పాక్ తో ఫైటింగ్ : అమెరికా పాత్ర లేదు.. ట్రంప్ ఏం చేయలేదు.. గాలి తీసేసిన మోడీ

కాశ్మీర్‌లో పహల్గాం ఉగ్రదాడి తర్వాత భారత్ చేపట్టిన "ఆపరేషన్ సింధూర్", అలాగే ఆ తర్వాత తీసుకున్న కాల్పుల విరమణ నిర్ణయాల వెనుక అమెరికా పాత్ర ఉందన్న ప్రచారంపై కేంద్ర ప్రభుత్వం స్పష్టతనిచ్చింది. ఈ ప్రచారంలో ఎలాంటి వాస్తవం లేదని తేల్చిచెప్పింది. ముఖ్యంగా అమెరికా అధ్యక్షుడు డొనాల్డ్ ట్రంప్ తాను భారత్-పాక్ యుద్ధాన్ని ఆపానని, చర్చల తర్వాత కాల్పుల విరమణకు అంగీకరించారని గతంలో పలుమార్లు చేసిన ట్వీట్లు, ప్రకటనలు ఇప్పుడు నిరాధారమైనవిగా తేలాయి.

విదేశీ వ్యవహారాల పార్లమెంటరీ కమిటీతో జరిగిన భేటీలో కేంద్రం తరఫున విదేశీ వ్యవహారాల కార్యదర్శి విక్రమ్ మిస్రీ ఈ విషయాలపై క్లారిటీ ఇచ్చారు. ఈ కమిటీకి కాంగ్రెస్ ఎంపీ శశిథరూర్ నేతృత్వం వహిస్తున్నారు. ఆపరేషన్ సింధూర్‌లో కానీ, కాల్పుల విరమణలో కానీ అమెరికా పాత్ర ఏమీ లేదని కేంద్రం ఈ కమిటీకి స్పష్టం చేసింది. దీంతో ట్రంప్‌తో పాటు విపక్షాలు చేస్తున్న ప్రచారంలో ఎలాంటి వాస్తవం లేదని తేలిపోయింది.

పహల్గాం దాడికి ప్రతిగా ఆపరేషన్ సింధూర్‌ను భారత్ స్వయంగా చేపట్టిందని విక్రమ్ మిస్రీ తెలిపారు. కాల్పుల విరమణకు సంబంధించి మాత్రం పాకిస్తాన్ డైరెక్టర్ జనరల్ ఆఫ్ మిలిటరీ ఆపరేషన్స్ (DGMO) నుండి విజ్ఞప్తి వచ్చిందని ఆయన వెల్లడించారు. పాకిస్తాన్ DGMO ఢిల్లీలోని భారత DGMOని సంప్రదించి కాల్పుల విరమణకు అభ్యర్థించినట్లు మిస్రీ వివరించారు. పాక్ DGMO ఫోన్ కాల్ తర్వాత మే 12న భారత్, పాకిస్తాన్ యుద్ధాన్ని విరమించుకోవడానికి అంగీకరించాయని ఆయన చెప్పారు.

అయితే, అమెరికా అధ్యక్షుడు ట్రంప్ పాకిస్తాన్ ప్రభుత్వాన్ని సంప్రదించి, కాల్పుల విరమణకు భారత్‌ను కోరాలని సూచించినట్లు కేంద్రం భావిస్తున్నట్లు సమాచారం. అందుకే ట్రంప్ ఆ తర్వాత పదే పదే తానే యుద్ధాన్ని విరమింపజేసినట్లు చెప్పుకుంటున్నారని కేంద్రం అభిప్రాయపడుతోంది. వాణిజ్యాన్ని అడ్డుపెట్టి ఇరుదేశాలను కాల్పుల విరమణకు అంగీకరింపజేసినట్లు ట్రంప్ ఇప్పటికే పలుమార్లు వెల్లడించారు. అయితే పాకిస్తాన్‌తో కాల్పుల విరమణకు భారత్ ఎలాంటి వాణిజ్య ప్రయోజనాలను కోరలేదని కేంద్రం పార్లమెంట్ కమిటీకి స్పష్టం చేసినట్లు తెలుస్తోంది.

ఈ పరిణామం ట్రంప్ గత ప్రకటనలను ప్రశ్నించడమే కాకుండా, కీలకమైన రక్షణ , విదేశీ వ్యవహారాల నిర్ణయాలలో భారతదేశం స్వయంప్రతిపత్తిని స్పష్టం చేస్తుంది. ఇది భారతదేశం యొక్క విదేశాంగ విధానంలో ఎటువంటి బాహ్య జోక్యం లేదని, దేశం తన జాతీయ ప్రయోజనాల ఆధారంగా మాత్రమే నిర్ణయాలు తీసుకుంటుందని పునరుద్ఘాటిస్తుంది.