మీకు ఉక్రెయిన్ కనిపిస్తే.. మాకు పాకిస్తాన్ కనిపిస్తోంది: జైశంకర్ సంచలన వ్యాఖ్యలు

భారత విదేశాంగ మంత్రి ఎస్. జైశంకర్ జర్మనీకి చెందిన ప్రముఖ పత్రిక ‘ఫ్రాంక్ ఫుర్టర్ అల్గేమినీ జ్యూటింగ్’ కు ఇచ్చిన ఇంటర్వ్యూలో భారత దృక్పథం, భద్రతా ఆందోళనలు, ప్రపంచ రాజకీయాలపై స్పష్టమైన వ్యాఖ్యలు చేశారు. "మీరు సంఘర్షణ గురించి ఆలోచించినప్పుడు ఉక్రెయిన్‌ను చూస్తారు. కానీ నేను ఆలోచించినప్పుడు పాకిస్తాన్, ఉగ్రవాదం, చైనా, మా సరిహద్దు గురించి ఆలోచిస్తాను" అంటూ యూరప్ - భారత దృక్కోణాలు ఎలా భిన్నంగా ఉన్నాయో వివరించారు.

-అణు యుద్ధ భయం న్యాయమైనదేనా?

భారత-పాకిస్తాన్ సంబంధాలలో అణు యుద్ధం ప్రమాదం ఉందా అనే ప్రశ్నకు స్పందించిన జైశంకర్, అలాంటి భయాలు అసత్యమని తేల్చి చెప్పారు. ప్రతి చిన్న సంఘటనను అణు ప్రమాదంతో ముడిపెట్టి చూడటమంటే ఉగ్రవాదానికి ప్రోత్సాహమేనని, ఇది ప్రపంచ వ్యాప్తంగా భద్రతకు ప్రమాదకరమని పేర్కొన్నారు. భారత దళాలు ఉగ్రవాదులపై నిర్దిష్ట - పరిమిత చర్యలు చేపట్టాయని స్పష్టం చేశారు.భారత చర్యల ద్వారా ఉగ్రవాదులకు గట్టి సందేశం వెళ్లిందని, పాకిస్తాన్ తాము చేసిన ప్రేరణల వలన ఎదురయ్యే తీవ్ర ఫలితాలను అర్థం చేసుకున్న తరువాతే పరిస్థితి స్థిరంగా మారిందని తెలిపారు. గత రెండు వారాలుగా సరిహద్దుల్లో శాంతి నెలకొనిందని వెల్లడించారు.

-పాకిస్తాన్ – ఉగ్రవాద సంబంధం

పాకిస్తాన్ - ఉగ్రవాదం మధ్య ఉన్న సంబంధం ప్రతి ఒక్కరికి స్పష్టమని జైశంకర్ చెప్పారు. ఐక్యరాజ్య సమితి ఉగ్రవాదుల జాబితాలో ఉన్న అనేక మంది పాకిస్తానీయులే అని గుర్తుచేశారు. ఉగ్రవాదం అక్కడ ఒక "ఓపెన్ బిజినెస్" లా నడుస్తుందని, ప్రభుత్వం- సైన్యం సహకారంతో జరుగుతోందని ఆరోపించారు.

-యుద్ధ విరమణకు అమెరికా పాత్ర ఉందా?

యుద్ధ విరమణ పైన అమెరికా ప్రభావం ఉందా అనే ప్రశ్నకు, ఇది రెండు దేశాల మిలటరీ మధ్య నేరుగా జరిగిన సంప్రదింపుల ఫలితమేనని స్పష్టం చేశారు. భారత దళాలు పాకిస్తాన్ యొక్క కీలక వాయు స్థావరాలను లక్ష్యంగా చేసుకొని విజయం సాధించడంతో, పాకిస్తాన్ వెనక్కి తగ్గిందని తెలిపారు.

-యూరప్ మారుతున్నదా?

యూరప్ ఇప్పుడు మరింత స్వతంత్రంగా, ప్రపంచ దృక్కోణాన్ని విశ్లేషిస్తూ అభివృద్ధి చెందుతోందని జైశంకర్ చెప్పారు. భారత్ అలాంటి యూరోప్‌తో సంబంధాలను బలోపేతం చేసేందుకు సిద్ధంగా ఉందని తెలిపారు.

-అమెరికా పాత్రపై విశ్లేషణ

అమెరికా ఇంకా ప్రపంచంలో శక్తివంతమైన దేశమేనని, ఇతర దేశాలు అమెరికా తీసుకునే విధానాలను జాగ్రత్తగా పరిశీలించాల్సిన అవసరం ఉందని అన్నారు. భారతదేశం ఎప్పుడూ తన జాతీయ ప్రయోజనాలు, భద్రత ఆధారంగా నిర్ణయాలు తీసుకుంటుందని చెప్పారు.

ఉక్రెయిన్ విషయంలో భారత-జర్మన్ భేదాభిప్రాయాలు

భద్రతా విషయంలో భారతీయుల దృష్టి ఉక్రెయిన్ పైన కాకుండా, పాకిస్తాన్, ఉగ్రవాదం, చైనా, సరిహద్దు భద్రత పైనే ఉందని జైశంకర్ స్పష్టం చేశారు. అందువల్ల, యూరప్ - భారతదేశాల దృష్టికోణాలు సహజంగానే వేర్వేరుగా ఉంటాయని పేర్కొన్నారు. జైశంకర్ అభిప్రాయాన్ని వెల్లడిస్తూ, యూరోప్ అంతర్జాతీయ చట్టాలను ఉక్రెయిన్ సందర్భంలో ప్రస్తావిస్తే, భారత్ తన సరిహద్దుల సార్వభౌమాధికారాన్ని ముఖ్యంగా భావిస్తుందని అన్నారు. "సరిహద్దుల విషయంలో చట్టం అంటే, భారతదేశపు సరిహద్దుల గురించి ఏమిటి?" అని ప్రశ్నించారు.

-రష్యాతో భారత సంబంధాలు

భారత్-రష్యా సంబంధాలు స్థిరంగా, స్నేహపూర్వకంగా ఉన్నాయని చెప్పారు. రష్యా ఎప్పుడూ భారత్‌కు నష్టం కలిగించలేదని, ఇది ద్వైపాక్షిక సంబంధాలను మద్దతుగా నిలిపిన కారణమని వివరించారు.

-భారత్-జర్మనీ భద్రతా సహకారం

భద్రత - సాంకేతిక సహకారంపై భారతదేశానికి ఆసక్తి ఉన్నప్పటికీ, ఇందుకు అవసరమైన విధానాలు అమలు కావలసిన అవసరం ఉందని జైశంకర్ పేర్కొన్నారు. జర్మనీ కూడా ఇటీవల భద్రతా సామర్థ్యాలపై దృష్టి పెట్టడం ప్రారంభించిందని తెలిపారు.

జైశంకర్ వ్యాఖ్యలు భారతదేశం ప్రపంచాన్ని చూస్తున్న కోణం ఎంత ప్రత్యేకమైనదో స్పష్టంగా తెలియజేశాయి. ఇది ఒక ఆత్మవిశ్వాసపూరితమైన, స్వతంత్రమైన విదేశాంగ విధానాన్ని ప్రతిబింబిస్తోంది.