పాకిస్తాన్ ఐఎస్‌ఐ వ్యూహం.. 'మేడమ్ ఎన్' వలలో భారతీయ సోషల్ మీడియా ఇన్‌ఫ్లుయెన్సర్లు

భారతదేశానికి వ్యతిరేకంగా పాకిస్తాన్ గూఢచార సంస్థ ఐఎస్‌ఐ (ISI) కొత్త ఎత్తుగడలకు పాల్పడుతోంది. సోషల్ మీడియాలో (Social Media) ప్రభావం చూపే భారతీయ ఇన్‌ఫ్లుయెన్సర్లను (Indian Influencers) తమ వలలోకి లాక్కుంటున్న వైనం తాజాగా వెలుగులోకి వచ్చింది. పాకిస్తాన్‌లోని లాహోర్‌కు చెందిన వ్యాపారవేత్త నౌషాబా షెహజాదా మసూద్, ఐఎస్‌ఐ ఆధ్వర్యంలో పనిచేస్తూ, భారతీయ ప్రముఖులను తమ గుప్పిట్లోకి తెచ్చుకుంటున్నట్లు నిఘా వర్గాలు వెల్లడించాయి. ఐఎస్‌ఐ ఆమెకు 'మేడమ్ ఎన్' అనే సీక్రెట్ పేరును పెట్టింది.

'మేడమ్ ఎన్' ట్రావెల్ కంపెనీ

షెహజాదా మసూద్, జాయానా ట్రావెల్స్ అండ్ టూరిజం అనే కంపెనీని లాహోర్‌లో నడుపుతున్నారు. ఆమె భర్త పాకిస్తాన్ పౌర సేవల్లో పనిచేసి పదవీ విరమణ చేశారు. షెహజాదాకు ఐఎస్‌ఐతో చాలా బలమైన సంబంధాలు ఉన్నట్లు సమాచారం. జ్యోతి మల్హోత్రా వంటి భారతీయ సోషల్ మీడియా ఇన్‌ఫ్లుయెన్సర్లు పాకిస్తాన్‌కు వెళ్లడానికి ఆమె సహాయం చేస్తున్నారు.

షెహజాదా కంపెనీ పాకిస్తాన్‌లో హిందూ, సిక్కు భక్తులకు పర్యటనలను ఏర్పాటు చేసే ఏకైక సంస్థ. ఇది అక్కడి ప్రభుత్వానికి చెందిన ఎవాక్యుయీ ట్రస్ట్ ప్రాపర్టీ బోర్డుతో కలిసి పనిచేస్తుంది. ఇది దేశ సైన్యంతో, ఐఎస్‌ఐతో ఆమెకు ఉన్న బలమైన సంబంధాలను స్పష్టం చేస్తుంది. ఆమె కంపెనీ ఢిల్లీ వంటి భారతదేశంలోని ప్రదేశాలలో ట్రావెల్ ఏజెంట్లను నియమించుకున్నట్లు తెలుస్తోంది.

500 మందితో స్లీపర్ సెల్ ఏర్పాటుకు ప్రయత్నం

ఇటీవల గూఢచర్యం ఆరోపణలతో భారతదేశంలో పలువురు ఇన్‌ఫ్లుయెన్సర్లు అరెస్ట్ అయ్యారు. వారిని విచారించగా షెహజాదా పాత్ర బయటపడింది. ఆమె భారతదేశంలో సుమారు 500 మందితో స్లీపర్ సెల్ నెట్‌వర్క్‌ను ఏర్పాటు చేయడానికి ప్రయత్నిస్తున్నట్లు నిఘా వర్గాలు వెల్లడించాయి. ఈ విషయంలో ఆమెకు పాకిస్తాన్ ఐఎస్‌ఐ, సైన్యం నుంచి స్పష్టమైన ఆదేశాలు అందాయి.

పాకిస్తాన్ మిలిటరీ అధికారులతో పరిచయాలు

షెహజాదా పాకిస్తాన్‌కు వచ్చిన భారతీయ ఇన్‌ఫ్లుయెన్సర్లను పాకిస్తాన్ సైనిక అధికారులకు, ఐఎస్‌ఐకి పరిచయం చేస్తున్నారు. మన దేశంలో సుమారు 3,000 మందికి ఈ కంపెనీ ద్వారా సహాయం అందిందని తెలుస్తోంది. వీరిలో సుమారు 1500 మంది భారతీయేతరులు గత ఆరు నెలల్లో పాకిస్తాన్‌ను సందర్శించారు. ఢిల్లీలోని పాకిస్తాన్ రాయబార కార్యాలయం వీసా విభాగంలో ఆమెకు ప్రత్యేక ప్రభావం ఉంది. ఆమెకు మొదటి కార్యదర్శి (వీసా) సుహైల్ కమర్, కౌన్సెలర్ (వాణిజ్యం) ఉమర్ ష్రైయర్ లతో బలమైన సంబంధాలున్నాయి. పాకిస్తాన్ వీసా కావాలంటే.. ఆమె ఒక ఫోన్ కాల్ చేస్తే చాలు వీసా లభించేది. అదే కార్యాలయంలో వీసా అధికారిగా పనిచేసే ఎహసాన్ ఉర్ రెహ్మాన్ అలియాస్ డానిష్ తో కూడా ఆమెకు సంబంధం ఉంది. 'మేడమ్ ఎన్' నుండి సిఫార్సు లేదా స్పాన్సర్‌షిప్ ఉంటే, భారతీయులకు సందర్శకుల వీసా సులభంగా వచ్చేది. జ్యోతి మల్హోత్రా వ్యవహారం వెలుగులోకి వచ్చిన తర్వాత డానిష్‌ను భారతదేశం నుంచి బహిష్కరించినట్లు తెలిసింది. ఈ మొత్తం వ్యవహారం భారత భద్రతకు ఒక పెద్ద సవాలుగా మారింది.