భార్య ముద్దు ఒక టానిక్ లాంటిది.. రోజూ వేసుకుంటే ఆయుష్షు గ్యారెంటీ!

ప్రేమ, అనురాగం, ఆప్యాయతలను వ్యక్తీకరించే మార్గాలలో ముద్దు ఒకటి. ఇది కేవలం పెదవుల కలయిక మాత్రమే కాదు. ఇది ఇద్దరి మధ్య బంధాన్ని బలపరిచే ఒక శక్తివంతమైన చర్య. అయితే, ముద్దుకు సంబంధించిన ఒక ఆసక్తికరమైన విషయం తాజాగా వెలుగులోకి వచ్చింది. భార్యలను ప్రేమగా ముద్దుపెట్టుకునే భర్తలు సగటున నాలుగు సంవత్సరాలు ఎక్కువ కాలం జీవిస్తారని శాస్త్రీయంగా నిరూపితమైంది. ఈ విషయాన్ని 1980లో అమెరికన్ మానస్తత్వవేత్త జాన్ గాట్మాన్ అధ్యయనం ద్వారా వెల్లడించారు.

గాట్మాన్ తన పరిశోధనలో అనేక జంటల అలవాట్లు, ప్రవర్తన, వారి ఆరోగ్య పరిస్థితులను దీర్ఘకాలికంగా పరిశీలించారు. ఈ పరిశీలనల ఆధారంగా తమ భార్యలను క్రమం తప్పకుండా ముద్దుపెట్టుకునే భర్తలు, అలా చేయని వారికంటే ఎక్కువ కాలం ఆరోగ్యంగా జీవించారని ఆయన కనుగొన్నారు. ఈ అధ్యయనం అప్పట్లో ప్రపంచవ్యాప్తంగా అనేక మందిని ఆశ్చర్యానికి గురిచేసింది.

తాజాగా, ప్రముఖ అనస్థీషియాలజిస్ట్ డాక్టర్ కునాల్ కూడా ఈ విషయాన్ని సమర్థించారు. ఆయన మాట్లాడుతూ.. "ముద్దు పెట్టుకోవడం అనేది కేవలం ప్రేమను వ్యక్తీకరించే చర్య మాత్రమే కాదు, ఇది శారీరక , మానసిక ఆరోగ్యంపై కూడా సానుకూల ప్రభావాన్ని చూపుతుంది. ముద్దు పెట్టుకున్నప్పుడు శరీరంలో ఒత్తిడిని కలిగించే హార్మోన్లు తగ్గుతాయి. దీనివల్ల రక్తపోటు నియంత్రణలో ఉంటుంది. గుండె సంబంధిత సమస్యలు వచ్చే ప్రమాదం కూడా తగ్గుతుంది" అని ఆయన పేర్కొన్నారు. డాక్టర్ కునాల్ అభిప్రాయం ప్రకారం.. క్రమం తప్పకుండా ముద్దు పెట్టుకోవడం వల్ల కలిగే శారీరక , మానసిక ప్రయోజనాలు మనిషి ఆయుష్షును పెంచడంలో సహాయపడతాయి.

ఈ పరిశోధనలు, వైద్య నిపుణుల అభిప్రాయాలు భార్యాభర్తల మధ్య ప్రేమ, ఆప్యాయతల ప్రాముఖ్యతను మరింతగా నొక్కిచెబుతున్నాయి. ఒకరినొకరు ప్రేమగా స్పర్శించుకోవడం, ముద్దులు పెట్టుకోవడం వంటి చర్యలు కేవలం బంధాన్ని బలపరచడమే కాకుండా, ఆరోగ్యానికి కూడా ఎంతో మేలు చేస్తాయి. ఒత్తిడిని తగ్గించడం, మానసిక స్థితిని మెరుగుపరచడం, రోగనిరోధక శక్తిని పెంచడం వంటి ప్రయోజనాలు కూడా ముద్దు పెట్టుకోవడం వల్ల కలుగుతాయని అనేక అధ్యయనాలు చెబుతున్నాయి.

కాబట్టి, ఇకపై భర్తలందరూ తమ భార్యలకు ప్రేమతో కూడిన ముద్దులను అందించడానికి వెనుకాడకూడదు. ఉదయం నిద్రలేచిన వెంటనే ఒక ముద్దు, ఆఫీస్‌కు వెళ్లే ముందు మరొక ముద్దు, సాయంత్రం ఇంటికి తిరిగి వచ్చిన తర్వాత ఇంకొక ముద్దు.. ఇలా ప్రతి సందర్భంలోనూ ప్రేమను వ్యక్తీకరిస్తూ ముద్దులు పెట్టుకోవడం వల్ల మీ బంధం మరింత బలపడుతుంది. మీ ఆయుష్షు కూడా పెరుగుతుంది.