H1B వీసా నిబంధనల మార్పు: భారత విద్యార్థులు, చిన్న కంపెనీలకు కష్టకాలమా?

అమెరికా వలస విధానాల్లో మరో సంచలనాత్మక మార్పు చర్చకు వస్తోంది. H1B వీసాల లాటరీ ప్రక్రియలో కీలక మార్పులను ప్రతిపాదిస్తూ రూపొందించిన నూతన నియమావళి, వేలాది మంది భారతీయ విద్యార్థుల, చిన్న సంస్థల ఉద్యోగులపై తీవ్ర ప్రభావం చూపే అవకాశం ఉంది.

జీతాల ఆధారంగా H1B లాటరీ ప్రాధాన్యత!

ఇప్పటివరకు, H1B లాటరీ ప్రక్రియలో అభ్యర్థులందరినీ సమానంగా పరిగణించి యాదృచ్ఛికంగా ఎంపిక చేసేవారు. అయితే, కొత్త ప్రతిపాదన ప్రకారం, ఇకపై జీతం ఆధారంగా ప్రాధాన్యతనిచ్చే విధంగా వ్యవస్థ మారనుంది. ఉదాహరణకు, లెవల్ 4 జీతం (అధిక జీతం) పొందే వారికి నాలుగు ఎంట్రీలు లభిస్తే, లెవల్ 1 లో ఉన్నవారికి కేవలం ఒక్క ఎంట్రీ మాత్రమే దక్కుతుంది. ఈ మార్పు వల్ల ఎక్కువ జీతాలు అందుకునే వారికి వీసా గెలుచుకునే అవకాశాలు గణనీయంగా పెరుగుతాయి.

పెద్ద కంపెనీలకు లాభం, స్టార్టప్‌లకు నష్టం

ఈ మార్పుల వల్ల పెద్ద కంపెనీలు, ముఖ్యంగా టెక్ రంగంలో ఉన్నవి.. తమ ఉద్యోగులకు ఎక్కువ జీతాలు చెల్లించి ఎక్కువ వీసాలను గెలుచుకునే అవకాశం పొందుతాయి. ఇది వారికి నైపుణ్యం కలిగిన విదేశీ శ్రామికశక్తిని సులభంగా పొందడంలో సహాయపడుతుంది. అయితే చిన్న సంస్థలు, స్టార్టప్‌లు, లాభాపేక్షలేని సంస్థలు ఎక్కువ జీతాలు ఇవ్వలేకపోవడం వల్ల నష్టపోతాయి. ఈ సంస్థలకు విదేశీ ప్రతిభావంతులపై ఆధారపడే అవసరం ఎక్కువగా ఉంటుంది, కానీ కొత్త నిబంధనలు వారికి ఆ అవకాశం లేకుండా చేయవచ్చు.

భారతీయ విద్యార్థులపై తీవ్ర ప్రభావం

అమెరికాలో ఉన్న భారతీయ విద్యార్థులు, ముఖ్యంగా STEM (సైన్స్, టెక్నాలజీ, ఇంజనీరింగ్, మ్యాథమెటిక్స్) రంగాల్లో ఉన్నవారు, తమ మొదటి ఉద్యోగాల్లో తక్కువ జీతాలతో ప్రారంభించడం సర్వసాధారణం. వీరు సాధారణంగా లెవల్ 1 లేదా లెవల్ 2 జీతాల కేటగిరీలోకి వస్తారు. అందువల్ల, ఈ కొత్త సిస్టమ్ ప్రకారం వారికి H1B వీసా పొందే అవకాశాలు గణనీయంగా తగ్గిపోతాయి. ఇది వారి భవిష్యత్తు ప్రణాళికలపై తీవ్ర ప్రభావం చూపుతుంది.

ఇది కొత్త ఆలోచన కాదు

ఇలాంటి ప్రతిపాదన గతంలో ట్రంప్ ప్రభుత్వం కాలంలోనే వచ్చింది, కానీ దానిని కోర్టు తిరస్కరించింది. అప్పట్లో మైక్రోసాఫ్ట్ వంటి పెద్ద సంస్థలు దీనికి వ్యతిరేకంగా నిలిచాయి. ప్రతిభ, నైపుణ్యాల కన్నా జీతం ఆధారంగా ఎంపిక చేస్తే అమెరికా తన ప్రతిభావంతుల బలాన్ని కోల్పోతుందని వారు హెచ్చరించారు.

భవిష్యత్‌పై అనిశ్చితి

ఈ మార్పు అమలైతే, పెద్ద కంపెనీలు.. చిన్న కంపెనీల మధ్య వ్యత్యాసం మరింత పెరుగుతుంది. విద్యార్థులు, కొత్తగా ఉద్యోగంలోకి వస్తున్నవారు, చిన్న వ్యాపారాల్లో పనిచేసే వారు మరింత అనిశ్చితికి లోనవుతారు. భారతీయ కుటుంబాలు తమ పిల్లల ఉన్నత విద్య కోసం చేసిన ప్రయాసలకు ఇది పెద్ద ఎదురుదెబ్బగా నిలుస్తుంది.

ప్రతిభకు విలువ ఇవ్వాలి, జీతానికి కాదు

నూతన ఆవిష్కరణలు ఎప్పుడూ అత్యధిక జీతం ఇచ్చే సంస్థల నుంచే వస్తాయనే నిబంధన లేదు. అందుకే, H1B లాటరీ విధానంలో అభ్యర్థులను వారి జీతం ఆధారంగా కాకుండా, నైపుణ్యం, విద్యార్హతలు, అనుభవం ఆధారంగా అంచనా వేయాల్సిన అవసరం ఉంది. కేవలం జీతం ఆధారంగా ప్రాధాన్యత ఇవ్వడం అన్యాయమే కాదు, అమెరికా వలస విధానాల నిజమైన ఉద్దేశ్యానికి విరుద్ధం కూడా. ఈ మార్పులు అమలులోకి వస్తే, అది అమెరికా ఆర్థిక వ్యవస్థకు, ముఖ్యంగా స్టార్టప్‌ల అభివృద్ధికి, దీర్ఘకాలంలో నష్టం కలిగించవచ్చు.