పాక్ దాడిని ఇలా తిప్పికొట్టాం.. ఇండియన్ ఆర్మీ వీడియో వైరల్

ఇటీవల పాక్-భారత్ మధ్య నెలకొన్న ఉద్రిక్తతలు - భారత సైన్యం చేపట్టిన 'ఆపరేషన్ సింధూర్' నేపథ్యంలో దేశ రక్షణ వ్యవస్థ పటిష్టతపై ప్రపంచ దేశాల నుంచి ప్రశంసలు వ్యక్తమవుతున్నాయి. ఈ నేపథ్యంలో భారత రక్షణ వ్యవస్థ ఎంత సమర్థవంతంగా పనిచేస్తుందో తెలియజేస్తూ మన డిఫెన్స్ సిస్టమ్‌లోని కీలక ఆయుధాలైన ఆకాశ్ మిస్సైల్స్ , L-70 ఎయిర్ డిఫెన్స్ గన్స్ పనితీరును వివరిస్తూ ఇండియన్ ఆర్మీ తాజాగా డెమో వీడియోలను విడుదల చేసింది.

- రక్షణ కవచం - ఆకాశ్, L-70 గన్స్

దేశ వైమానిక భద్రతలో ఆకాశ్ మిస్సైల్స్, L-70 ఎయిర్ డిఫెన్స్ గన్స్ కీలక పాత్ర పోషిస్తాయి. శత్రు క్షిపణులు, డ్రోన్ దాడులను సమర్థవంతంగా ఎదుర్కోవడంలో ఇవి ముందుంటాయి. భారత సైన్యం విడుదల చేసిన డెమో వీడియోలలో వీటి పనితీరును స్పష్టంగా చూపించారు. ముఖ్యంగా, ఇటీవల పాకిస్థాన్ నుంచి వచ్చిన క్షిపణులు, డ్రోన్ దాడుల నుంచి పంజాబ్‌లోని అమృత్‌సర్ స్వర్ణదేవాలయాన్ని ఎలా కాపాడగలిగామో ఈ వ్యవస్థల సాయంతోనే అని సైన్యం పేర్కొంది. ఇది మన వైమానిక రక్షణ సామర్థ్యానికి నిదర్శనం.

- ఏడీ గన్‌ తో సైన్యం వీడియో సందేశం

ఈ వీడియోలతో పాటు, పశ్చిమ కమాండ్ అధికారులు ఒక ప్రత్యేక వీడియోను సోషల్ మీడియాలో పంచుకున్నారు. ఏడీ గన్ లతో కూడిన ఈ వీడియో ఎయిర్ డిఫెన్స్ గన్నర్ రూపొందించబడింది. ఇది అత్యంత కచ్చితత్వంతో కూడిన వైమానిక దాడులను ఎలా నిర్వహిస్తుందో చూపించింది. కూలిపోయిన పాకిస్థానీ డ్రోన్‌లను ఆర్మీ సిబ్బంది సేకరించడం, దాడి సమయంలో సైన్యం యొక్క అప్రమత్తత వంటి దృశ్యాలు ఈ వీడియోలో ఉన్నాయి. "దేశం ప్రశాంతంగా నిద్రపోవడానికి తాము మేల్కొని ఉన్నామని, నిరంతరం అప్రమత్తంగా ఉంటూ భూమి నుంచి ఆకాశాన్ని రక్షిస్తున్నామని" సైన్యం ఈ వీడియో ద్వారా బలమైన సందేశం ఇచ్చింది. జాతీయ భద్రత పట్ల తమ నిబద్ధతను పునరుద్ఘాటించింది. శత్రువులను బూడిద చేసే వరకు తాము విశ్రమించమని స్పష్టం చేసింది.

- పహల్గాం దాడికి ప్రతీకారం - ఆపరేషన్ సింధూర్

భారత సైన్యం ఈ డెమోలు, వీడియోలను విడుదల చేయడానికి ప్రధాన నేపథ్యం పహల్గాం ఉగ్రదాడికి ప్రతీకారంగా చేపట్టిన 'ఆపరేషన్ సింధూర్'. మే 7న భారత ఆర్మీ, ఎయిర్ ఫోర్స్, నేవీ బలగాలు సంయుక్తంగా పాకిస్థాన్‌లోని ఉగ్ర స్థావరాలపై మెరుపు దాడులు నిర్వహించాయి. ఈ ఆపరేషన్‌లో భాగంగా పాక్ ఆక్రమిత కశ్మీర్ సహా పాకిస్థాన్‌లోని ఉగ్ర మౌలిక సదుపాయాలు, భారత్‌పై సీమాంతర ఉగ్రదాడులకు కుట్ర పన్నుతున్నట్లు భావిస్తున్న మొత్తం తొమ్మిది స్థావరాలను లక్ష్యంగా చేసుకొని క్షిపణులతో దాడి చేశాయి. ఈ దాడులు అత్యంత కచ్చితత్వంతో జరిగినట్లు సైన్యం వెల్లడించింది.

ఆపరేషన్ సింధూర్‌కు సంబంధించిన పలు వీడియోలను సైన్యం ఇప్పటికే విడుదల చేయగా, తాజాగా ఏడీ గన్నర్‌పై రూపొందించిన వీడియో వైరల్ అయింది. దేశం కోసం సైనికులు చేస్తున్న త్యాగాలను, భారత సైన్యం యొక్క ధైర్యసాహసాలను నెటిజన్లు పెద్ద ఎత్తున కొనియాడుతున్నారు. ఈ డెమోలు , వీడియోలు భారత రక్షణ వ్యవస్థ యొక్క అప్రమత్తతను, సామర్థ్యాన్ని, ఏదైనా ముప్పును ఎదుర్కోవడానికి సైన్యం ఎల్లప్పుడూ సిద్ధంగా ఉందనే బలమైన సందేశాన్ని స్పష్టంగా ఇస్తున్నాయి.