డి వెంకటరెడ్డి.. వీరిద్దరూ రాజకీయంగా ఒకే పార్టీ అయినప్పటికీ గతంలో ఉప్పూ, నిప్పూగా ఉన్న సంఘటనలు ఎన్నో తెరపైకి వచ్చాయి! పార్టీ అంతర్గత సమావేశాల్లోనూ, బహిరంగంగానూ పలు దఫాలుగా వీరిద్దరి మధ్య మాటల యుద్ధం సాగింది. అయితే.. అదంతా గతం! ఇప్పుడు కాంగ్రెస్ పార్టీ అధికారంలోకి రావడం.. సీఎంగా రేవంత్ రెడ్డి, మంత్రిగా కోమటిరెడ్డి వెంకట్ రెడ్డి కొనసాగుతుండటం జరుగుతుంది.

తెలంగాణలో కాంగ్రెస్ పార్టీ అధికారంలోకి వచ్చినప్పటినుంచీ వీరిద్దరి మధ్య పొరపొచ్చులన్నీ రూపుమాసిపోయాయని తెలిపేలా అన్నట్లుగా... ఎక్కడ చూసినా వీరిద్దరూ చాలా అన్నోన్యంగా కనిపిస్తున్నారు! దీంతో ఇరువురు నేతల అభిమానులు, కాంగ్రెస్ శ్రేణులు సంతోషాన్ని వ్యక్తం చేస్తున్నారు. ఈ క్రమంలో తాజాగా మంత్రి కోమటిరెడ్డి వెంకటరెడ్డి తన ట్విటర్ ఖాతాలో ఓ వీడియోను విడుదల చేశారు. ఇప్పుడు ఇది హాట్ టాపిక్ గా మారింది.

తాజాగా వెంకటరెడ్డి పోస్ట్ చేసిన వీడియోలో "సలార్" సాంగ్ వినిపిస్తుంది. యంగ్ రెబల్ స్టార్, డైనోసార్ ప్రభాస్ హీరోగా నటించిన "సలార్" సినిమా ఇటీవలే విడుదలైన సంగతి తెలిసిందే ఈ సినిమాలో ఇద్దరు వ్యక్తుల మధ్య స్నేహం గురించి సాంగ్ అద్భుతంగా ఉంటుంది. ఇందులో భాగంగా... "వేగమొకడు... త్యాగమొకడు" అంటూ ఈ పాట సాగుతుంది.

తాజాగా ఆ సాంగ్ కు కోమటిరెడ్డి వెంకటరెడ్డి... తనతోపాటు సీఎం రేవంత్ రెడ్డి ఫొటోలను జతచేసి సరికొత్తగా క్రియేట్ చేసిన ఒక వీడియో షేర్ చేశారు. తద్వారా రేవంత్ రెడ్డితో తనకు విభేదాలు లేవు సరికదా.. బలమైన స్నేహ బంధం ఉందని చెప్పే ప్రయత్నం చేసినట్లున్నారు! ప్రస్తుతం ఈ వీడియో నెట్టింట వైరల్ గా మారింది. ఏ ఇద్దరు కాంగ్రెస్ శ్రేణులు కలిసినా వారిమధ్య ఈ వీడియో ప్రస్థావనకు వస్తుందని చెప్పినా అతిశయోక్తి కాదన్నట్లుగా వైరల్ అవుతుంది.