యూకే వీసా ప్రక్రియ: అమెరికాలోని భారత విద్యార్థులకు పెను సవాలు!

అమెరికాలో ఉన్న భారతీయ విద్యార్థులకు యునైటెడ్ కింగ్‌డమ్ (యూకే) వీసా కోసం దరఖాస్తు చేసుకోవడం ఇప్పుడు పెద్ద తలనొప్పిగా మారింది. ముఖ్యంగా బయోమెట్రిక్ ప్రక్రియ, పాస్‌పోర్ట్ సమర్పణకు సంబంధించిన స్పష్టత లేకపోవడంతో విద్యార్థులు తీవ్ర ఇబ్బందులు పడుతున్నారు.

-బయోమెట్రిక్ కేంద్రాల లభ్యత: 10 గంటల దూరం ప్రయాణం!

బ్రిటన్‌లో మాస్టర్స్ ప్రోగ్రామ్‌లో చేరడానికి అడ్మిషన్ పొందిన ఒక భారత విద్యార్థి ప్రస్తుతం అమెరికాలో ఉన్నాడు. యూకే వీసా దరఖాస్తుకు బయోమెట్రిక్ తప్పనిసరి కావడంతో దానికోసం వెతుకుతున్న అతనికి ఎదురైన సమస్య ఆశ్చర్యకరమైనది. అతడికి దగ్గరలో ఉన్న బయోమెట్రిక్ సెంటర్ 10 గంటల దూరంలో ఉంది! ఇది ఒక్కరి అనుభవం మాత్రమే కాదు. అమెరికాలో ఉన్న అనేకమంది భారతీయ విద్యార్థులు యూకే వీసా కోసం ప్రయత్నిస్తున్నప్పుడు ఇదే అయోమయంతో సతమతమవుతున్నారు. బయోమెట్రిక్ సమాచారం ఎక్కడ ఇవ్వాలి, ఎలాంటి కేంద్రాలు అందుబాటులో ఉన్నాయనే స్పష్టత లేకపోవడం ఈ గందరగోళానికి ప్రధాన కారణం.

యూకే వీసా అధికారిక వెబ్‌సైట్‌లో కనిపించే బయోమెట్రిక్ కేంద్రాలు చాలా తక్కువ. ఇవి ఎక్కువగా ప్రైవేట్ సంస్థలు లేదా USCIS (యూఎస్ సిటిజన్ షిప్ మరియు ఇమిగ్రేషణ్ సర్వీస్ ) ఆధ్వర్యంలోని అప్లికేషన్ సపోర్ట్ సెంటర్‌ల (ASC) ద్వారా నడుస్తున్నాయి. అయితే ఆశ్చర్యకరమైన విషయం ఏమిటంటే USCIS కేంద్రాలు చాలా సందర్భాల్లో అధికారిక జాబితాలో ఉండవు. అయినప్పటికీ, కొందరు విద్యార్థులు యూకే వీసా పోర్టల్ ద్వారా అప్లై చేసిన తర్వాత USCIS కేంద్రాల్లో బయోమెట్రిక్స్ పూర్తయ్యాయని చెబుతున్నారు. ఈ అనిశ్చితి విద్యార్థులను మరింత ఆందోళనకు గురిచేస్తోంది.

- పాస్‌పోర్ట్ సమర్పణలోనూ అస్పష్టత

ఒకవైపు బయోమెట్రిక్ అనిశ్చితి ఉంటే, మరోవైపు పాస్‌పోర్ట్ సమర్పణ విషయంలో కూడా స్పష్టత లేదు. కొందరు విద్యార్థులు తమ అసలైన పాస్‌పోర్ట్‌ను పంపించాల్సి వచ్చిందని చెబుతుంటే, మరికొందరు డిజిటల్ కాపీ మాత్రమే అప్‌లోడ్ చేసి, తరువాత ఒరిజినల్ చూపించడం సరిపోతుందని అంటున్నారు. ఈ స్పష్టత లేకపోవడం వల్ల సమయం తక్కువగా ఉన్న విద్యార్థులకు తీవ్ర ఒత్తిడి ఎదురవుతోంది. ముఖ్యంగా వీసా ఆలస్యమైతే, వారి యూనివర్సిటీ క్లాసులు ప్రారంభమయ్యే తేదీలను కోల్పోతారు, ముందుగా ప్రణాళిక చేసిన ప్రయాణాలు వాయిదా వేయాల్సి వస్తుంది.

- స్పష్టమైన మార్గదర్శకాలు అవసరం

ఇలాంటి సమస్యలను నివారించాలంటే పెద్ద మార్పులు అవసరం లేదు. అధికారిక వెబ్‌సైట్‌లోనే అందుబాటులో ఉన్న అన్ని బయోమెట్రిక్ కేంద్రాల జాబితా, పాస్‌పోర్ట్ సమర్పణకు సంబంధించి స్పష్టమైన మార్గదర్శకాలు ఉండాలి. ఇవి లేకపోవడంతో విద్యార్థులు అధికారిక సమాచారం కంటే ఎక్కువగా ఆన్‌లైన్ ఫోరమ్‌లు, రెడ్డిట్ చర్చలు, సోషల్ మీడియా గ్రూపులపై ఆధారపడుతున్నారు.

అంతర్జాతీయ స్థాయిలో జరిగే వీసా ప్రక్రియ ఇంత అయోమయంగా ఉండకూడదు. విద్యార్థుల జీవితాల్లో కీలకమైన ఈ దశను అర్థం చేసుకుని, సమర్థవంతంగా జరగేలా అధికారులు చర్యలు తీసుకోవాలి. తద్వారా భారతీయ విద్యార్థులు అనవసరమైన ఒత్తిడి, ఆందోళన లేకుండా యూకేలో తమ ఉన్నత విద్యను కొనసాగించగలరు.