జనసేనకు తెలంగాణలో తొలి జాడ.. చిన్న విజయం, పెద్ద సందేశం

తెలంగాణ రాజకీయ రంగస్థలంపై కొత్త అధ్యాయం మొదలైంది. ఆంధ్రప్రదేశ్‌లో బలమైన గుర్తింపు సాధించిన పవన్ కళ్యాణ్ నేతృత్వంలోని జనసేన పార్టీకి తెలంగాణ గడ్డపై తొలి ఎన్నికల విజయం దక్కింది. సంఖ్యల పరంగా అది పెద్ద విజయమేమీ కాకపోవచ్చు. కానీ రాజకీయంగా అది ఒక సంకేతం. ఒక ఆరంభం.

రెండు స్థానాలు జనసేనకు..

తెలంగాణలో మొత్తం 2,998 స్థానాలున్న మున్సిపాలిటీలు, కార్పొరేషన్లలో జనసేన కేవలం 332 చోట్లే పోటీ చేసింది. ఆ పోటీలో ఒక కౌన్సిలర్‌, ఒక కార్పొరేటర్ స్థానాన్ని గెలుచుకోవడం పార్టీకి గణాంకాల కంటే భావోద్వేగపూరితమైన ఘట్టం. నేరేడుచర్ల మున్సిపాలిటీలో విజయలక్ష్మి గెలవగా, మంచిర్యాల కార్పొరేషన్‌లో సాగర్ విజయం సాధించారు. ఈ రెండు స్థానాలు ఇప్పుడు జనసేనకు తెలంగాణలో తొలి అడుగులుగా నిలిచాయి.

‘పార్టీ విజయ ప్రయాణం ఒక్క అడుగులతోనే మొదలవుతుంది’ అంటూ పవన్ కళ్యాణ్ చేసిన ట్వీట్‌లో రాజకీయ పాఠం దాగి ఉంది. ఒక పార్టీ తన బలం ఎక్కడుందో తెలుసుకోవడం ఎంత ముఖ్యమో, ఎక్కడ మొదలుపెట్టాలో నిర్ణయించుకోవడం అంతకంటే ముఖ్యమని ఆయన సూచించినట్టుంది. పెద్ద పెద్ద సభలు, భారీ హామీలు కంటే, ఒక స్థానిక సంస్థలో గెలుపు రాజకీయంగా పునాది వేయగలదన్న భావన ఇందులో కనిపిస్తోంది.

తెలంగాణలో గెలవడం సులువైన విషయం కాదు..

తెలంగాణ రాజకీయాల్లో ఇప్పటికే బలమైన ప్రాంతీయ, జాతీయ పార్టీల మధ్య పోటీ తీవ్రంగా ఉంది. అలాంటి పరిస్థితుల్లో ఒక కొత్త పార్టీకి స్థానం సంపాదించుకోవడం సులువు కాదు. ముఖ్యంగా స్థానిక ఎన్నికల్లో వ్యక్తిగత ప్రభావం, కుల సమీకరణాలు, అభివృద్ధి హామీలు అన్నీ కలిసి ఒక సంక్లిష్ట సమీకరణంగా మారుతాయి. ఆ సమీకరణంలో జనసేనకు రెండు విజయాలు దక్కడం యాదృచ్ఛికం కాదు. అది ఒక ప్రయత్నానికి వచ్చిన ప్రతిఫలం.

అయితే ఈ విజయాన్ని అతిశయంగా చూడాల్సిన అవసరం లేదు. తక్కువగా అంచనా వేయడం సరైంది కాదు. రాజకీయాల్లో ప్రతి అడుగు ఒక సందేశమే. తెలంగాణలో జనసేనకు ఉన్న మద్దతు పరిమితమైనదే కావచ్చు. కానీ ఆ పరిమితిని విస్తరించాలంటే స్థానిక స్థాయిలో పని చేయడం తప్ప మరో మార్గం లేదు. ఇప్పుడు గెలిచిన ప్రతినిధుల పనితీరు, ప్రజలతో మమేకం కావడం, అభివృద్ధి అంశాల్లో చురుకుదనం చూపడం.. ఇవే భవిష్యత్తు దిశను నిర్ణయిస్తాయి.

ఇది పార్టీకి ప్రత్యేక సందర్భం..

తెలంగాణలో జనసేన పుట్టుకే ఒక ప్రత్యేక సందర్భం. కానీ ఇప్పటి వరకు ఆ పార్టీకి ఇక్కడ స్పష్టమైన రాజకీయ పరిణతి కనిపించలేదు. ఈ రెండు విజయాలు ఆ ఆకృతికి మొదటి గీతలు గీసినట్టుగా చెప్పవచ్చు. ఒక కౌన్సిలర్‌, ఒక కార్పొరేటర్ స్థానాలు సంఖ్యలో చిన్నవే. కానీ రాజకీయంగా అవి పెద్ద సందేశం ఇస్తున్నాయి. ఒక పార్టీ తన ఉనికిని చాటుకునే తొలి ముద్రలు.

పవన్ కళ్యాణ్‌కు ఇప్పుడు ఎదురున్న ప్రశ్న ఒక్కటే.. ఈ చిన్న అడుగును ఎలా పెద్ద ప్రయాణంగా మార్చాలి? అని తెలంగాణలో పార్టీని సంస్థాగతంగా బలోపేతం చేయగలరా? స్థానిక సమస్యలపై స్పష్టమైన వైఖరి తీసుకోగలరా? లేక ఈ విజయం కూడా ఒక వార్తగా ముగిసిపోతుందా?

తెలంగాణ గడ్డపై జనసేన వేసిన ఈ తొలి అడుగు ఎంత దూరం నడుస్తుందో కాలమే నిర్ణయించాలి. కానీ ఒక విషయం మాత్రం స్పష్టం రాజకీయాల్లో స్థిరత్వం సాధించాలంటే, సంఖ్యల కంటే సహనం, వ్యూహం, ప్రజలతో అనుబంధం ముఖ్యం. ఇప్పుడు జనసేన ఆ పరీక్ష ఎదుర్కొంటోంది.