రాడార్లకు చిక్కని రహస్య యుద్ధ విమానం.. స్టెల్త్ టెక్నాలజీతో AMCA.. రక్షణ రంగంలో గేమ్ ఛేంజర్!

భారత ప్రభుత్వం దేశ రక్షణ రంగంలో ఆత్మనిర్భర్ భారత్ దిశగా మరో భారీ అడుగు వేసింది. దేశీయంగా అభివృద్ధి చేయనున్న 5వ తరం ఫైటర్ జెట్ ప్రాజెక్ట్ అడ్వాన్స్‌డ్ మీడియం కాంబాట్ ఎయిర్‌క్రాఫ్ట్ (AMCA)కు మంగళవారం (మే 27న) ఆమోదం తెలిపింది. ఈ నిర్ణయం దేశ రక్షణ సామర్థ్యాలకు కొత్త దిశానిర్దేశం చేయడమే కాకుండా, మన దేశీయ ఏరోస్పేస్ పరిశ్రమకు కూడా బలమైన పునాది వేస్తుంది. భారత వైమానిక దళం పోరాట సామర్థ్యాలను బలోపేతం చేయడానికి, దేశ రక్షణను పెంపొందించడానికి AMCA అభివృద్ధి ఒక ముఖ్యమైన ముందడుగు.

రక్షణ మంత్రిత్వ శాఖ తెలిపిన వివరాల ప్రకారం.. ఈ ప్రాజెక్ట్‌కు ఎరోనాటికల్ డెవలప్‌మెంట్ ఏజెన్సీ (ADA) నాయకత్వం వహిస్తుంది. ADA అనేది డీఆర్డీఓ (DRDO) ఆధ్వర్యంలో పనిచేసే సంస్థ. ఈ అధునాతన యుద్ధ విమానం నిర్మాణంలో హిందుస్థాన్ ఏరోనాటిక్స్ లిమిటెడ్ (HAL)తో పాటు, ఇప్పుడు ప్రైవేట్ కంపెనీలకు కూడా భాగస్వామ్యం అయ్యే అవకాశం లభిస్తుంది. త్వరలోనే దీని కోసం 'ఎక్స్‌ప్రెషన్ ఆఫ్ ఇంట్రెస్ట్' (EoI) అంటే ఆసక్తి వ్యక్తీకరణ పత్రాలను జారీ చేయనున్నారు. ఇది భారతీయ ప్రైవేట్ రక్షణ రంగానికి పెద్ద ప్రోత్సాహం.

AMCA ప్రాజెక్ట్ ద్వారా భారతదేశం అమెరికా, రష్యా, చైనా వంటి అగ్రదేశాల సరసన నిలిచి, ప్రపంచ స్థాయి ఫైటర్ జెట్ తయారీ దేశంగా అవతరించడానికి సిద్ధమవుతోంది. అంతేకాకుండా, భారతదేశం తీసుకున్న ఈ నిర్ణయం ప్రపంచంలోని అగ్రరాజ్యాలకు ఒక స్పష్టమైన సందేశాన్ని పంపుతోంది. భారత్ ఇక 5వ తరం యుద్ధ విమానాలను కొనుగోలు చేయదు. మనమే స్వయంగా తయారు చేస్తాం. ఇది కేవలం సాంకేతిక సామర్థ్యం మాత్రమే కాదు. దేశం ఆత్మవిశ్వాసాన్ని చాటి చెబుతోంది.

AMCA కేవలం చైనా జె-20 (J-20), పాకిస్థాన్ జేఎఫ్-17 బ్లాక్-III (JF-17 Block-III) వంటి యుద్ధ విమానాలకు సవాలు విసరడమే కాకుండా, భారతదేశాన్ని స్వదేశీ స్టెల్త్ ఫైటర్ జెట్ క్లబ్‌లోకి చేరుస్తుంది. దీనితో భారతదేశానికి ఆత్మనిర్భరతతో పాటు, లేటెస్ట్ టెక్నాలజీల వ్యూహాత్మక ప్రయోజనం లభిస్తాయి. భవిష్యత్ యుద్ధాలకు సన్నద్ధం కావడంలో ఇది కీలక పాత్ర పోషిస్తుంది.

AMCA ప్రాజెక్ట్ గురించి ముఖ్యమైన విషయాలు

ఆమోదం, బడ్జెట్: ఏప్రిల్ 2024లో రక్షణ మంత్రిత్వ శాఖ (CCS) ఈ ప్రాజెక్ట్‌కు రూ.15,000 కోట్ల బడ్జెట్‌తో ఆమోదం తెలిపింది.

5వ తరం స్టెల్త్ ఫైటర్: AMCA భారతదేశం మొదటి 5వ తరం స్టెల్త్ ఫైటర్ జెట్ అవుతుంది. ఇది భారత వైమానిక దళం శక్తిని మరింత పెంచుతుంది.

డిజైన్, నిర్మాణం: విమానం డిజైన్‌ను ADA సిద్ధం చేయగా నిర్మాణ పనులు HAL పర్యవేక్షణలో జరుగుతాయి.

AMCA కొన్ని ప్రధాన లక్షణాలు

స్టెల్త్ టెక్నాలజీ: AMCAలో స్టెల్త్ టెక్నాలజీని ఉపయోగిస్తారు. ఇది శత్రువుల రాడార్ల నుంచి తప్పించుకోవడానికి సాయపడుతుంది.

అధిక వేగం (High Speed): AMCA అధిక వేగంతో ఎగరగలదు. ఇది శత్రు విమానాలను త్వరగా నాశనం చేయడానికి సాయపడుతుంది.

అధునాతన ఏవియానిక్స్ (Advanced Avionics): AMCAలో అధునాతన ఏవియానిక్స్ సిస్టమ్ ఉంటుంది. ఇది పైలట్‌కు మెరుగైన నియంత్రణను, నిర్ణయాలు తీసుకోవడంలో సాయపడుతుంది.

మల్టీ-రోల్ సామర్థ్యం (Multi-Role Capability): AMCAను వివిధ పాత్రలలో ఉపయోగించవచ్చు, అవి: వైమానిక యుద్ధం, భూమిపై దాడి, గూఢచార సమాచారం సేకరించడం.

దేశీయ సాంకేతికత (Indigenous Technology): AMCA అభివృద్ధిని భారత రక్షణ పరిశోధన అభివృద్ధి సంస్థ (DRDO), భారతీయ విమాన పరిశ్రమ చేపడుతున్నాయి. ఇది భారతదేశ రక్షణ ఉత్పత్తి సామర్థ్యాన్ని గణనీయంగా పెంచుతుంది.