రైల్ ఎక్కే దిగే గ్యాప్ లో 18 మందిపై కత్తితో దాడి.. ఎవరీ మహిళ?

రైల్వే స్టేషన్ లో ప్లాట్ ఫామ్ పై నిల్చున్న వారిపై ఉన్నఫలంగా కత్తితో దాడి మొదలైంది. అక్కడ నిల్చున్న వారిపై ఒక్కసారిగా ఓ మహిళ విచక్షణారహితంగా కత్తితో దాడి చేయడం మొదలుపెట్టింది! శుక్రవారం సాయంత్రం జర్మనీలోని హంబర్గ్ రైల్వే స్టేషన్ లో ఈ ఘటన జరిగింది. స్థానికంగా ఈ విషయం హాట్ టాపిక్ గా మారింది.

అవును... జర్మనీలో రెండో అతిపెద్ద నగరమైన హాంబర్గ్ డౌన్ టౌన్ లో ఉన్న రైల్వే స్టేషన్ లో ప్లాట్ ఫాఫమ్ పై ఉన్నవారిపై ఓ మహిళ కత్తితో విచక్షణారహితంగా దాడి చేయడం మొదలుపెట్టింది. ఈ ఘటనలో కనీసం 18 మంది గాయపడ్డారని జర్మనీకి చెందిన బిల్డ్ వార్తాపత్రిక తెలిపింది. వీరిలో నలుగురి పరిస్థితి విషమంగా ఉందని.. ఆరుగురు తీవ్రంగా గాయపడ్డారని తెలిపింది!

ఈ ఘటనతో రైల్వే స్టేషన్ లో ఒక్కసారిగా భయానక వాతావరణం ఏర్పడింది. రంగంలోకి దిగిన పోలీసులు ఓ అనుమానితురాలిని అదుపులోకి తీసుకున్నారు. ఈ ఘటన జరిగిన కొద్దిసేపటికే 39 ఏళ్ల మహిళను అరెస్ట్ చేశామని.. ఆమె ఒంటరిగానే ఈ దాడికి పాల్పడి ఉంటుందని భావిస్తున్నామని పోలీసులు తెలిపారు. అయితే.. ఈ దాడికి గల కారణాలు ఇంకా తెలియలేదు!

ఈ సందర్భంగా స్పందించిన హాంబర్గ్ పోలీసు ప్రతినిధి ఫ్లోరియన్ అబెన్సేత్... హాంబర్గ్ డౌన్ టౌన్ లో ఉన్న రైల్వే స్టేషన్ లోని 13, 14 ట్రాకుల మధ్య ప్లాట్ ఫారమ్ లపై ఉన్న వ్యక్తులను లక్ష్యంగా చేసుకుని ఈ దాడి జరిగిందని.. వేచి ఉన్న రైలులోకి ప్రయాణికులు ఎక్కుతున్నప్పుడు, రైలు నుంచి దిగుతున్నప్పుడు సాయంత్రం 6 గంటల ప్రాంతంలో ఈ దాడి జరిగిందని చెబుతున్నారు.

దీంతో... స్టేషన్ లో నాలుగు ట్రాక్ లు మూసివేయబడ్డాయి. మరికొన్న్ని రైళ్ల రాకపోకలు ఆలస్యమయ్యాయి. ఈ క్రమంలో... అదుపులోకి తీసుకొన్న మహిళ మానసిక క్షోభలో ఉందా.. లేక, ఈ ఘటన వెనుక మరేదైనా రాజకీయ ప్రేరణ ఉందా అనేది దర్యాప్తు చేస్తున్నామని అబెన్సేత్ అన్నారు.

కాగా ఈ ఏడాది ఫిబ్రవరిలో జర్మనీ సమాఖ్య ఎన్నికలకు కొన్ని రోజుల ముందు మ్యూనిచ్ లో జనంపైకి ఓ కారు దూసుకెళ్లిన సంగతి తెలిసిందే. ఆ ఘటనలో 30 మంది గాయపడ్డారు. ఆ ఘటనలో 24 ఏళ్ల ఆఫ్ఘన్ జాతీయుడు అయిన డ్రైవర్ ను పోలీసులు అదుపులోకి తీసుకొన్నారు.