ట్రంప్‌ పై భారత్ ప్రతీకారం: ఎఫ్-35 డీల్‌కు బ్రేక్!

అమెరికా అధ్యక్షుడు డొనాల్డ్ ట్రంప్ అనుసరిస్తున్న దూకుడైన విధానాలకు భారత్ గట్టి సమాధానం ఇవ్వడానికి సిద్ధమవుతోంది. అమెరికా ఉత్పత్తులపై భారీగా సుంకాలు విధించడం, రష్యాతో వాణిజ్యంపై హెచ్చరికలు వంటి ట్రంప్ చర్యలు భారత్‌ను అసంతృప్తికి గురిచేశాయి. ఈ నేపథ్యంలో అమెరికా నుంచి రక్షణ పరికరాల కొనుగోలుపై భారత్ పునరాలోచిస్తోంది.

-ఎఫ్-35 విమానాల డీల్‌కు బ్రేక్

అమెరికా నుంచి ఎఫ్-35 యుద్ధ విమానాలను కొనుగోలు చేయాలని భారత్ ఒకప్పుడు భావించింది. అయితే తాజా పరిణామాల నేపథ్యంలో ఈ డీల్‌ను నిలిపివేయాలని భారత్ నిర్ణయించుకున్నట్లు సమాచారం. ట్రంప్ ప్రభుత్వం ఈ డీల్ కోసం గట్టిగా ప్రయత్నించినా, భారత్ మాత్రం వ్యూహాత్మకంగా వెనక్కి తగ్గింది. సమీప భవిష్యత్తులో ఈ విమానాల కొనుగోలుకు అవకాశం లేదని బ్లూమ్‌బర్గ్ నివేదిక వెల్లడించింది.

-పాక్‌కు గౌరవం.. భారత్‌కు సుంకాలు

ఇటీవల పాకిస్తాన్ ఆర్మీ చీఫ్ ఆసిమ్ మునీర్‌ను వైట్‌హౌస్‌కు ఆహ్వానించి విందు ఇవ్వడం భారత ప్రభుత్వానికి ఆగ్రహం తెప్పించింది. పాకిస్తాన్‌కు అనుకూలంగా వ్యవహరిస్తున్నారని భారత్ భావిస్తోంది. అదే సమయంలో భారత్ ఉత్పత్తులపై ట్రంప్ ప్రభుత్వం 25 శాతం సుంకాలు విధించింది. ఈ పరిణామాలు రెండు దేశాల మధ్య సంబంధాలను మరింత ఉద్రిక్తం చేశాయి.

- భారత్ వ్యూహాత్మక ఆలోచన

అమెరికాతో వాణిజ్య చర్చలు కొనసాగుతున్నప్పటికీ, ట్రంప్ ఏకపక్ష నిర్ణయాలు భారత్‌ను ఇబ్బందుల్లోకి నెడుతున్నాయి. అయితే, అమెరికాతో సంబంధాలను పూర్తిగా తెంచుకోకుండా, వాణిజ్య సంబంధాలను కొనసాగించాలని భారత్ నిర్ణయించుకుంది. కానీ రక్షణ రంగంలో మాత్రం కాస్త వెనకడుగు వేసింది. అమెరికా ఉత్పత్తులపై సుంకాలు పెంచకుండా శాంతియుతంగా వ్యవహరిస్తూనే, కీలకమైన రక్షణ కొనుగోళ్లపై వ్యూహాత్మకంగా నిర్ణయాలు తీసుకుంటోంది.

-అధికారిక చర్చలు జరగలేదు

విదేశాంగ శాఖ సహాయ మంత్రి కీర్తివర్ధన్ సింగ్ మాట్లాడుతూ ఎఫ్-35 యుద్ధ విమానాల విషయమై అమెరికాతో అధికారికంగా ఎలాంటి చర్చలు జరగలేదని స్పష్టం చేశారు. అదే సమయంలో, భారత్ ప్రస్తుతం అమెరికా నుంచి సహజ వాయువు, కమ్యూనికేషన్ పరికరాలు, బంగారం వంటి వాటిని ఎక్కువగా దిగుమతి చేసుకోవడానికి ప్రయత్నిస్తోంది.

భారత్ వైఖరి స్పష్టం

ట్రంప్ చర్యలతో అమెరికా-భారత్ సంబంధాల్లో ఒడిదొడుకులు రావొచ్చని నిపుణులు భావిస్తున్నారు. అయితే, భారత్ సంయమనంతో దూకుడు తగ్గించి వ్యూహాత్మకంగా వ్యవహరిస్తోంది. ఎఫ్-35 యుద్ధ విమానాల కొనుగోలును నిలిపివేయడం ఈ వ్యూహంలో భాగమే. ఇది కేవలం వ్యాపారం కాదు, దేశ గౌరవానికి సంబంధించిన విషయం. భారత్ తలవంచదు అనే బలమైన సందేశాన్ని ట్రంప్‌కు పంపింది.