కేసీఆరే నా నాయకుడు.. కేటీఆర్ ను కవిత టార్గెట్ చేసిందా?

కొద్దిరోజులుగా తెలంగాణ రాజకీయాల్లో బీఆర్ఎస్ ఎమ్మెల్సీ కల్వకుంట్ల కవిత వార్తల్లో నిలుస్తున్నారు. తాజాగా ఆమె చేసినట్లుగా కొన్ని మీడియా సంస్థల్లో వస్తున్న బ్రేకింగ్ న్యూస్‌లు సంచలనం సృష్టిస్తున్నాయి. ఈ వార్తల ప్రకారం.., కవిత బీఆర్ఎస్ పై తీవ్ర ఆరోపణలు చేసినట్లు, పార్టీలో కేసీఆర్ మినహా తనకు ఎవరూ నాయకులు కారని స్పష్టం చేసినట్లు తెలుస్తోంది. దీన్ని బట్టి కవిత పరోక్షంగా తన అన్న.. పార్టీ వర్కింగ్ ప్రెసిడెంట్ కేటీఆర్ ను టార్గెట్ చేసినట్టుగా విశ్లేషఖలు, మీడియా అభివర్ణిస్తోంది.

- కేటీఆర్‌పై కవిత సంచలన వ్యాఖ్యలు?

కొన్ని ప్రముఖ మీడియా సంస్థలు కల్వకుంట్ల కవిత సంచలన వ్యాఖ్యలు చేశారని బ్రేకింగ్ న్యూస్‌లను ప్రసారం చేస్తున్నాయి. తన తండ్రి కేసీఆర్‌కు గత 25 సంవత్సరాలుగా లేఖలు రాస్తున్నానని, వాటిని ఆయన చదివి చించి పారేసేవారని, కానీ ఈసారి ఎవరో ఆ లేఖలను బయటకు లీక్ చేశారని కవిత అన్నట్లుగా వార్తలు వస్తున్నాయి. ముఖ్యంగా, పార్టీలో నంబర్ 2గా కొనసాగుతున్న తన సోదరుడు కేటీఆర్‌ను ఉద్దేశించి కవిత విమర్శలు చేశారని కొన్ని న్యూస్ ఛానెల్స్ బ్రేకింగ్ వార్తలను ప్రసారం చేస్తున్నాయి.

- కవిత చేసినట్లుగా ప్రచారంలో ఉన్న వ్యాఖ్యలు:

"పార్టీలో నాకు కేసీఆర్ తప్ప ఇంకెవరూ నాయకుడు లేరు. కేసీఆర్ లాగే నేను కూడా తిక్కలదాన్ని. ఎవరికి భయపడాల్సిన అవసరం లేదు. 25 సంవత్సరాలుగా నా తండ్రికి నేను లేఖలు రాస్తున్నాను. వాటిని ఆయన చదివి చించి పారేస్తారు. కానీ ఈసారి నేను రాసిన లేఖలను కావాలని బయటికి విడుదల చేశారు. నాకు ఒక విషయం చెప్పాలి. పార్టీలో ఉన్న వ్యక్తులలో ఎవరు ఆ లేఖను బయటికి బహిర్గతం చేశారు? ఆ విషయం నాకు తెలియాలి. ఆ వ్యక్తి ఎవరో బయటపడాలి. నా లెటర్ బయట పెట్టింది ఎవరో చెప్పాలని అడిగితే.. లీకు వీరులు ఎవరో చెప్పాలని అడిగితే.. గ్రీకువీరులు బయటికి వచ్చారు. కావాలని నన్ను ఇబ్బంది పెడుతున్నారు. నన్ను ఆకారణంగా లిక్కర్ స్కామ్‌లో అరెస్టు చేశారు. ఆ సమయంలోనే పార్టీ నుంచి వెళ్ళిపోతానని చెప్పాను. ఎమ్మెల్సీ పదవి నుంచి తప్పుకుంటానని స్పష్టం చేశాను. నాడు దీనికి తండ్రి కేసీఆర్ ఒప్పుకోలేదు. నన్ను ఇబ్బంది పెట్టడానికి నిన్ను అరెస్ట్ చేశారని ఆయన నాతో వ్యాఖ్యానించారు. ఇంటి ఆడబిడ్డను ఇలా ఇబ్బంది పెడితే మీకు ఏమొస్తుంది? పెయిడ్ ఆర్టిస్టులతో ప్రచారం చేస్తే నీకు కలిగే ప్రయోజనం ఏంటి? భారత రాష్ట్ర సమితిని భారతీయ జనతా పార్టీలో కలపడానికి తెర వెనుక ప్రయత్నాలు జరుగుతున్నాయి. కుట్రలు వేగంగా సాగిపోతున్నాయి." అని కవిత వ్యాఖ్యానించినట్లు కొన్ని మీడియా సంస్థలు కథనాలను ప్రసారం చేస్తున్నాయి.

- వాస్తవం ఎంత?

అయితే, కవిత ఈ వ్యాఖ్యలు చేశారా లేదా అనే విషయాలను పరిశీలించేందుకు ఆమె అధికారిక సోషల్ మీడియా ఖాతాలను పరిశీలించగా, అందులో ఎటువంటి విషయాలు లేవు. కొన్ని ఛానెల్స్ మాత్రం కవిత వ్యాఖ్యలు చేశారన్నట్టుగా బ్రేకింగ్ న్యూస్ టెలికాస్ట్ చేస్తున్నాయి.

- తెలంగాణ రాజకీయాల్లో కవిత వ్యవహారం హాట్ టాపిక్

కొద్దిరోజులుగా భారత రాష్ట్ర సమితి ఎమ్మెల్సీ సెంటర్ పాయింట్‌గా తెలంగాణ పాలిటిక్స్ నడుస్తున్నాయి. కొన్ని మీడియా సంస్థలు తెలంగాణలో ప్రస్తుతం అధికారంలో ఉన్న పార్టీలోకి కవిత వెళ్లిపోతారని న్యూస్ స్ప్రెడ్ చేస్తున్నాయి. దీనికి బీఆర్ఎస్ నుంచి ఎటువంటి కౌంటర్ రావడం లేదు. అయితే కవిత మాత్రం కొన్ని మీడియా సంస్థలకు లీకులు ఇచ్చి బ్రేకింగ్ న్యూస్ టెలికాస్ట్ అయ్యేలా చేస్తున్నారని ప్రచారం జరుగుతోంది. మొత్తానికి తెలంగాణలో కల్వకుంట్ల కవితకు సంబంధించిన న్యూస్‌లు సంచలనం సృష్టిస్తున్నాయి. మరి దీనిపై బీఆర్ఎస్ అధిష్టానం ఎలా స్పందిస్తుందో చూడాలి.