నకిలీ నోట్లకు చెక్ పెట్టిన కేంద్రం

భారత కరెన్సీ నోట్ల భద్రతను పటిష్టం చేయడానికి కేంద్ర ప్రభుత్వం కీలకమైన అడుగు వేసింది. దేశీయ కరెన్సీ నోట్ల ముద్రణ కోసం అవసరమైన అత్యంత కీలకమైన 'కలర్ షిఫ్టింగ్ పిగ్మెంట్' (రంగు మారే సిరా) కొనుగోలు ప్రక్రియను ప్రారంభించింది. సుమారు 9,900 కిలోల ఈ ప్రత్యేక సిరా పిగ్మెంట్‌ను విదేశీ సంస్థల నుండి కొనుగోలు చేయనున్నారు. అయితే ఈ టెండర్‌కు ప్రభుత్వం చాలా కఠినమైన నిబంధనలను విధించింది.

-చైనా, పాకిస్తాన్‌లతో సంబంధాలున్న సంస్థలకు నిషేధం

ఈ సాంకేతిక సిరా సరఫరా చేసే విదేశీ సంస్థలకు చైనా లేదా పాకిస్తాన్‌తో ఎలాంటి సంబంధాలు ఉండకూడదని ప్రభుత్వం స్పష్టం చేసింది. అంతేకాకుండా ఆ దేశాలలో గతంలో సేవలందించిన ఎలాంటి ఉద్యోగి కూడా భారత్ ప్రాజెక్టులో పాల్గొనడానికి అనుమతించబడరు. ఈ ప్రాజెక్టులో పనిచేసే సంస్థలకు విధించిన అదనపు నిబంధనలు చూస్తే.. చైనా/పాకిస్తాన్‌లో కార్యాలయాలు/ఆపరేషన్లు ఉన్నట్లయితే అవి భారత్‌కు సంబంధించిన కార్యకలాపాల నుండి పూర్తిగా వేరుగా ఉండాలి. చైనా లేదా పాకిస్తాన్ పౌరులు లేదా వారి నుంచి ఉద్భవించిన వ్యక్తులు ఈ ప్రాజెక్టులో ఏ రకంగానూ పనిచేయకూడదు. భారత ప్రాజెక్టుపై పని చేసిన వ్యక్తిని పాకిస్తాన్/చైనాలో పనిచేయడానికి పంపకూడదు.

-భద్రతా ప్రమాణాలు - గోప్యతకు అత్యధిక ప్రాధాన్యం

ఇది దేశ భద్రతకు సంబంధించిన సున్నితమైన అంశం కాబట్టి ఈ ప్రత్యేక సిరా గురించి ఇతర దేశాలకు గానీ, వ్యక్తులకు గానీ సరఫరా చేసే సంస్థలు ఎట్టి పరిస్థితుల్లోనూ వివరాలు వెల్లడించకూడదు. ఈ సిరా పిగ్మెంట్‌ను ఇతర దేశాలకు సరఫరా చేయడం కూడా పూర్తిగా నిషిద్ధం. ప్రత్యేకమైన రంగు మార్పు లక్షణంతో ఉండే ఈ సిరా నోట్లపై ముద్రించేటప్పుడు నకిలీ నోట్లను గుర్తించడంలో కీలక పాత్ర పోషిస్తుంది. ఇది నకిలీ నోట్లు తయారుచేయడాన్ని చాలా కష్టతరం చేస్తుంది.

ప్రాజెక్టును నిర్వహించనున్న సంస్థలు

ఈ ప్రత్యేక సిరాను కొనుగోలు చేసి వినియోగించే బాధ్యత క్రింది సంస్థలపై ఉంది. భారత రిజర్వ్ బ్యాంక్ నోట్ ముద్రణ ప్రైవేట్ లిమిటెడ్ (BRBNMPL), మైసూరుకు 5,940 కిలోల సిరా..సెక్యూరిటీ ప్రింటింగ్ అండ్ మింటింగ్ కార్పొరేషన్ ఆఫ్ ఇండియా లిమిటెడ్ (SPMCIL), దేవాస్, మధ్యప్రదేశ్ కు 3,960 కిలోల సిరా కేటాయిస్తారు.

-కంపెనీలపై అదనపు నిబంధనలు

టెండర్ దక్కించుకున్న కంపెనీలపై ప్రభుత్వం అదనపు నిబంధనలు విధించింది. బోర్డు డైరెక్టర్లు లేదా కీలక వ్యక్తులలో మార్పు వస్తే వెంటనే ప్రభుత్వంనకు సమాచారం ఇవ్వాలి. 10 శాతం లేదా అంతకంటే ఎక్కువ భాగస్వామ్యం కలిగిన ఎవరైనా మారితే, ప్రభుత్వానికి తెలియజేయాల్సిన బాధ్యత ఉంది. ఏదైనా సంస్థ భారత జాతీయ భద్రతకు వ్యతిరేకంగా పనిచేస్తే, టెండర్ రద్దు చేసే అధికారం ప్రభుత్వానికి ఉంటుందని స్పష్టం చేసింది.

ఈ తాజా టెండర్ ద్వారా భారత ప్రభుత్వం నోట్ల భద్రతను మరింతగా కాపాడడానికి గట్టి చర్యలు తీసుకుంటోంది. నకిలీ నోట్లు, దేశ ఆర్థిక వ్యవస్థను దెబ్బతీయవచ్చన్న ప్రమాదాన్ని దృష్టిలో పెట్టుకుని, చైనా, పాకిస్తాన్‌కు వ్యతిరేకంగా ఈ నిర్ణయం తీసుకోవడం భారత జాతీయ భద్రతా పరిధిలో సహజమే. ఈ విధంగా ప్రమాణాలను పెంచడం ద్వారా ప్రభుత్వం ముందుజాగ్రత్తలు తీసుకుంటోంది.