ఈ సారి బుల్లెట్ దిగుద్ది... ట్రంప్ కు ఇరాన్ నుంచి మాస్ వార్నింగ్ వైరల్!

దాదాపు రెండు వారాలుగా ఇరాన్ నెత్తురోడుతున్న సంగతి తెలిసిందే. దేశవ్యాప్తంగా రోజు రోజుకీ పెరుగుతున్న నిరసనలు, వాటిని అడ్డుకొవడానికి తుపాకులకు పనిచెబుతోన్న భద్రతా దళాల చర్యలతో ఆదేశం అట్టుడుకుతోంది. ఈ నేపథ్యంలో ఇరాన్‌ పై అమెరికా దాడులకు దిగడం దాదాపు అనివార్యం అని అంటున్నారు. ఆ దేశంపై మరికొన్ని గంటల్లో సైనిక చర్యకు ఉపక్రమించాలని ట్రంప్‌ నిర్ణయించినట్లు కథనాలొస్తున్నాయి. ఈ సమయంలో.. ఇరాన్ నుంచి ట్రంప్ కు ఓ షాకింగ్ వార్నింగ్ వెలువడింది.

అవును... నిరసనకారులపై బుల్లెట్లతో అణచివేతకు పాల్పడుతోన్న ఇరాన్‌ పై అమెరికా సైనిక చర్యకు దిగడం తప్పేలా కన్పించట్లేదని అంతర్జాతీయ మీడియా నివేదించింది! ఆ దేశంలోని ఆందోళనకారులకు ముందునుంచీ మద్దతు పలుకుతోన్న అమెరికా అధ్యక్షుడు.. ఇప్పుడు టెహ్రాన్‌ పై దాడులకు సిద్ధమైనట్లు తెలుస్తోంది. ఈ పరిణామాల నేపథ్యంలో ట్రంప్‌ పై ఇరాన్‌ ప్రత్యక్ష బెదిరింపులకు పాల్పడింది. ఇందులో భాగంగా... ఈసారి బుల్లెట్‌ గురి తప్పదని హెచ్చరించింది. దీంతో.. ఇది హాట్ టాపిక్ గా మారింది.

ఈ సందర్భంగా... 2024లో ఎన్నికల ప్రచారంలో ట్రంప్ పై హత్యాయత్నం జరిగిన ఘటనకు సంబంధించిన ఫోటోను ప్రసారం చేసిన ఇరాన్ టీవీ... ఈసారి బుల్లెట్ గురి తప్పదని బెదిరింపు సందేహాన్ని టెలీకాస్ట్ చేసినట్లు అంతర్జాతీయ మీడియాలో కథనాలు వస్తున్నాయి. ఓ వైపు ఇరాన్ పై అమెరికా ఏ క్షణమైనా అని ఒకరంటే.. మరికొన్ని గంటల్లో అని ఇంకొకరు అంటున్న వేళ.. ఇరాన్ నుంచి వచ్చిన ఈ బెదిరింపులు సంచలనంగా మారాయి.

కాగా... 2024 జులైలో పెన్సిల్వేనియాలో డొనాల్డ్ ట్రంప్‌ ఎన్నికల ప్రచారంలో ఉండగా.. అతనిపై కాల్పులు జరిగిన సంగతి తెలిసిందే. ఆ ఘటనలో ట్రంప్ చెవికి గాయమైంది. ముఖంపై రక్తం చిమ్మింది. వెంటనే భద్రతా సిబ్బంది ట్రంప్ ను చుట్టుముట్టారు. ఈ హత్యాయత్నం వెనక ఇరాన్‌ ఉన్నట్లు అప్పట్లో అమెరికా ప్రభుత్వం ఆరోపించింది కూడా. ఈ నేపథ్యంలో.. తాజాగా "ఈ సారి బుల్లెట్ గురి తప్పదు" అని ఇరాన్ నుంచి హెచ్చరికలు రావడం గమనార్హం!

మరికొన్ని గంటల్లో అమెరికా సైనిక చర్య!:

ఇరాన్‌ పై అమెరికా దాడులకు దిగడం దాదాపు అనివార్యంగా కనిపిస్తోంది! ఆ దేశంపై వచ్చే 24 గంటల్లోనే సైనిక చర్యకు ఉపక్రమించాలని అమెరికా అధ్యక్షుడు ట్రంప్‌ నిర్ణయించినట్లు పలు అంతర్జాతీయ వార్తా సంస్థలు వెల్లడించాయి. ప్రధానంగా... ఇరాన్‌ కు దగ్గరలో ఖతార్‌ లో ఉన్న తమ కీలక అల్‌-ఉదెయిద్‌ వైమానిక స్థావరంతో పాటు పశ్చిమాసియా వ్యాప్తంగా పలు సైనిక స్థావరాల నుంచి కొంతమంది సిబ్బందిని అమెరికా ఇప్పటికే ఖాళీ చేయిస్తోంది.

ఇదే సమయంలో... అమెరికా, దాని ప్రాంతీయ మిత్రపక్షాలు అల్‌-ఉదెయిద్‌ వైమానిక స్థావరంలో తాజాగా గగనతల రక్షణ కార్యకలాపాల సెల్‌ ను ప్రారంభించాయని చెబుతున్నారు. ఉద్రిక్తతల నేపథ్యంలో ఖతార్‌ లోని ఓ మిలిటరీ స్థావరం నుంచి బ్రిటన్‌ కూడా సిబ్బందిని ఉపసంహరించుకుంటోంది. ఈ పరిణామాల నేపథ్యంలో మరికొన్ని గంటల్లో ఇరాన్ పై అమెరికా సైనిక చర్య ఉండొచ్చనే చర్చ మొదలైంది.