కాళేశ్వరం కేసులో కేసీఆర్, హరీశ్‌కు ఊరట.. పీసీ ఘోష్ రిపోర్ట్‌ సరిగా లేదని వ్యాఖ్య..

కాళేశ్వరం ప్రాజెక్టు వివాదంలో చిక్కుకున్న మాజీ సీఎం కేసీఆర్, హరీశ్ రావుకు ఏప్రిల్ 22, 2026న తెలంగాణ హైకోర్టు ఇచ్చిన తీర్పు ఊపిరి పీల్చుకునే పరిణామం. రాజకీయంగా, న్యాయపరంగా తీవ్ర ఉత్కంఠ రేపిన ఈ కేసులో హైకోర్టు కీలక వ్యాఖ్యలు చేస్తూ పీసీ ఘోష్ కమిషన్ నివేదికపై స్టే విధించడం సంచలనంగా మారింది. తెలంగాణ రాజకీయాలను కుదిపేస్తున్న కాళేశ్వరం ప్రాజెక్టు అవకతవకల కేసులో కీలక మలుపు చోటుచేసుకుంది. జస్టిస్ పీసీ ఘోష్ కమిషన్ ఇచ్చిన నివేదిక ఆధారంగా కేసీఆర్, హరీశ్ రావు ఇతర అధికారులపై ఎటువంటి చర్యలు తీసుకోవద్దని తెలంగాణ హైకోర్టు మధ్యంతర ఉత్తర్వులు జారీ చేసింది. కమిషన్ తన విచారణలో సహజ న్యాయ సూత్రాలను పాటించలేదని, నిందితులకు తమ వాదన వినిపించుకునే సరైన అవకాశం ఇవ్వలేదని ధర్మాసనం అభిప్రాయపడింది.

పీసీ ఘోష్ కమిషన్..

2024లో అధికారంలోకి వచ్చిన రేవంత్ రెడ్డి ప్రభుత్వం, కాళేశ్వరం ప్రాజెక్టులో (ముఖ్యంగా మేడిగడ్డ, అన్నారం, సుందిళ్ల బ్యారేజీలు) జరిగిన అక్రమాలను విచారించేందుకు సుప్రీంకోర్టు మాజీ న్యాయమూర్తి జస్టిస్ పీసీ ఘోష్ నేతృత్వంలో విచారణ కమిషన్‌ను ఏర్పాటు చేసింది. 2025, జూలై 31న కమిషన్ తన 665 పేజీల నివేదికను ప్రభుత్వానికి సమర్పించింది. ఇందులో ప్లానింగ్, డిజైన్, ఎగ్జిక్యూషన్ దశల్లో వైఫల్యాలు ఉన్నాయని పేర్కొంటూ.. కేసీఆర్, హరీశ్ రావును బాధ్యులుగా చేస్తూ అభియోగాలు మోపింది. ఈ నివేదికను సవాల్ చేస్తూ కేసీఆర్, హరీశ్ రావు, సీనియర్ ఐఏఎస్ అధికారులు స్మితా సబర్వాల్, ఎస్.కే జోషి హైకోర్టును ఆశ్రయించారు. కమిషన్ పక్షపాత ధోరణితో వ్యవహరించిందని వారు వాదించారు.

హైకోర్టు తీర్పులో ముఖ్యాంశాలు

చీఫ్ జస్టిస్ అలోక్ అరాధే నేతృత్వంలోని బెంచ్ సుదీర్ఘ వాదనల తర్వాత నేడు తన తీర్పును వెలువరించింది. జస్టిస్ పీసీ ఘోష్ నివేదిక ఆధారంగా పిటిషనర్లపై ఎటువంటి క్రిమినల్ లేదా అడ్మినిస్ట్రేటివ్ చర్యలు తీసుకోవద్దని కోర్టు స్పష్టం చేసింది. కమిషన్ విచారణ జరిపేటప్పుడు చట్టబద్ధమైన నియమ నిబంధనలను పాటించలేదని కోర్టు తప్పుబట్టింది. ఆరోపణలు ఎదుర్కొంటున్న వారికి తమ సంజాయిషీ ఇచ్చుకునే అవకాశం ఇవ్వకుండానే నివేదికను సిద్ధం చేయడం సరికాదని పేర్కొంది. అయితే, ప్రభుత్వం ఒక ప్రాజెక్టుపై విచారణ కమిషన్ ఏర్పాటు చేయడం చట్టబద్ధమేనని కోర్టు అంగీకరించింది. కమిషన్ ఉనికిని కోర్టు ప్రశ్నించలేదు కానీ, దాని విచారణా విధానాన్ని తప్పుబట్టింది.

బీఆర్ఎస్ శ్రేణుల్లో ఉత్సాహం

ఈ తీర్పు వెలువడగానే బీఆర్ఎస్ శ్రేణులు హర్షం మొదలైంది. కాళేశ్వరం పేరుతో ప్రభుత్వం రాజకీయ వేధింపులకు పాల్పడుతోందని, నేడు న్యాయం గెలిచిందని హరీశ్ రావు వ్యాఖ్యానించారు. విచారణలో లొసుగులు ఉన్నాయని మొదటి నుంచి వాదిస్తున్న బీఆర్ఎస్ నాయకులకు ఈ తీర్పు పెద్ద నైతిక విజయాన్ని అందించింది.

ప్రభుత్వానికి ఎదురుదెబ్బ..

రేవంత్ రెడ్డి ప్రభుత్వం ఈ నివేదిక ఆధారంగా భారీ స్థాయిలో చర్యలు తీసుకోవాలని భావించింది. కోర్టు తీర్పు నేపథ్యంలో ప్రభుత్వం ఇప్పుడు సుప్రీంకోర్టుకు వెళ్తుందా? లేదా లోపాలను సరిదిద్దుకుని మళ్లీ విచారణ జరిపిస్తుందా? అనేది ఆసక్తికరంగా మారింది. విచారణ కమిషన్ పద్ధతిని కోర్టు తప్పుబట్టడం వల్ల, భవిష్యత్తులో ప్రభుత్వం చేసే ఇతర విచారణలపై దీని ప్రభావం ఉండే అవకాశం ఉంది.

హైకోర్టు తీర్పు కేసీఆర్, హరీశ్ రావుకు తక్షణ ఊరటనిచ్చినప్పటికీ, కాళేశ్వరం వివాదం పూర్తిగా ముగిసిపోలేదు. ప్రాజెక్టు నిర్మాణంలో లోపాలు జరిగాయన్నది సాంకేతిక నిపుణుల కమిటీ కూడా గతంలోనే ధ్రువీకరించింది. కాబట్టి, ప్రభుత్వం చట్టపరమైన లోపాలు లేకుండా మళ్లీ విచారణను వేగవంతం చేసే అవకాశం ఉంది. ఏది ఏమైనా, జగిత్యాల సభకు ముందు కేసీఆర్ గారికి దక్కిన ఈ ‘న్యాయ విజయం’ రాజకీయంగా ఆయనకు పెద్ద అడ్వాంటేజ్ అని చెప్పవచ్చు.