అమెరికాతో వాణిజ్య ఒప్పందంలో ముందడుగు.. కీలక అంశాలివీ

భారత్-అమెరికా మధ్య ద్వైపాక్షిక వాణిజ్య ఒప్పందం త్వరలోనే కుదిరే అవకాశం ఉందని అమెరికా ఉపాధ్యక్షుడు జేడీ వాన్స్‌ ప్రకటించారు. పరస్పర సుంకాలను తగ్గించుకోవడానికి ఉద్దేశించిన ఈ ఒప్పందాన్ని కుదుర్చుకునే తొలి దేశాలలో భారత్ ఒకటి కావచ్చని ఆయన అభిప్రాయపడ్డారు. ఈ సందర్భంగా భారత ప్రధాని నరేంద్ర మోదీని ప్రశంసించిన వాన్స్‌, మోదీ సమర్థవంతమైన సంధానకర్త అని, అందుకే తాము ఆయనను గౌరవిస్తామని పేర్కొన్నారు.

అమెరికా వ్యవసాయ ఉత్పత్తులపై భారత్ అధిక సుంకాలు విధిస్తోందని, ఇది తమ దేశంలోని రైతులను ఇబ్బందులకు గురిచేస్తోందని వాన్స్‌ అన్నారు. అయితే భారత్ అమెరికా నుండి దీర్ఘకాలంగా ప్రయోజనం పొందుతోందని ఆయన ఆరోపించారు. ప్రస్తుతం జరుగుతున్న చర్చల్లో అమెరికన్ వస్తువులకు భారత మార్కెట్లో కొత్త అవకాశాలను కల్పించడం, అమెరికా కార్మికులకు నష్టం కలిగించే అన్యాయమైన వాణిజ్య పద్ధతులను తొలగించడం వంటి అంశాలపై దృష్టి సారించినట్లు వాన్స్‌ వివరించారు. వాణిజ్య ఒప్పందాల విషయమై భారత్‌తో పాటు జపాన్, కొరియా వంటి దేశాలతో కూడా చర్చలు జరుగుతున్నాయని ఆయన తెలిపారు.

ఇటీవల జేడీ వాన్స్‌ భారత పర్యటనకు వచ్చినప్పుడు ప్రధాని నరేంద్ర మోదీతో ద్వైపాక్షిక చర్చలు జరిపారు. ఈ సందర్భంగా ద్వైపాక్షిక వాణిజ్య ఒప్పందంపై జరుగుతున్న చర్చల్లో పురోగతి పట్ల ఇరు దేశాల నాయకులు సంతృప్తి వ్యక్తం చేశారు. ఇంధనం, వ్యూహాత్మక సాంకేతికతలు, రక్షణ వంటి రంగాలలో సహకారాన్ని పెంపుదలపై వారు ప్రాధాన్యతనిచ్చారు. ఇరు దేశాల మధ్య వాణిజ్య సమతుల్యాన్ని కాపాడటానికి అమెరికా నుండి చమురు, గ్యాస్ దిగుమతులను పెంచుకోవడానికి భారత్ ప్రయత్నిస్తున్నట్లు భారత విదేశాంగ శాఖ అధికారులు ఇటీవల తెలిపారు. గతంలో డొనాల్డ్ ట్రంప్ కూడా భారత్‌తో వాణిజ్య ఒప్పందం చేసుకోవడానికి ఆసక్తి కనబరిచారు.

జేడీ వాన్స్‌ తాజా ప్రకటనతో భారత్-అమెరికా వాణిజ్య ఒప్పందంపై త్వరలోనే ఒక ప్రకటన వెలువడే అవకాశాలున్నాయి. ఇరు దేశాలు తమ వాణిజ్య సంబంధాలను మరింత బలోపేతం చేసుకోవడం ద్వారా ఆర్థిక ప్రగతికి, వ్యూహాత్మక భాగస్వామ్యానికి కొత్త ఊపు లభించనుంది. అయితే, వ్యవసాయ ఉత్పత్తులపై సుంకాలు, మార్కెట్ ప్రవేశం వంటి కొన్ని కీలక అంశాలపై చర్చలు మరింత కీలక మారనున్నాయి.

-అమెరికాతో భారత్ వాణిజ్య ఒప్పందంలో కీలక అంశాలు ఇవీ

అమెరికా -భారత్ దేశాలు ద్వైపాక్షిక వాణిజ్య ఒప్పందంలో విధివిధానాలు ఖరారయ్యాయి. ఈ ఒప్పందంలో సుమారు 19 అంశాలు ఉన్నాయి. వీటిలో వస్తువులు, సేవల వ్యాపారం, కస్టమ్స్ ప్రక్రియలు, పెట్టుబడులు వంటి అంశాలు ఉన్నాయి.

టారిఫ్‌ల తగ్గింపు:

అమెరికా తమ ఎలక్ట్రిక్ వాహనాలు (EVలు), పారిశ్రామిక వస్తువులు, వైన్, పాల ఉత్పత్తులు, పెట్రోకెమికల్స్, ఆపిల్స్ వంటి వ్యవసాయ ఉత్పత్తులపై భారతదేశం టారిఫ్‌లను తగ్గించాలని కోరుతోంది. ప్రస్తుతం భారతదేశంలో ఈ ఉత్పత్తులపై టారిఫ్‌లు ఎక్కువగా ఉన్నాయి.

భారతదేశ ఆకాంక్షలు:

భారతదేశం తమ కార్మిక-ప్రధాన రంగాలైన వస్త్రాలు, దుస్తులు, రత్నాలు, ఆభరణాలు, తోలు ఉత్పత్తులు, రసాయనాలు, ప్లాస్టిక్స్, రొయ్యలు, నూనెగింజలు, ఉద్యానవన ఉత్పత్తులకు అమెరికా మార్కెట్‌లో సులభ ప్రాప్యతను కోరుకుంటోంది. అలాగే, సులభతర వీసా నిబంధనలు కూడా భారతదేశం అడుగుతోంది.

అమెరికా ఆందోళనలు:

భారతదేశంలో అధిక టారిఫ్‌లు, సుంకేతర అడ్డంకులు, ఇంటర్నెట్ షట్‌డౌన్‌లు, పాల ఉత్పత్తులకు సంబంధించిన నియంత్రణలు, వ్యవసాయ ఉత్పత్తుల దిగుమతులు, డేటా స్థానికీకరణ నియమాలు, మేధో సంపత్తి హక్కుల రక్షణ , వైద్య పరికరాల ధరల నియంత్రణలు వంటి అంశాలపై అమెరికా తన ఆందోళనలను వ్యక్తం చేసింది.

భారతదేశం ఆచితూచి వ్యవహరిస్తూనే, తన వాణిజ్య సంబంధాలను విస్తరించుకోవాలని.. అమెరికాపై ఆధారపడటాన్ని తగ్గించుకోవాలని చూస్తోంది. అదే సమయంలో చైనా నుండి మారే సరఫరా గొలుసుల ద్వారా ప్రయోజనం పొందాలని ఆశిస్తోంది.

ఈ అంశాలు ప్రస్తుతం భారత్-అమెరికా వాణిజ్య ఒప్పంద చర్చల్లో ప్రధానంగా ఉన్నాయి. ఒప్పందం కుదిరితే ఇరు దేశాలకు ప్రయోజనం చేకూరుతుందని అంచనా వేస్తున్నారు.