కలకలం : అమెరికాలో గ్రీన్ కార్డు హోల్డర్లను అరెస్ట్ చేస్తున్న ఇమిగ్రేషన్ అధికారులు

అమెరికాలో శాశ్వత నివాస హోదా (గ్రీన్‌కార్డు) కలిగిన వారికి గతంలో జరిగిన చిన్నపాటి నేరాలు ఇప్పుడు పెద్ద సమస్యలుగా మారుతున్నాయి. ముఖ్యంగా ట్రంప్ పరిపాలనలో అమలులోకి వచ్చిన కఠినమైన వీసా నిబంధనలు ఇప్పుడు వారి పాలిట శాపాలు అవుతున్నారు. గ్రీన్‌కార్డు హోల్డర్లు విదేశాల నుంచి తిరిగి అమెరికాలోకి ప్రవేశించే సమయంలో ఇమ్మిగ్రేషన్ అధికారుల నుంచి అరెస్టులకు దారితీస్తున్నాయి. పాత నేర రికార్డుల ఆధారంగా ఈ అరెస్ట్ లు జరుగుతున్నాయి.

-పాత నేరం – కొత్త చిక్కులు

వాషింగ్టన్ రాష్ట్రంలోని టాకోమా ICE డిటెన్షన్ సెంటర్‌లో ఇటీవల జరిగిన ఒక ఘటన ఈ పరిస్థితి తీవ్రతను తెలియజేస్తుంది. ఫిలిప్పీన్స్ మూలాలున్న 64 ఏళ్ల లెవెలిన్ డిక్సన్ అనే మహిళ 50 సంవత్సరాలుగా అమెరికాలో నివసిస్తున్నారు. 2001లో జరిగిన ఒక చిన్న నేరం.. పని చేస్తున్న చోట చోరీ ఆమెకు ఇప్పుడు తీవ్రమైన సమస్యగా మారింది. అప్పట్లో ఆమెకు హాఫ్‌వే హౌస్ శిక్ష విధించబడింది. ఆ తర్వాత ఆమె మంచి పౌరురాలిగా జీవించినప్పటికీ, ట్రంప్ పరిపాలనలో విమానాశ్రయంలోనే ఆమెను అరెస్టు చేసి, మూడు నెలల పాటు నిర్బంధించారు.

డిక్సన్ తరఫు న్యాయవాది బెంజమిన్ ఓసోరియో మాట్లాడుతూ తాను 12 సంవత్సరాలుగా ఇమ్మిగ్రేషన్ న్యాయవాదిగా పనిచేస్తున్నా, గతంలో ఇలాంటి కేసులు చాలా తక్కువగా ఉండేవని తెలిపారు. అయితే, ఇప్పుడు ఒక్క ఫిబ్రవరి నెలలోనే ఇలాంటి కేసులు మరికొన్ని వచ్చాయని, ఇది ట్రంప్ పరిపాలనలో జరుగుతున్న వైనాన్ని కళ్లకు కట్టింది.

ట్రంప్ పరిపాలనకు మద్దతునిచ్చే విధాన నిపుణురాలు జెస్సికా వాన్ ప్రకారం, గ్రీన్‌కార్డు పొందిన తర్వాత కూడా మీరు శాశ్వతంగా అమెరికా పౌరులు కారు. మీపై ఎలాంటి నేర రికార్డు ఉన్నా అది పరిగణనలోకి తీసుకోబడుతుంది. ఇమ్మిగ్రేషన్ నిపుణులు గ్రీన్‌కార్డు హోల్డర్లకు ఒక ముఖ్యమైన సూచన చేస్తున్నారు. పాత కేసులను 'ఎక్స్‌పంజ్' చేయించినా ప్రయోజనం ఉండకపోవచ్చు. ఎందుకంటే అధికారులకు ఆ సమాచారం అందుబాటులో ఉంటుంది. కాబట్టి, విదేశీ ప్రయాణానికి ముందు ఒక అర్హత కలిగిన న్యాయవాది సలహా తీసుకోవడం, సరైన ప్రణాళికను కలిగి ఉండటం చాలా అవసరం.

- ప్రస్తుతం పరిస్థితి

ప్రస్తుతం 13 మిలియన్ల గ్రీన్‌కార్డు హోల్డర్లలో చాలా తక్కువ మందికి మాత్రమే తిరిగి వచ్చేటప్పుడు ఇలాంటి సమస్యలు ఎదురవుతున్నాయి. అయితే ఎవరి పరిస్థితి ఎప్పుడు మారుతుందో చెప్పలేరు. అలాంటి వారికి మాత్రమే దీని తీవ్రమైన ప్రభావం పూర్తిగా తెలుస్తుంది.

అమెరికాలో గ్రీన్‌కార్డు కలిగిన వ్యక్తులు ఇప్పుడు సురక్షితంగా లేరు. గతంలో చేసిన చిన్నపాటి నేరాలు కూడా తిరిగి తెరపైకి వచ్చి, వారికి అమెరికాలోకి తిరిగి ప్రవేశం నిరాకరించే అవకాశం ఉంది. కాబట్టి, విదేశాలకు వెళ్లే ముందు తప్పనిసరిగా న్యాయ సలహా తీసుకోవడం, జాగ్రత్తగా ఉండటం చాలా ముఖ్యం. మీ గ్రీన్‌కార్డు స్థితిపై ఏమైనా ఆందోళనలు ఉన్నాయా లేదా మీ పాత క్రిమినల్ రికార్డు మీ ప్రయాణాలపై ఎలాంటి ప్రభావం చూపుతుందో తెలుసుకొని మరీ ప్రయాణాలు పెట్టుకుంటే మంచిదని నిపుణులు సూచిస్తున్నారు.