జగన్ పై ఎంపీ కేశినేని చిన్ని సంచలన ఆరోపణలు!

గత వైఎస్ఆర్ కాంగ్రెస్ పార్టీ హయాంలో జరిగిన మద్యం కుంభకోణం నుంచి ప్రజల దృష్టి మళ్లించేందుకు గత ముఖ్యమంత్రి జగన్ కుట్ర చేస్తున్నారని విజయవాడ తెదేపా ఎంపీ కేశినేని శివనాథ్ (చిన్ని) సంచలన ఆరోపణలు చేశారు.తనపై వస్తున్న ఆరోపణలకు క్లారిటీ ఇచ్చారు. కేశినేని చిన్ని సోదరుడు, మాజీ ఎంపీ కేశినేని నాని మాత్రం అనూహ్యంగా ప్రస్తుత తెదేపా ప్రభుత్వం తీసుకున్న ఓ భూ కేటాయింపుపై అనుమానాలు వ్యక్తం చేస్తూ, దాని వెనుక తన సోదరుడు, ఎంపీ చిన్ని హస్తం ఉందని స్వయంగా ముఖ్యమంత్రి చంద్రబాబు నాయుడుకు ఫిర్యాదు చేయడం రాష్ట్ర రాజకీయాల్లో ముఖ్యంగా తెలుగుదేశం పార్టీలో తీవ్ర కలకలం రేపుతోంది.

- జగన్‌పై ఎంపీ కేశినేని చిన్ని ఆరోపణలు:

వైసీపీ హయాంలో జరిగిన మద్యం కుంభకోణంపై ప్రజల దృష్టి మళ్లించేందుకే జగన్ విదేశీ కంపెనీలు, ప్రవాసాంధ్రులపై అసత్య ప్రచారం చేయిస్తున్నారని ఎంపీ కేశినేని చిన్ని మండిపడ్డారు. పెట్టుబడులు పెట్టే ప్రవాసాంధ్రులకు తెదేపా అండగా ఉంటుందని, వారు నిర్భయంగా పెట్టుబడులు పెట్టవచ్చని భరోసా ఇచ్చారు. వారిపై నిరాధార ఆరోపణలు చేస్తే ఉపేక్షించేది లేదని హెచ్చరించారు. రాజధాని అమరావతికి నిధులు రాకుండా జగన్ బ్యాచ్ ప్రయత్నిస్తోందని, రాష్ట్రానికి, నిరుద్యోగ యువతకు నష్టం చేసే పనులను మానుకోవాలని ఆయన డిమాండ్ చేశారు.

- ఇటీవల కేశినేని నాని సంచలన ఆరోపణలు

విజయవాడ మాజీ ఎంపీ కేశినేని నాని గత ఎన్నికలకు ముందు తెదేపాకు దూరమై వైసీపీలో చేరి, విజయవాడ పార్లమెంట్ స్థానం నుంచి పోటీ చేసి తన సోదరుడు చిన్ని చేతిలో ఓటమి పాలయ్యారు. దీంతో తీవ్ర మనస్తాపానికి గురైన ఆయన రాజకీయాల నుంచి తప్పుకుంటున్నట్లు ప్రకటించారు. అయితే సోషల్ మీడియాలో యాక్టివ్ గా ఉంటూ, ఇటీవల సీఎం చంద్రబాబుకు పుట్టినరోజు శుభాకాంక్షలు తెలిపి, తెదేపా రీఎంట్రీపై ఊహాగానాలకు తావిచ్చారు. ఈ నేపథ్యంలో ఇప్పుడు సొంత తమ్ముడిపైనే, అది కూడా అధికార తెదేపా హయాంలో జరిగిన ఒక కేటాయింపుపై ఆరోపణలు చేయడం సంచలనం రేపింది.

- వైజాగ్ భూ కేటాయింపుపై నాని అభ్యంతరం.. చిన్ని హస్తం ఉందని ఆరోపణ:

రాష్ట్రంలో పెట్టుబడులు పెట్టేందుకు వస్తున్న సంస్థలకు ప్రభుత్వం భూములు కేటాయిస్తున్న ప్రక్రియపై స్పందించిన కేశినేని నాని, టాటా కన్సల్టెన్సీ సర్వీస్ (TCS)కు భూమి కేటాయించడాన్ని స్వాగతించారు. ఇది వేలాది ఉద్యోగాల కల్పనకు దోహదపడుతుందని, రాష్ట్ర అభివృద్ధికి అవసరమని ప్రశంసించారు. చంద్రబాబు దార్శనికతకు ఇది నిదర్శనమని పేర్కొన్నారు. అయితే, విశాఖపట్నంలో ఉర్సా క్లస్టర్ ప్రైవేట్ లిమిటెడ్ అనే సంస్థకు 60 ఎకరాల భూమిని కేటాయించడంపై మాత్రం మాజీ ఎంపీ నాని తీవ్ర అభ్యంతరం వ్యక్తం చేశారు.

