అర్ధరాత్రి బస్సులో పొగలు.. డ్రైవర్ ఏం చేశాడంటే..? పూర్తిగా దగ్ధమైన బస్సు..

వేసవి ఉగ్రరూపం దాలుస్తోంది. ఎండల తీవ్రత అంతకంతకు పెరుగుతోంది. దీంతో అగ్ని ప్రమాదాలు పెరుగుతుంటాయి. హైదరాబాద్‌లోని అత్యంత రద్దీ ప్రాంతమైన కేపీహెచ్‌బీ కాలనీ వద్ద నిన్న రాత్రి (ఏప్రిల్ 17) జరిగిన అగ్ని ఈ ప్రమాదంలో 18 మంది ప్రయాణికులు సురక్షితంగా బయటపడడం కేవలం ఆ దైవకృప, డ్రైవర్ సమయస్ఫూర్తి వల్లనే సాధ్యమైంది.

హైదరాబాద్ మహానగరంలో రాత్రివేళ ప్రయాణాలు చేసే వారికి ఈ ఘటన ఒక పీడకలగా మిగిలిపోయింది. భాగ్యనగరం నుంచి పశ్చిమ గోదావరి జిల్లాలోని పాలకొల్లుకు బయలుదేరిన ఒక ప్రైవేట్ ట్రావెల్స్ బస్సు, కేపీహెచ్‌బీ కాలనీ సమీపానికి చేరుకోగానే ఒక్కసారిగా అగ్నిప్రమాదానికి గురైంది. ఇంజన్ నుంచి పొగలు రావడం గమనించిన డ్రైవర్, ఏమాత్రం ఆలస్యం చేయకుండా బస్సును ఆపి ప్రయాణికులను కిందకు దింపడంతో ఒక పెద్ద ప్రాణ నష్టం తప్పింది. క్షణాల వ్యవధిలోనే బస్సు పూర్తిగా మంటల్లో చిక్కుకోవడం భయకంపితులను చేసింది.

సమయస్ఫూర్తితో స్పందించిన డ్రైవర్

రాత్రి పూట బస్సుల్లో ప్రయాణికులు నిద్రలో ఉండే అవకాశం ఉంటుంది. అలాంటి సమయంలో ప్రమాదాన్ని పసిగట్టడం చాలా కష్టం. పాలకొల్లు వెళ్తున్న ఈ బస్సులో సుమారు 18 మంది ప్రయాణికులు ఉన్నారు. బస్సు మెయిన్ రోడ్డుపై వెళ్తుండగా, డ్రైవర్ అద్దాల నుంచి వెనుక భాగాన పొగలు రావడం గమనించాడు. ఏదో లోపం ఉందని గ్రహించి, బస్సును రోడ్డు పక్కన ఆపి ‘అందరూ వెంటనే కిందకు దిగండి’ అని కేకలు వేశాడు. ప్రయాణికులందరూ తమ సామాను కూడా తీసుకోకుండా ప్రాణాలు రక్షించుకోవడానికి కిందకు దిగారు. వారు దిగిన ఐదు నిమిషాలకే మంటలు బస్సు మొత్తానికి వ్యాపించాయి. కేపీహెచ్‌బీ వంటి రద్దీ ప్రదేశంలో మంటలు ఆకాశాన్ని తాకడం, టైర్లు పేలుతున్న శబ్దాలు రావడంతో చుట్టుపక్కల వాహనదారులు, స్థానికులు తీవ్ర భయాందోళనలకు గురయ్యారు.

బస్సుల్లో భద్రత – ఒక ప్రశ్నార్థకం!

ఈ ప్రమాదం ప్రైవేట్ బస్సుల్లో ఉంటున్న భద్రతా ప్రమాణాలను మరోసారి తెరపైకి తెచ్చింది. ప్రతి వేసవిలో ఇలాంటి ప్రమాదాలు జరుగుతూనే ఉన్నా, నివారణ చర్యలు మాత్రం శూన్యమని విమర్శలు వస్తున్నాయి. వేసవిలో ఇంజిన్లు త్వరగా వేడెక్కుతాయి. దీనికి తోడు ఏసీ యూనిట్లలో లోపాలు లేదా వైరింగ్ షార్ట్ సర్క్యూట్ వల్ల ఇలాంటి మంటలు అంటుకుంటాయి. బస్సులను క్రమం తప్పకుండా సర్వీసింగ్ చేయకపోవడమే దీనికి ప్రధాన కారణం. నిబంధనల ప్రకారం ప్రతి బస్సులో అగ్నిమాపక యంత్రాలు ఉండాలి. కానీ, చాలా బస్సుల్లో అవి పనిచేసే స్థితిలో ఉండడం లేదు లేదంటే సిబ్బందికి వాటిని ఎలా వాడాలో తెలియడం లేదు. మంటలు వేగంగా వ్యాపించినప్పుడు ఎమర్జెన్సీ డోర్లు తెరుచుకోకపోతే పరిస్థితి భీభత్సంగా మారుతుంది. ఈ ఘటనలో అదృష్టవశాత్తు డోర్ ముందుగానే తెరిచి ఉండడంతో అంతా బయటపడ్డారు.

ప్రయాణికుల ఆందోళన

ప్రయాణికులు వేల రూపాయలు ఖర్చు చేసి ప్రైవేట్ బస్సుల్లో టికెట్లు కొంటారు. కానీ, వారి ప్రాణాలకు మాత్రం గ్యారెంటీ ఉండడం లేదు. ఆర్‌టీవో అధికారులు అప్పుడప్పుడు తనిఖీలు చేస్తున్నప్పటికీ, పాతబడిన బస్సులను, ఫిట్‌నెస్ లేని వాహనాలను యథేచ్ఛగా రోడ్లపై తిప్పుతున్నారనే ఆరోపణలు వస్తున్నాయి. రాత్రి సమయాల్లో ప్రయాణికుల భద్రతను పర్యవేక్షించేందుకు ప్రత్యేక బృందాలు ఉండాలని బాధితులు డిమాండ్ చేస్తున్నారు.

వేసవిలో ప్రయాణించేటప్పుడు ప్రయాణికులు అప్రమత్తంగా ఉండాలి. బస్సు ఎక్కగానే ఎమర్జెన్సీ ఎగ్జిట్ ఎక్కడుందో గమనించాలి. అద్దాలు పగలగొట్టే సుత్తి సీటు వద్ద ఉందో లేదో చూసుకోవాలి. పొగ వాసన రాగానే ఏమాత్రం ఆలస్యం చేయకుండా సిబ్బందిని అప్రమత్తం చేయాలి.

కేపీహెచ్‌బీ ఘటనలో ఏ ఒక్కరికీ ఎలాంటి గాయాలు కానీ కాకపోవడంతో అంతా ఊపిరి పీల్చుకున్నారు. కానీ, ప్రతిసారీ అదృష్టం కలిసొస్తుందని చెప్పలేం. ప్రైవేట్ ట్రావెల్స్ యజమానులు కేవలం లాభాల కోసమే కాకుండా, ప్రయాణికుల ప్రాణాలకు కూడా విలువ ఇవ్వాలి. ప్రభుత్వం కూడా నిబంధనలను కఠినతరం చేయాలి. ఈ ప్రమాదానికి అసలు కారణం ఏమిటనేది క్షుణ్ణంగా దర్యాప్తు చేసి, బాధ్యులైన ట్రావెల్స్ సంస్థపై కఠిన చర్యలు తీసుకోవాలని నగరవాసులు కోరుతున్నారు.