అమెరికాలో వీసా గడువు మించితే జీవితకాల నిషేధం: భారతీయలకు తీవ్ర హెచ్చరిక!

అమెరికాలో తమకు కేటాయించిన వీసా గడువు కంటే ఎక్కువ కాలం నివసిస్తున్న విదేశీయులపై కఠిన చర్యలు తీసుకోనున్నట్లు అమెరికా ప్రభుత్వం స్పష్టం చేసింది. ఈ నేపథ్యంలో, అమెరికాలో నివసిస్తున్న , భవిష్యత్తులో అక్కడికి ప్రయాణించాలనుకుంటున్న భారతీయ పౌరులకు అమెరికా ఎంబసీ ఇన్ ఇండియా ఒక తీవ్రమైన హెచ్చరిక జారీ చేసింది. వీసా గడువు మించితే కేవలం దేశ బహిష్కరణ (డిపోర్టేషన్) మాత్రమే కాకుండా, భవిష్యత్తులో అమెరికాలోకి ప్రవేశించేందుకు జీవితకాల నిషేధం ఎదురయ్యే ప్రమాదం ఉందని పేర్కొంది.

ఈ కీలక హెచ్చరికను అమెరికా ఎంబసీ తమ అధికారిక X ఖాతా ద్వారా వెల్లడించింది. "మీకు అనుమతించిన దానికంటే ఎక్కువ కాలం అమెరికాలో నివసిస్తే, మిమ్మల్ని దేశం నుండి పంపించివేయవచ్చు. అంతేకాకుండా భవిష్యత్తులో అమెరికా వెళ్లేందుకు మీకు శాశ్వత నిషేధం విధించబడే అవకాశం ఉంది" అని ఆ సందేశంలో స్పష్టంగా పేర్కొన్నారు.

డొనాల్డ్ ట్రంప్ అధ్యక్షతన ఉన్న అమెరికా ప్రభుత్వం ప్రవేశపెట్టిన కఠినమైన ఇమ్మిగ్రేషన్ విధానాలలో భాగంగా ఈ నిర్ణయం తీసుకున్నారు.. ఇటీవలి కాలంలో వీసా గడువు మించి అమెరికాలో నివసిస్తున్న భారతీయుల సంఖ్య పెరుగుతున్నట్లు వస్తున్న వార్తల నేపథ్యంలో ఈ హెచ్చరికకు ప్రాధాన్యత సంతరించుకుంది.

ఈ హెచ్చరిక అన్ని రకాల నాన్-ఇమ్మిగ్రెంట్ వీసాలకు వర్తిస్తుంది. విద్యార్థులు (స్టూడెంట్ వీసా) , ఉద్యోగులు (వర్క్ వీసా), పర్యాటకులు (టూరిస్ట్ వీసా), వ్యాపార వీసాలు (బిజినెస్ వీసా) వంటివాటిపై అమెరికాలో ఉన్నవారందరూ దీని పరిధిలోకి వస్తారు. ప్రతి ఒక్కరూ తమ వీసాపై పేర్కొన్న గడువును, అనుమతించిన స్టేటస్ ను జాగ్రత్తగా పాటించాలని సూచించింది.

ఇదే సమయంలో అమెరికాలో 30 రోజుల కంటే ఎక్కువగా నివసించే విదేశీయులు తమ వివరాలను ఫెడరల్ అధికారుల వద్ద తప్పనిసరిగా నమోదు చేసుకోవాలనే మరో విధానాన్ని కూడా ప్రస్తావిస్తున్నారు. ఇది వీసా గడువు మించి నివసిస్తున్న వారిని గుర్తించేందుకు తీసుకున్న చర్యగా భావిస్తున్నారు.

కాబట్టి, అమెరికాలో ప్రస్తుతం నివసిస్తున్న లేదా భవిష్యత్తులో అక్కడికి వెళ్లాలని ప్రణాళిక వేస్తున్న భారతీయ పౌరులు తమ వీసా నిబంధనలను , అమెరికా ఇమ్మిగ్రేషన్ చట్టాలను చాలా కచ్చితంగా పాటించడం అత్యవసరం. లేనిపక్షంలో, డిపోర్టేషన్ తో పాటు భవిష్యత్తులో అమెరికా వెళ్లే అవకాశాన్ని శాశ్వతంగా కోల్పోయే తీవ్రమైన చట్టపరమైన పరిణామాలను ఎదుర్కోవాల్సి వస్తుందని అధికారులు హెచ్చరిస్తున్నారు.

-ముఖ్యంగా గుర్తుంచుకోవలసినవి:

వీసా గడువు మించితే దేశం నుండి పంపించివేస్తారు.భవిష్యత్తులో అమెరికా ప్రయాణంపై శాశ్వత నిషేధం విధించవచ్చు.30 రోజులకు మించి అమెరికాలో నివసిస్తే తప్పనిసరిగా నమోదు చేసుకోవాలి.విద్యార్థులు, ఉద్యోగులు, పర్యాటకులు సహా అందరు నాన్-ఇమ్మిగ్రెంట్ వీసా హోల్డర్లు అప్రమత్తంగా ఉండాలి.అమెరికా ఇమ్మిగ్రేషన్ నిబంధనలను విస్మరిస్తే తీవ్ర పరిణామాలు ఉంటాయని, ప్రతి ఒక్కరూ చట్టాలను గౌరవించాలని అమెరికా ఎంబసీ పునరుద్ఘాటించింది.