విపత్తులో అవకాశం.. కరాచీలో భూకంపం.. జైలు నుంచి ఖైదీలు 216మంది మాయం!

సాధారణంగా భూకంపాలు ప్రజలకు పెను విపత్తును తీసుకొస్తాయి. ఎందరో నిరాశ్రయులవుతారు, నగరాల మౌలిక సదుపాయాలకు తీవ్ర నష్టం వాటిల్లుతుంది. కానీ, పాకిస్తాన్‌లోని కరాచీలో (Karachi) సంభవించిన భూకంపం (earthquake) అక్కడి ఖైదీలకు (prisoners) ఒక అద్భుతమైన అవకాశాన్ని కల్పించింది. భూకంపం కారణంగా జైలు గోడలకు బీటలు వారడంతో, ఖైదీలు ఆ స్థితిని తమకు అనుకూలంగా మార్చుకొని జైలు నుంచి పెద్ద సంఖ్యలో పారిపోయారు. ఈ ఘటన ఇప్పుడు దేశవ్యాప్తంగా సంచలనం సృష్టిస్తోంది.

మాలిర్ జైలులో కలకలం

అధికారుల తెలిపిన ప్రకారం.. కరాచీలో భూకంపం సంభవించిన సమయంలో మాలిర్ జైలు (Malir Jail) గోడలకు పెద్ద పెద్ద బీటలు వచ్చాయి. ఈ బీటలను ఉపయోగించుకొని చాలా మంది ఖైదీలు దెబ్బతిన్న నిర్మాణాలను ఛేదించుకుని పారిపోయారు. కరాచీ డీఐజీ మహమ్మద్ హసన్ సెహతో (DIG Mohammad Hassan Sehto) తెలిపిన వివరాల ప్రకారం.. భూకంపం కారణంగా అనేక మంది ఖైదీలు తమ బ్యారక్‌ల (barracks) నుండి బయటకొచ్చి, జైలు గేట్‌ను పగలగొట్టి, జైలు సిబ్బందిపై దాడి చేశారు. ఖైదీలు జైలు అధికారుల నుంచి ఆయుధాలను లాక్కున్నారు. ఆ తర్వాత పోలీసులు, ఖైదీల మధ్య కాల్పులు జరిగాయని, ఈ క్రమంలో చాలా మంది ఖైదీలు జైలు నుంచి బయటపడ్డారని సమాచారం. కాల్పుల సమయంలో ఒక ఖైదీ గాయపడినట్లు జైలు సూపరింటెండెంట్ అర్షద్ హుస్సేన్ (Arshad Hussain) ధృవీకరించారు.

20 మందికి పైగా ఖైదీల అరెస్ట్

జైలు నుంచి పారిపోయిన ఖైదీల కోసం పోలీసులు విస్తృత గాలింపు చర్యలు చేపట్టారు. కరాచీలోని లాంధీ జైలు (Landhi Jail) నుంచి పారిపోయిన ఖైదీల కోసం పోలీసులు మొత్తం ప్రాంతంలో చెక్‌పోస్టులను ఏర్పాటు చేసి గాలింపును ముమ్మరం చేశారు. ఖుజాఫీ టౌన్, షా లతీఫ్, మరియు బైన్శ్ కాలనీ వంటి ప్రాంతాల నుండి 20 మందికి పైగా పారిపోయిన ఖైదీలను పోలీసులు తిరిగి అరెస్ట్ చేశారు. జైలు వెలుపల రేంజర్‌లను మోహరించారు. చుట్టుపక్కల ప్రాంతాల్లో తనిఖీలు కొనసాగుతున్నాయి.

24 గంటల్లో 10వ సారి

ఈ సంఘటన కరాచీలో 24 గంటల్లో సంభవించిన పదవ భూకంపం తర్వాత జరిగింది. రాత్రి 11:16 గంటలకు లాంధీ, షేర్‌పావో, కాయదాబాద్ వంటి ప్రాంతాల్లో 2.4 తీవ్రతతో భూకంపం నమోదైంది. వాతావరణ శాఖ (Meteorological Department) ప్రకారం.. కిర్తర్ ఫాల్ట్ లైన్ (Kirthar Fault Line) కు దగ్గరగా ఉండడం వల్ల ఈ ప్రాంతంలో చిన్నపాటి భూకంపాలు రావడం సాధారణం. అయితే, ఇంత తీవ్రంగా జైలు భవనం ప్రభావితం కావడం ఆందోళన కలిగిస్తోంది.

మంత్రి స్పందన

సింధ్ జైళ్ల మంత్రి అలీ హసన్ జర్దారీ (Ali Hassan Zardari) ఈ ఘటనపై తీవ్రంగా స్పందించారు. ఆయన జైళ్ల ఇన్‌స్పెక్టర్ జనరల్ (Inspector General of Prisons), డిప్యూటీ ఇన్‌స్పెక్టర్ జనరల్ (Deputy Inspector General) ల నుంచి నివేదిక కోరారు. పారిపోయిన ఏ ఖైదీనీ వదిలిపెట్టకూడదని ఆదేశించారు. ఈ మొత్తం వ్యవహారంలో ఏదైనా అధికారి నిర్లక్ష్యం ఉందా లేదా అని విచారణలో తేలుతుందని ఆయన స్పష్టం చేశారు. ఈ ఘటన జైళ్ల భద్రత, నిర్వహణపై తీవ్రమైన ప్రశ్నలను లేవనెత్తుతోంది.