వెనిస్‌ దద్దరిల్లేలా పెళ్లి చేసుకున్న జెఫ్ బెజోస్.. వైరల్ పిక్స్

ప్రపంచ కుబేరులలో ఒకరైన అమెజాన్ వ్యవస్థాపకుడు జెఫ్ బెజోస్, తన చిరకాల ప్రియురాలు లారెన్ శాంచెజ్‌ను వివాహం చేసుకున్నారు. ఇటలీలోని రమణీయమైన వెనిస్ నగరంలోని లాగూన్ దీవిలో జూన్ 21 శుక్రవారం న ఈ వివాహ వేడుక అట్టహాసంగా జరిగింది.

-వేడుకలో ప్రముఖుల సందడి

ఈ వివాహ వేడుకకు అమెరికా, యూరప్ సహా ప్రపంచ నలుమూలల నుండి పలువురు ప్రముఖులు హాజరయ్యారు. అమెరికా అధ్యక్షుడు డొనాల్డ్ ట్రంప్ కుమార్తె ఇవాంకా ట్రంప్, ఆమె భర్త జారెడ్ కుష్నెర్, టీవీ ప్రముఖురాలు ఓప్రా విన్‌ఫ్రే, సెలబ్రిటీలు కిమ్ కర్దాషియాన్, ఖ్లో కర్దాషియాన్, జోర్డాన్ రాణి రానియా వంటి ఎందరో ప్రముఖులు ఈ వేడుకకు హాజరై నూతన వధూవరులకు శుభాకాంక్షలు తెలిపారు.

-లారెన్ శాంచెజ్ – బెజోస్ ప్రేమకథ

లారెన్, బెజోస్ సుమారు 2018 నుండి ప్రేమలో ఉన్నారు. ఈ విషయం 2019లో వెలుగులోకి వచ్చింది. అదే ఏడాది బెజోస్ తన మొదటి భార్య మెకంజీ స్కాట్‌తో విడాకులు తీసుకున్నారు. 25 ఏళ్ల పాటు కలిసి ఉన్న ఈ జంటకు నలుగురు పిల్లలు ఉన్నారు. 2023లో బెజోస్–లారెన్ నిశ్చితార్థం చేసుకున్నారు. అప్పట్లో బెజోస్ ఆమెకు 2.5 మిలియన్ డాలర్ల విలువైన వజ్రపు ఉంగరం బహుకరించినట్లు వార్తలు వచ్చాయి.

- లారెన్ నుండి ప్రత్యేక గిఫ్ట్

లారెన్ శాంచెజ్ తన ఇన్‌స్టాగ్రామ్ ఖాతాలో పెళ్లి ఫోటోను పంచుకున్నారు. అంతేకాదు, ఆమె తన సోషల్ మీడియా ఖాతా పేరును లారెన్ శాంచెజ్ బెజోస్ గా మార్చుకున్నారు. గతంలోని అన్ని పోస్టులను డిలీట్ చేసి, కేవలం పెళ్లి వేడుకకు సంబంధించిన రెండు పోస్టులను మాత్రమే ఉంచారు. ఇది వారి బంధానికి సంబంధించి కొత్త ఆరంభానికి సంకేతంగా నెటిజన్లు భావిస్తున్నారు.

పూర్వం జర్నలిస్టుగా కెరీర్ ప్రారంభించిన లారెన్ శాంచెజ్ ప్రస్తుతం దాతృత్వ కార్యక్రమాల్లో చురుగ్గా పాల్గొంటున్నారు. బెజోస్‌తో కలిసి భవిష్యత్తులో సామాజిక సేవ, అంతరిక్ష పరిశోధన రంగాల్లో మరిన్ని ప్రాజెక్టులకు నడుం కట్టే అవకాశముంది.

ఈ అట్టహాసమైన పెళ్లి వేడుక మరోసారి ప్రపంచవ్యాప్తంగా జెఫ్ బెజోస్ జీవితం పట్ల ఆసక్తిని రేకెత్తించింది. ప్రేమ, కుటుంబం, దాతృత్వం... అన్నిటికీ సమతుల్యత చూపిస్తున్న ఈ కొత్త జంటకు ప్రపంచం నిండా శుభాకాంక్షలు వెల్లువెత్తుతున్నాయి.