నో చెప్పిన నా భార్యపై కక్షగట్టాడు.. మునీర్‌పై ఇమ్రాన్ ఖాన్ సంచలన ఆరోపణలు

పాకిస్థాన్ మాజీ ప్రధాని ఇమ్రాన్ ఖాన్ మరోసారి పాకిస్థాన్ ఆర్మీ చీఫ్ జనరల్ ఆసిం మునీర్‌పై తీవ్ర స్థాయిలో విరుచుకుపడ్డారు. మునీర్‌కు ప్రతీకార స్వభావం ఉందని, తనను ఐఎస్‌ఐ చీఫ్ పదవి నుంచి తొలగించినందుకు ప్రతీకారంగా తన భార్య బుష్రా బీబీని లక్ష్యంగా చేసుకుని ఇబ్బందులకు గురిచేశాడని ఇమ్రాన్ ఆరోపించారు. ప్రస్తుతం జైల్లో ఉన్న ఇమ్రాన్, తన కుటుంబంతో పాటు పార్టీ కార్యకర్తలను కూడా అన్యాయంగా జైల్లో పెడుతున్నారని వాపోయారు.

అసలు వివాదం ఏమిటి?

"ప్రధాని హోదాలో ఐఎస్‌ఐ డీజీ పదవి నుంచి జనరల్ మునీర్‌ను తొలగించాను. ఇదే విషయంపై మాట్లాడేందుకు నా భార్య బుష్రా బీబీని సంప్రదించేందుకు మధ్యవర్తుల ద్వారా ఆయన ప్రయత్నాలు చేశాడు. అటువంటి వాటిలో జోక్యం చేసుకోనని, తనను సంప్రదించవద్దని నా భార్య కరాఖండీగా పేర్కొంది. దాంతో ఆమెకు అన్యాయంగా 14 నెలల శిక్ష విధించి, జైల్లోనూ అమానవీయంగా ప్రవర్తించాడు. దాని వెనక ఆసిమ్ మునీర్ ప్రతీకార స్వభావం స్పష్టంగా కనిపిస్తోంది" అని ఇమ్రాన్ ఖాన్ పేర్కొన్నారు.

వ్యక్తిగత ప్రతీకారమా?

ఇమ్రాన్ ఖాన్ వ్యాఖ్యలను బట్టి, జనరల్ మునీర్ తనపై వ్యక్తిగత ప్రతీకారం తీర్చుకుంటున్నాడని, అందులో భాగంగానే తన భార్యను టార్గెట్ చేశాడని స్పష్టంగా తెలుస్తోంది. "వ్యక్తిగత ప్రతీకారం కోసం తన భార్యను లక్ష్యంగా చేసుకున్న తీరు ఊహించనిది.. పాక్ నియంతృత్వ చీకటి రోజుల్లోనూ అలా జరగలేదు" అని మాజీ ప్రధాని ఆవేదన వ్యక్తం చేశారు. రాజకీయాలకు సంబంధం లేని తన భార్యపై అనేక కేసులు పెట్టారని, నెల రోజులుగా ఆమెతో భేటీ కూడా కావనివ్వడం లేదని ఇమ్రాన్ ఖాన్ అన్నారు.

"లండన్ ప్లాన్" ఆరోపణలు

మే 9, 2023న ఇమ్రాన్‌ను అరెస్టు చేసిన రోజు చెలరేగిన హింస చోటుచేసుకున్న ఘటన "లండన్ ప్లాన్"లో భాగంగానే జరిగిందని ఇమ్రాన్ ఖాన్ ఆరోపించారు. ఈ ఆరోపణలు పాకిస్థాన్ రాజకీయాల్లో మరింత ప్రకంపనలు సృష్టిస్తున్నాయి. ఈ పరిణామాలు పాకిస్థాన్ రాజకీయ భవిష్యత్తుపై ఎలాంటి ప్రభావం చూపుతాయో వేచి చూడాలి.