గూగుల్ అలర్ట్‌తో వెలుగులోకి షాకింగ్ నేరం.. కుటుంబ సభ్యుల బాత్‌రూమ్ వీడియోలు తీసిన వ్యక్తి అరెస్ట్

సాంకేతికత ఎంత వేగంగా విస్తరిస్తోందో.. కొందరు దానిని అంతకంటే ఘోరంగా వాడుకుంటున్నారు. సొంత రక్త సంబంధీకులు, కుటుంబ సభ్యులు అనే తేడా లేకుండా కన్నవాళ్ల గోప్యతకే భంగం కలిగించిన ఒక దారుణమైన ఘటన ఉత్తరప్రదేశ్‌లోని కాన్పూర్‌లో వెలుగులోకి వచ్చింది. ఇంట్లోని బాత్‌రూమ్‌లో రహస్య కెమెరాలు అమర్చి, కుటుంబ సభ్యుల అసభ్యకర వీడియోలు చిత్రీకరించిన ఒక వ్యక్తిని కాన్పూర్ పోలీసులు శనివారం అరెస్ట్ చేశారు. గూగుల్ పంపిన ఒక అప్రమత్తత సందేశం ఆధారంగా ఈ ఘోరమైన నేరం బయటపడటం స్థానికంగా తీవ్ర సంచలనం సృష్టిస్తోంది.

అసలు ఏం జరిగిందంటే..?

పోలీసులు తెలిపిన వివరాల ప్రకారం.. కాన్పూర్‌కు చెందిన నిందితుడు వికృత చేష్టలకు పాల్పడ్డాడు. తన ఇంట్లోని బాత్‌రూమ్‌లో ఎవరికీ అనుమానం రాకుండా రహస్య కెమెరాలను అమర్చాడు. వాటి ద్వారా తన సొంత కుటుంబ సభ్యుల వ్యక్తిగత, రహస్య క్షణాలను దొంగతనంగా రికార్డు చేశాడు. అంతటితో ఆగకుండా ఆ అసభ్యకర వీడియోలన్నింటినీ తన వ్యక్తిగత గూగుల్ డ్రైవ్ ఖాతాలో భద్రపరిచాడు.

అయితే గూగుల్ సంస్థ తన క్లౌడ్ స్టోరేజ్ ప్లాట్‌ఫారమ్‌లలో అప్‌లోడ్ అయ్యే కంటెంట్‌ను నిరంతరం పర్యవేక్షిస్తుంది. ఈ క్రమంలో నిందితుడి గూగుల్ డ్రైవ్ ఖాతాలోకి అప్‌లోడ్ అయిన వీడియోలను గూగుల్ యొక్క సెక్యూరిటీ సిస్టమ్స్ "అనుమానాస్పద , అశ్లీల కంటెంట్" గా గుర్తించాయి. గూగుల్ నిబంధనల ప్రకారం ఇటువంటి కంటెంట్‌ను అనుమతించకపోవడమే కాకుండా వెంటనే ఉన్నతాధికారులకు సమాచారం అందిస్తారు.

ఐపీ అడ్రెస్‌తో దొరికిపోయిన నిందితుడు

గూగుల్ సిస్టమ్స్ గుర్తించిన ఈ నిషిద్ధ సమాచారం వెంటనే భారతదేశానికి చెందిన జాతీయ సైబర్ క్రైమ్ రిపోర్టింగ్ పోర్టల్ కు చేరింది. కేంద్ర సైబర్ వింగ్ అధికారులు ఈ సమాచారాన్ని కాన్పూర్ పోలీసులకు బదిలీ చేశారు.

రంగంలోకి దిగిన కాన్పూర్ సైబర్ సెల్ పోలీసులు సాంకేతిక ఆధారాలను నిశితంగా పరిశీలించారు. సదరు గూగుల్ డ్రైవ్ ఖాతా ఏ ఇంటర్నెట్ కనెక్షన్ ద్వారా రన్ అవుతుందో తెలుసుకోవడానికి ఐపీ అడ్రెస్ ను ట్రేస్ చేశారు. ఆ లొకేషన్ ఆధారంగా నిందితుడి ఇంటిపై దాడి చేసి, అతడిని అదుపులోకి తీసుకున్నారు.

నిందితుడి వద్ద ఉన్న మొబైల్ ఫోన్లు, లాప్‌టాప్, మెమొరీ కార్డ్‌లు, బాత్‌రూమ్‌లో అమర్చిన రహస్య కెమెరాల వంటి ఎలక్ట్రానిక్ పరికరాలను పోలీసులు స్వాధీనం చేసుకున్నారు. డేటాను డిలీట్ చేసినా రికవరీ చేసేందుకు వీలుగా వీటిని ఫోరెన్సిక్ ల్యాబ్‌కు పంపించారు.

సైబర్ నిపుణులు, పోలీసుల హెచ్చరిక

ఈ ఘటన డిజిటల్ యుగంలో వ్యక్తిగత గోప్యత కు ఎంతటి ముప్పు పొంచి ఉందో మరోసారి నిరూపించింది. సొంత ఇళ్లలోనే కాకుండా హోటళ్లు, మాల్స్ లోని చేంజింగ్ రూమ్‌లలో కూడా అప్రమత్తంగా ఉండాలని నిపుణులు సూచిస్తున్నారు. ఇలాంటి వికృత చేష్టలకు పాల్పడితే చట్టపరంగా కఠిన శిక్షలు తప్పవని పోలీసులు హెచ్చరించారు. ఐటీ చట్టంలోని కఠినమైన సెక్షన్ల కింద నిందితుడిపై కేసు నమోదు చేసి దర్యాప్తును ముమ్మరం చేశారు.

మీ గోప్యతకు భంగం కలిగించేలా ఎవరైనా ప్రవర్తించినా.. లేదా బ్లాక్‌మెయిల్ చేసినా భయపడకుండా వెంటనే స్థానిక పోలీసులను ఆశ్రయించాలి. లేదా కేంద్ర ప్రభుత్వ అధికారిక వెబ్‌సైట్ www.cybercrime.gov.in ద్వారా ఆన్‌లైన్‌లో సురక్షితంగా ఫిర్యాదు చేయవచ్చని అధికారులు స్పష్టం చేశారు.