విశాఖ ఐటీ పార్కులో 3.5 ఎకరాలు, కాపులుప్పాడలో 56.36 ఎకరాలు కేటాయించారని పేర్కొంటూ, ఈ వ్యవహారం వెనుక అక్రమాలు ఉన్నాయని, దీనిపై సమగ్ర విచారణ జరపాలని డిమాండ్ చేశారు. ఉర్సా క్లస్టర్ సంస్థ ఏర్పాటు అయిన కొన్ని వారాలకే భారీగా భూమి కేటాయించడం, ఆ సంస్థకు ఎలాంటి అనుభవం లేకపోవడం, భారీ ప్రాజెక్టులు అమలు చేయడానికి తగిన నేపథ్యం లేకపోవడంపై ఆయన అనుమానాలు వ్యక్తం చేశారు. ఈ ఐటీ సంస్థ భూ కేటాయింపుల వెనుక తన సోదరుడు, విజయవాడ ఎంపీ కేశినేని చిన్నికి ప్రయోజనం ఉందని నాని సంచలన ఆరోపణ చేశారు. ఉర్సా క్లస్టర్ సంస్థ డైరెక్టర్లలో ఒకరైన అబ్బూరి సతీష్ ఎంపీ చిన్నికి అత్యంత సన్నిహితుడని, కాలేజీలో కలిసి చదువుకున్నారని నాని తెలిపారు.

గతంలో 21st సెంచరీ ఇన్వెస్ట్ మెంట్ మరియు ప్రాపర్టీస్ ప్రైవేట్ లిమిటెడ్ అనే సంస్థలో వీరిద్దరూ భాగస్వాములుగా ఉండేవారని, ఆ సంస్థ ప్రజల నుంచి కోట్లాది రూపాయలు వసూలు చేసి మోసగించిందని ఆరోపణలున్నాయని గుర్తు చేశారు.ఉర్సా క్లస్టర్‌కు భూముల కేటాయింపు వెనుక కేశినేని చిన్ని హస్తం ఉందని, ఎంపీగా, ఆంధ్ర క్రికెట్ అసోసియేషన్ అధ్యక్షుడిగా తన పలుకుబడిని ఉపయోగించి ఈ ఒప్పందాన్ని కుదుర్చుకున్నారని నాని ఆరోపించారు. విజయవాడలోనూ ఎన్నో అక్రమాలతో చిన్నికి సంబంధాలున్నాయని ఆయన సంచలన వ్యాఖ్యలు చేశారు. ఈ మేరకు సీఎం చంద్రబాబుకు నేరుగా లేఖ రాసినట్లు, తన ఫేస్బుక్ అధికారిక అకౌంట్లో ఈ సమాచారాన్ని పోస్ట్ చేసినట్లు తెలిపారు.

మొత్తంగా, ఒకే కుటుంబానికి చెందిన అన్నదమ్ములు, అందులో ఒకరు ప్రస్తుత తెదేపా ఎంపీగా గత ప్రభుత్వంపై ఆరోపణలు చేస్తుండగా, మరొకరు మాజీ ఎంపీగా ఉంటూ ప్రస్తుత ప్రభుత్వ కేటాయింపులపై అనుమానాలు వ్యక్తం చేస్తూ, సొంత తమ్ముడి హస్తం ఉందని ఆరోపిస్తూ ఏకంగా పార్టీ అధినేత, సీఎం చంద్రబాబుకు ఫిర్యాదు చేయడం తెలుగుదేశం పార్టీలో, రాష్ట్ర రాజకీయాల్లో హాట్ టాపిక్‌గా మారింది. ఇప్పుడీ వ్యవహారంలోకి జగన్ ను లాగి టీడీపీ ఎంపీ కేశినేని చిన్ని మరో సంచలనానికి తెరతీశారు.