ప్రపంచమంతా ఒకటై.. పాకిస్థాన్‌కు చుక్కలు.. 33 దేశాలతో భారత్ భారీ దౌత్య కూటమి!

ఇది నిజంగా పాకిస్తాన్ కు గట్టి షాక్ అనే చెప్పాలి. దౌత్యపరంగా చుక్కలు చూపించేందుకు భారత్ నడుం బిగించింది. "ఆపరేషన్ సిందూర్ అవుట్‌రీచ్" పేరుతో ఒక సంచలన దౌత్య యుద్ధాన్ని మొదలుపెట్టింది. సీమాంతర ఉగ్రవాదానికి పాకిస్థాన్ ఇస్తున్న ప్రోత్సాహాన్ని అంతర్జాతీయ వేదికలపై ఎండగట్టడమే ఈ ఆపరేషన్ ముఖ్య ఉద్దేశ్యం. ఈ క్రమంలోనే భారతదేశం ఒక వ్యూహాత్మక అడుగు వేసింది. వివిధ పార్టీలకు చెందిన ఎంపీలు, మాజీ దౌత్యవేత్తలు, మేధావులతో కూడిన అఖిలపక్ష బృందాలను ప్రపంచవ్యాప్తంగా పంపడం మొదలుపెట్టింది. బుధవారం ఈ పర్యటన ప్రారంభమైంది.

మొదటి విడతలో భాగంగా రెండు బృందాలు బయలుదేరాయి

* సంజయ్ ఝా (జేడీయూ ఎంపీ) నేతృత్వంలోని బృందం: ఈ బృందంలో బీజేపీ ఎంపీలు అపరాజితా సారంగి, బ్రిజ్‌లాల్, హేమాంగ్ జోషి, ప్రధాన్ బారువా, తృణమూల్ కాంగ్రెస్ నుంచి అభిషేక్ బెనర్జీ, సీపీఎం నుంచి జాన్ బ్రిట్టాస్, కాంగ్రెస్ నేత సల్మాన్ ఖుర్షీద్, మాజీ దౌత్యవేత్త మోహన్ కుమార్ వంటి ప్రముఖులు ఉన్నారు. వీరు ఇండోనేసియా, మలేసియా, దక్షిణ కొరియా, జపాన్, సింగపూర్‌లలో పర్యటించనున్నారు.

* శ్రీకాంత్ షిండే (శివసేన ఎంపీ) నేతృత్వంలోని బృందం: ఈ బృందం డెమోక్రటిక్ రిపబ్లిక్ ఆఫ్ కాంగో, సియెర్రా లియోన్, లైబీరియా వంటి ఆఫ్రికన్ దేశాలకు వెళ్లనుంది.

మొత్తంగా ఏడు బృందాలను ఏర్పాటు చేశారు. విదేశీ వ్యవహారాల కార్యదర్శి విక్రమ్ మిస్రీ ఈ బృందాలకు పర్యటన ఉద్దేశ్యాలు, చర్చించాల్సిన అంశాలపై పూర్తి అవగాహన కల్పించారు.

ఆ 33 దేశాలే ఎందుకు? వ్యూహం ఏంటి?

భారతదేశం 33 దేశాలను ఎంచుకోవడం వెనుక బలమైన వ్యూహం ఉంది. బీజేపీ ఎంపీ అపరాజితా సారంగి ఈ విషయంపై స్పష్టత ఇచ్చారు. ఎంపిక చేసిన 33 దేశాల్లో 15 ఐక్యరాజ్యసమితి భద్రతా మండలిలో సభ్యదేశాలు. వీటిలో 5 శాశ్వత సభ్యదేశాలు, 10 తాత్కాలిక సభ్యదేశాలు ఉన్నాయి. భద్రతా మండలిలో పాకిస్థాన్ ఉగ్రవాదానికి మద్దతు ఇస్తున్న విషయంపై గట్టిగా వాదించడానికి ఇది ఒక కీలక అవకాశం. కొన్ని దేశాలు భవిష్యత్తులో భద్రతా మండలిలో చేరబోయేవి కావడంతో, వాటి మద్దతు ఇప్పుడే కూడగట్టుకోవడం భారత్‌కు ప్రయోజనకరం. అంతర్జాతీయ అంశాలపై భారత వాణికి మద్దతు ఇచ్చే దేశాలను ప్రత్యేకంగా ఎంచుకున్నారు. ఇది పాకిస్థాన్‌ను ఒంటరిని చేయడంలో సహాయపడుతుంది. ఈ బృందాలు పర్యటించే దేశాల్లో ఆయా దేశాల ప్రభుత్వాధినేతలు, పార్లమెంటేరియన్లు, మేధావులు, మీడియా ప్రతినిధులతో సమావేశమై పాక్ ప్రేరేపిత ఉగ్రవాదం వల్ల కలిగే నష్టం, అంతర్జాతీయ శాంతికి అది ఎలా ముప్పు వాటిల్లుతుందో వివరించనున్నారు.

దౌత్య యుద్ధానికి కారణం

ఈ దౌత్య యుద్ధానికి ఒక బలమైన నేపథ్యం ఉంది. ఇటీవల పహల్గాంపై జరిగిన దాడికి ప్రతీకారంగా భారత బలగాలు "ఆపరేషన్ సిందూర్" పేరుతో పాక్ ఆక్రమిత కాశ్మీర్ (PoK)తో పాటు పాకిస్థాన్‌లోని ఉగ్ర శిబిరాలను ధ్వంసం చేశాయి. ఆ తర్వాత పాకిస్థాన్ రెచ్చగొట్టే చర్యలను భారత బలగాలు సమర్థవంతంగా తిప్పికొట్టాయి. సైనికపరంగా పాకిస్థాన్‌కు గట్టి జవాబు ఇచ్చిన తర్వాత, ఇప్పుడు దౌత్యపరంగా కూడా దానిని ఒంటరిని చేయాలని భారత్ కృతనిశ్చయంతో ఉంది. ఇది కేవలం పాకిస్థాన్ పైనే కాకుండా, ఉగ్రవాదానికి మద్దతు ఇచ్చే ఏ దేశమైనా అంతర్జాతీయ సమాజం ముందు దోషిగా నిలబడాలనే సందేశాన్ని ఇస్తుంది.