మీమ్స్.. ట్రోల్స్.. ఎట్టకేలకు స్పందించిన కావ్య పాప

సన్‌రైజర్స్ హైదరాబాద్ (SRH) యజమాని కావ్య మారన్ పేరు దేశవ్యాప్తంగా మారుమోగిపోతోంది. ఇండియన్ ప్రీమియర్ లీగ్ (IPL) సీజన్‌లలో ఆమె ముఖంలో కనిపించే భావోద్వేగాలు, ఆనందం, నిరాశ వంటివి కెమెరాల్లో బంధించబడి సోషల్ మీడియాలో నిత్యం వైరల్ అవుతూ ఉంటాయి. ఆమె తన అరుదైన అందంతో పాటు, ఫ్రాంచైజీపై చూపుతున్న అపారమైన ప్రేమ, నిబద్ధతతో లక్షలాది మంది అభిమానులను సొంతం చేసుకున్నారు.

- మీమ్స్‌పై తొలిసారి స్పందించిన కావ్య

ఇప్పటివరకు తనపై వస్తున్న మీమ్స్, రియాక్షన్ వీడియోలపై ఎప్పుడూ స్పందించని కావ్య మారన్ ఇటీవల ఒక ఇంటర్వ్యూలో వీటిపై తన అభిప్రాయాన్ని పంచుకున్నారు. "మీరు చూసేవన్నీ నా నిజమైన భావోద్వేగాలే. హైదరాబాద్‌లో నేను చేయగలిగేది చాలా తక్కువ. కేవలం కూర్చొని మ్యాచ్ చూడటం తప్ప ఇంకేమీ చేయలేను. అదే నా స్థానం. కానీ చెన్నై, అహ్మదాబాద్‌ల్లో మ్యాచ్‌ల సమయంలో చాలా దూరంగా కూర్చున్నా కూడా కెమెరామెన్లు నన్ను కనుగొంటున్నారు. అది ఎలా మీమ్స్‌గా మారుతుందో నాకు అర్థమవుతోంది" అని నవ్వుతూ తెలిపారు.

SRHపై పట్టు, పట్టుదల

నీతా అంబానీ మాదిరిగానే కావ్య మారన్ కూడా తన జట్టుతో పాటు ప్రతి మ్యాచ్‌కు హాజరవుతారు. గత రెండు సీజన్లుగా సన్‌రైజర్స్ హైదరాబాద్ జట్టును బలంగా తీర్చిదిద్దేందుకు ఆమె నిరంతరం కృషి చేస్తున్నారు. ఆటగాళ్ల ఎంపిక నుంచి జట్టు మేనేజ్‌మెంట్ వరకు, అన్ని విషయాల్లో ఆమెకు పట్టుదల ఉంది."సన్‌రైజర్స్ విషయంలో నేను నా హృదయాన్ని పెట్టాను. మీరు మీ మనసు, ఆత్మను ఎక్కడైనా పెట్టినప్పుడు, దాని విజయాలు, ఓటములను వ్యక్తిగతంగా తీసుకోవడం సహజం" అంటూ తన ఎమోషనల్ కనెక్షన్‌ను ఆమె వివరించారు.

-టైటిల్ లక్ష్యంగా ముందుకు సాగుతున్న SRH

2016లో డేవిడ్ వార్నర్ నాయకత్వంలో టైటిల్ గెలుచుకున్న సన్‌రైజర్స్, ఆ తరువాత 2018, 2024లో ఫైనల్స్‌కు చేరుకుంది. కానీ రెండుసార్లు తృటిలో టైటిల్‌ను చేజార్చుకుంది. ఈసారి మాత్రం రెండో టైటిల్ సాధించాలని కావ్య మారన్ గట్టి సంకల్పంతో ఉన్నారు.

-అభిమానుల హృదయాల్లో చోటు

కావ్య మారన్ రియాక్షన్లే కాదు, ఆమెకు ఉన్న జట్టు మీద ప్రేమ, ఆటగాళ్ల మీద ఆదరణ ఆమెను అభిమానుల మనసుల్లో ప్రత్యేక స్థానాన్ని కల్పించాయి. ఐపీఎల్‌లో ఇప్పటివరకు ఒక యజమాని ఈ స్థాయిలో వైరల్ కావడం సాధారణ విషయం కాదు. వచ్చే సీజన్‌లో సన్‌రైజర్స్ తమ లక్ష్యాన్ని సాధిస్తుందా? కావ్య కల నెరవేరుతుందా? అన్నది అభిమానులు ఆసక్తిగా ఎదురు చూస్తున్నారు.