జగ్గారెడ్డికి సీఎం కుర్చీపై కోరిక..!

సంగారెడ్డి మాజీ ఎమ్మెల్యే, తెలంగాణ కాంగ్రెస్ సీనియర్ నేత తూర్పు జయప్రకాశ్ రెడ్డి అలియాస్ జగ్గారెడ్డి మరోసారి వార్తల్లో నిలిచారు. మాటల్లో చురుకుదనం, వ్యంగ్యంలో పదును, రాజకీయాల్లో తనదైన స్పష్టమైన అభిప్రాయాన్ని చెప్పడంలో ఎప్పుడూ ముందుండే జగ్గారెడ్డి, ఈసారి తాను ముఖ్యమంత్రి కావాలనే కోరికను బహిరంగంగానే ప్రకటించి చర్చనీయాంశమయ్యారు.

- జగ్గారెడ్డి వ్యాఖ్యలు ఏంటి?

"రేవంత్ రెడ్డి ఈ మూడున్నరేళ్లు సీఎంగా ఉంటారు. ఆ తర్వాత కూడా ఐదేళ్ల పాటు సీఎంగా కొనసాగవచ్చు. అంటే మొత్తం ఎనిమిదిన్నర లేదా తొమ్మిదేళ్లు ఆయన సీఎంగా ఉంటారు. ఆ తర్వాత నేను సీఎం పదవికి ప్రయత్నిస్తాను" అని జగ్గారెడ్డి సంచలన వ్యాఖ్యలు చేశారు. ఈ వ్యాఖ్యలను ఆయన పెద్ద సీరియస్‌గా చేయకపోయినా, తన మనసులోని కోరికను మాత్రం స్పష్టంగా వెలిబుచ్చారు.

-రాజకీయంగా ఇది ప్రమాదమా?

జగ్గారెడ్డి వ్యాఖ్యలు కాంగ్రెస్ పార్టీలో పెద్ద దుమారం రేపలేదనే చెప్పాలి. ఎందుకంటే ఆయన రేవంత్‌ను తక్కువ చేసి మాట్లాడలేదని, రేవంత్ పుణ్యమా అని సీఎం పదవిని తనే దక్కించుకోవాలని ప్రయత్నిస్తున్నట్లు కనిపించలేదని విశ్లేషకుల అభిప్రాయం. పైగా, రేవంత్ తొమ్మిదేళ్లు సీఎం పదవిలో కొనసాగాలని, ఆ తర్వాతే తాను ప్రయత్నిస్తానని చెప్పడం రాజకీయంగా సేఫ్ గేమ్‌గానే చూడొచ్చు.

-టాప్ పోస్టు అందుకోవడం అంత తేలిక కాదు!

జగ్గారెడ్డి సీనియర్ నేతగా తనకంటూ ఒక గుర్తింపు తెచ్చుకున్నారు. ఆయన మాటల్లో ఒక స్పష్టత ఉంటుంది. కానీ సీఎం పదవి కోసం పోటీకి దిగే సమయంలో పార్టీలో ఉన్న మరెన్నో పెద్ద పెద్ద పేర్లను దాటాల్సి ఉంటుంది. కోమటిరెడ్డి వెంకటరెడ్డి, ఉత్తమ్ కుమార్ రెడ్డి, పొంగులేటి శ్రీనివాస్ రెడ్డి, కుందూరు జానారెడ్డి వంటి వారిని పక్కకు నెట్టి జగ్గారెడ్డి సీఎం పదవిని అందుకోవడం కష్టమే అనే అభిప్రాయాలు పార్టీ వర్గాల్లో బలంగా వినిపిస్తున్నాయి.

- ఎన్నికల ఫలితాల బలం ఏమైనా ఉందా?

జగ్గారెడ్డి 2004లో తొలిసారి ఎమ్మెల్యేగా గెలిచారు. 2009లో మళ్లీ విజయం సాధించారు. కానీ 2014లో ఓటమి ఎదుర్కొన్నారు. 2018లో తిరిగి గెలిచారు. 2023 ఎన్నికల్లో టికెట్ దక్కినా ఓటమి చెందారు. వరుసగా రెండోసారి ఓడిపోయినప్పటికీ, ఆయన వాయిస్ మాత్రం పార్టీ నేతల ముందు బలంగా వినిపిస్తోంది. ప్రస్తుతం వర్కింగ్ ప్రెసిడెంట్ పదవిలో ఉండటం, పార్టీ పట్ల నిబద్ధత చూపించడమే ఆయనకు ప్లస్ పాయింట్లు.

-వయస్సు.. అడ్డంకి కాదు!

ప్రస్తుతం జగ్గారెడ్డికి 58 ఏళ్లు. తొమ్మిదేళ్ల తర్వాత అంటే ఆయన వయస్సు సుమారుగా 67-68 ఉంటుంది. రాజకీయాల్లో వయస్సు పెద్ద అడ్డంకి కాదని గతానుభవాలు చెబుతున్నాయి. ఆయన ఆరోగ్యంగా ఉంటే, పార్టీ మీద పట్టుతో ఉంటే సీఎం పదవికి ప్రయత్నించడం కుదరవచ్చు.

జగ్గారెడ్డి వ్యాఖ్యలు ఇప్పటివరకు పెద్ద సంచలనం సృష్టించకపోయినా, భవిష్యత్తులో సీఎం పదవికి రేసులో నిలవాలంటే ఆయన ముందు చక్కటి రాజకీయ వ్యూహాలు, కట్టుదిట్టమైన ప్రజా ఆదరణ, మరియు పార్టీ హైకమాండ్ మద్దతు అవసరం. మొత్తంగా చెప్పాలంటే జగ్గారెడ్డి కోరిక పెద్దది... దానికి చేరుకోవడం కొంచెం కష్టమైన మార్గమే అన్నమాట!