HCU విద్యార్థుల విషయంలో రేవంత్ సర్కార్ సంచలన నిర్ణయం

హైదరాబాద్ సెంట్రల్ యూనివర్సిటీ (హెచ్‌సీయూ) విద్యార్థులకు తెలంగాణ ప్రభుత్వం భారీ ఊరట కల్పించింది. కంచ గచ్చిబౌలి భూముల వ్యవహారానికి సంబంధించి విద్యార్థులపై నమోదైన కేసులను ఉపసంహరించుకుంటున్నట్లు రాష్ట్ర ప్రభుత్వం కీలక ప్రకటన చేసింది. ఈ మేరకు ఉప ముఖ్యమంత్రి మల్లు భట్టి విక్రమార్క సోమవారం కీలక ఆదేశాలు జారీ చేశారు. విద్యార్థులపై ఉన్న అన్ని కేసులను ఎత్తివేస్తున్నట్లు ఆయన స్పష్టం చేశారు.

గత కొంత కాలంగా కంచ గచ్చిబౌలి భూముల వ్యవహారం తెలంగాణలో తీవ్ర చర్చనీయాంశంగా మారింది. ఈ భూములను అభివృద్ధి పేరుతో విక్రయించేందుకు ప్రభుత్వం ప్రయత్నించగా, హెచ్‌సీయూ విద్యార్థులు తీవ్రంగా వ్యతిరేకించారు. కంచ భూములను అమ్మితే ఊరుకునేది లేదని వారు ప్రభుత్వాన్ని హెచ్చరించారు. ఈ క్రమంలోనే అక్కడ ప్రభుత్వం చేపట్టబోతున్న చర్యలను విద్యార్థులు కొద్ది రోజుల క్రితం అడ్డుకున్నారు. దీంతో వారిపై పోలీసులు కేసులు నమోదు చేశారు. ఈ కేసుల ఉపసంహరణతో విద్యార్థులకు ఊపిరి పీల్చుకున్నట్లయింది.

- మంత్రుల కమిటీ సమావేశంలో సానుకూల నిర్ణయం

హెచ్‌సీయూ కంచ గచ్చిబౌలి సమస్యపై తెలంగాణ ప్రభుత్వం ఏర్పాటు చేసిన మంత్రుల కమిటీ సోమవారం సెక్రటేరియట్‌లో సమావేశమైంది. ఈ సమావేశంలో ఏఐసీసీ తెలంగాణ ఇంచార్జ్ నటరాజన్‌తో పాటు పలువురు మంత్రులు పాల్గొన్నారు. యూనివర్సిటీస్ టీచర్స్ అసోసియేషన్, సివిల్ సొసైటీ సభ్యులు కూడా ఈ భేటీకి హాజరై తమ విజ్ఞప్తులను మంత్రుల కమిటీకి అందజేశారు.

టీచర్స్ అసోసియేషన్, సివిల్ సొసైటీ సభ్యులు విద్యార్థులపై నమోదైన కేసులను వెంటనే ఉపసంహరించుకోవాలని, యూనివర్సిటీ క్యాంపస్ నుంచి పోలీసు బలగాలను తొలగించాలని, అలాగే నిషేధాజ్ఞలను వెనక్కి తీసుకోవాలని కమిటీని కోరారు. ఈ విజ్ఞప్తుల నేపథ్యంలోనే ఆందోళనలో పాల్గొన్న విద్యార్థులపై ఇటీవల పెట్టిన అన్ని కేసులను ప్రభుత్వం ఉపసంహరించుకుంది. అంతేకాకుండా జ్యుడిషియల్ రిమాండ్‌లో ఉన్న ఇద్దరు విద్యార్థులకు సంబంధించిన కేసుల ఉపసంహరణకు తక్షణ చర్యలు తీసుకోవాలని సంబంధిత అధికారులను ఆదేశించింది.

-సుప్రీంకోర్టు ఆదేశాలతో ప్రభుత్వానికి ఎదురుదెబ్బ

ఇదిలా ఉండగా, కంచ భూముల వ్యవహారం సుప్రీంకోర్టు వరకు చేరింది. ఇటీవల ఈ విషయంపై విచారణ జరిపిన దేశ అత్యున్నత న్యాయస్థానం తెలంగాణ ప్రభుత్వంపై తీవ్ర ఆగ్రహం వ్యక్తం చేసింది. తదుపరి ఉత్తర్వులు వెలువడే వరకు ఆ భూముల్లో ఎలాంటి అభివృద్ధి పనులు చేపట్టవద్దని ప్రభుత్వాన్ని ఆదేశించింది.

కేవలం మూడు రోజుల్లో వంద ఎకరాల్లో చెట్లను నరికివేయడాన్ని సుప్రీంకోర్టు తీవ్రంగా తప్పుబట్టింది. "చట్టాన్ని మీ చేతుల్లోకి ఎలా తీసుకుంటారు?" అంటూ ప్రభుత్వాన్ని ప్రశ్నించింది. ఇది చాలా తీవ్రమైన విషయమని, అంత అత్యవసరం ఏముందని రాష్ట్ర ప్రభుత్వాన్ని నిలదీసింది.

మొత్తానికి హెచ్‌సీయూ విద్యార్థులపై నమోదైన కేసులను ఉపసంహరించుకోవాలని తెలంగాణ ప్రభుత్వం తీసుకున్న నిర్ణయం విద్యార్థులకు పెద్ద ఊరటనిచ్చింది. అయితే, కంచ భూముల వ్యవహారం ఇంకా సుప్రీంకోర్టు పరిధిలో ఉండటంతో, ఈ వివాదం ఏ మలుపు తిరుగుతుందో వేచి చూడాల్సి ఉంది.