అమెరికాను దాటేసిన ఇండియా రోడ్ నెట్ వర్క్.. కానీ అదే మైనస్

భారతదేశం రహదారుల నిర్మాణ రంగంలో అద్భుతమైన పురోగతిని సాధిస్తోంది. ప్రతి క్షణం కిలోమీటర్లు పొడిగిస్తున్న రహదారుల వల్ల ప్రపంచవ్యాప్తంగా దృష్టిని ఆకర్షిస్తోంది. ప్రపంచంలోనే రెండవ అతిపెద్ద రోడ్ నెట్‌వర్క్‌ కలిగిన దేశంగా భారత్ ప్రస్తుతం నిలిచినప్పటికీ, అతి త్వరలోనే అమెరికాను కూడా దాటేస్తుందని నిపుణుల అంచనా. అయితే, ఇదంతా నంబర్ల పరంగా మాత్రమే. క్షేత్రస్థాయిలో పరిస్థితి ఎలా ఉంది అన్నదే అసలైన ప్రశ్న.

భారత రోడ్ విస్తీర్ణం

ప్రస్తుతం భారత్ వద్ద సుమారు 66 లక్షల కిలోమీటర్లకు పైగా రహదారులు ఉన్నాయి. ఇందులో ఎక్స్‌ప్రెస్ వేలు, నేషనల్ హైవేలు, స్టేట్ హైవేలు, గ్రామీణ రహదారులు, అర్బన్ రోడ్లు ఇలా అనేక విభాగాలు ఉన్నాయి. గత పదేళ్లలో నేషనల్ హైవేలు రెట్టింపు అయ్యాయి. భారత మల్టీ మోడల్ కనెక్టివిటీ ప్లాన్ దేశంలో వాణిజ్యాన్ని వేగవంతం చేయడానికి తీసుకున్న ఈ ప్రయత్నం పలు రాష్ట్రాల్లో మంచి ఫలితాలను ఇస్తోంది. భారతదేశం రోజుకు సగటున 30-40 కి.మీ. కొత్త హైవేలు నిర్మిస్తోంది.

- గ్రౌండ్ రియాలిటీ: సంఖ్యల వేగం vs నాణ్యత

అంకెల పరంగా భారత్ పరుగులు పెడుతున్నా, నాణ్యత విషయంలో మాత్రం గణనీయమైన సమస్యలు ఎదుర్కొంటోంది. మెయింటెనెన్స్ లోపాలు ఎక్కువయ్యాయి. నేషనల్ హైవే అయినా లోకల్ రోడ్లు అయినా.. వేసిన తర్వాత మరచిపోవడమే చాలామంది అధికారుల తంతు. గుంతలు, క్రాక్‌లు, నీటి నిల్వ వల్ల రహదారులు తక్కువ కాలంలోనే ధ్వంసమవుతున్నాయి. కొన్ని ప్రాంతాల్లో బైపాస్‌లు ఉన్నా, కనెక్టివిటీ లేక మూసివేసినట్లే ఉన్నాయి. నాణ్యమైన మెటీరియల్స్ వాడకపోవడం, కాంట్రాక్టర్ల నిర్లక్ష్యం, పర్యవేక్షణ లోపం ఇవన్నీ ప్రధాన కారణాలుగా ఉన్నాయి.

భారీగా విస్తరించిన రహదారులు ప్రయాణాల సౌకర్యానికి మార్గం కావాలి. కానీ రోడ్డు ప్రమాదాల రేటు భారీగా పెరుగుతోంది. సిగ్నల్స్ లేకపోవడం, స్పీడ్ బ్రేకర్లపై స్పష్టత లేకపోవడం, కంట్రోల్ లేకుండా ఉన్న ట్రాఫిక్ వల్ల ఎన్నో ప్రాణాలు పోతున్నాయి. జాతీయ రహదారులపై రోడ్డు మరమ్మతులు ఆలస్యంగా జరుగుతున్నాయి.

ముందుకెళ్లాలంటే... మెయింటెనెన్స్‌కి మొదటి స్థానం కావాలి. భవిష్యత్‌లో ప్రపంచవ్యాప్తంగా రహదారుల నెట్‌వర్క్‌లో అగ్రస్థానంలో ఉండాలంటే కేవలం నిర్మాణంతో సరిపోదు. నిరంతర పర్యవేక్షణ, సకాలంలో మరమ్మతులు, ప్రభావవంతమైన ట్రాఫిక్ మేనేజ్‌మెంట్, సురక్షిత డ్రైవింగ్ కోసం అవగాహన ఇవన్నీ తప్పనిసరి.

భారత్ రోడ్ నిర్మాణంలో అద్భుతం చేస్తోంది. ఇది అభివృద్ధి సూచికల్లో ఒకటి. కానీ ఈ నిర్మాణం ప్రయాణికులకు ప్రయోజనం కలిగించాలంటే దృక్పథం మారాలి. నాణ్యత, భద్రత, నిర్వహణపై పూర్తి దృష్టి పెట్టినప్పుడే మనం అమెరికాను గణాంకాల్లోనే కాదు, అనుభవంలో కూడా దాటగలుగుతాం. లేదంటే.. గుంతల దారిలోనే దేశ భవిష్యత్తు ప్రయాణించాల్సి వస్తుంది!