హమాస్ అగ్రనేత మహ్మద్ సిన్వార్ మృతి.. ఆసుపత్రి కింద సొరంగంలో మృతదేహం లభ్యం!

హమాస్ అగ్ర నాయకుల్లో ఒకరైన మహ్మద్ సిన్వార్ మృతదేహాన్ని ఇజ్రాయెల్ బలగాలు గుర్తించాయి. గాజాలోని ఖాన్ యూనీస్‌లో ఉన్న యూరోపియన్ ఆసుపత్రి కింద ఉన్న ఒక సొరంగంలో ఆయన మృతదేహం లభ్యమైనట్లు ఇజ్రాయెల్ రక్షణ దళాలు ప్రకటించాయి. మృతదేహంపై వైద్య పరీక్షలు నిర్వహించిన తర్వాత, అది మహ్మద్ సిన్వార్‌దే అని నిర్ధారించారు. మహ్మద్ సిన్వార్, హమాస్ నాయకుడు యాహ్యా సిన్వార్ కు తమ్ముడు. యాహ్యా సిన్వార్ గతేడాది దక్షిణ గాజాలో జరిగిన సైనిక చర్యలో ఇజ్రాయెల్ బలగాల చేతిలో మరణించారు.

మహ్మద్ సిన్వార్‌తో పాటు, ఇజ్రాయెల్ బలగాలు ఇటీవల రఫా బ్రిగేడ్ కమాండర్ మహ్మద్ షబానా, ఖాన్ యూనీస్ బెటాలియన్ కమాండర్, మహ్ది ఖుర్రాల మృతదేహాలను కూడా గుర్తించాయి. మిగిలిన మృతదేహాలను ఇంకా గుర్తించాల్సి ఉందని ఇజ్రాయెల్ రక్షణ దళాలు తెలిపాయి. ఇజ్రాయెల్ బలగాలు కొంతమంది విదేశీ విలేకర్లను గాజాలోని యూరోపియన్ ఆసుపత్రి కింద ఉన్న ఒక హమాస్ సొరంగంలోకి తీసుకెళ్లాయి. అక్కడ హమాస్ ఒక కమాండ్ అండ్ కంట్రోల్ సెంటర్‌ను నడుపుతోందని వారు వెల్లడించారు. "హమాస్ పౌరులను మానవ కవచంగా ఉపయోగిస్తుందనడానికి ఇది ఒక పెద్ద ఉదాహరణ. ఆసుపత్రి అత్యవసర గది కింద అనేక గదులతో కూడిన ఒక నిర్మాణాన్ని మేము కనుగొన్నాము. వాటిలో ఒక గదిలో మహ్మద్ సిన్వార్ మృతదేహం లభ్యమైంది" అని ఇజ్రాయెల్ రక్షణ దళాల ప్రతినిధి తెలిపారు. ఈ ప్రకటనపై హమాస్ నుంచి ఎలాంటి స్పందన రాలేదు.

ఇజ్రాయెల్ బలగాలు తెలిపిన వివరాల ప్రకారం.. మహ్మద్ సిన్వార్ సుమారు 8 మీటర్ల లోతు ఉన్న సొరంగంలో దాక్కుని ఉన్నాడు. ఇజ్రాయెల్ సైన్యాలు ఇక్కడ దాడి చేసినప్పటికీ, ఆసుపత్రి మాత్రం యథావిధిగా పనిచేస్తూనే ఉంది. మహ్మద్ సిన్వార్ గత నెలలోనే మరణించారు. ఇజ్రాయెల్ బలగాలు సొరంగంలోకి ప్రవేశించిన తర్వాతే ఈ విషయం నిర్ధారణ అయింది.

మహ్మద్ సిన్వార్ ఎవరు?

మహ్మద్ సిన్వార్, హమాస్ నాయకుడు యాహ్యా సిన్వార్‌కు తమ్ముడు. దైఫ్ మరణం తర్వాత సంస్థ సైనిక విభాగం నాయకుడిగా మహ్మద్ బాధ్యతలు స్వీకరించారు. తన సోదరుడు యాహ్యా మరణించిన తర్వాత, ఆయన హమాస్ అగ్ర కమాండర్‌గా ఎదిగారు. 2023 అక్టోబర్ 7న ఇజ్రాయెల్‌పై జరిగిన దాడిని ప్లాన్ చేసిన యాహ్యా సిన్వార్ కూడా గతేడాది మరణించారు. ఇప్పుడు మహ్మద్ సిన్వార్ కూడా మృతి చెందడంతో హమాస్‌కు ఇది పెద్ద దెబ్బ అని చెప్పవచ్చు.