దేశ వ్యతిరేక పోస్టులు చేస్తే ఇక కఠిన చర్యలు

దేశానికి వ్యతిరేకంగా సోషల్ మీడియా, వెబ్‌సైట్లలో ప్రచురిస్తున్న కంటెంట్‌పై కేంద్రం కఠినంగా స్పందించేందుకు సిద్ధమవుతోంది. ఈ మేరకు కేంద్ర హోంశాఖ నూతన పాలసీని రూపొందించడంపై పని చేస్తున్నట్టు సమాచారం. అభద్రతకు కారణమయ్యే విధంగా, భారత సార్వభౌమత్వం, సమగ్రత, దేశ భద్రతపై విఘాతం కలిగించే పోస్ట్‌లను గుర్తించి తగిన చర్యలు తీసుకునేందుకు ప్రభుత్వం దృష్ఠిపాతం మార్చినట్టు తెలుస్తోంది.

-ప్రత్యేకంగా టీమ్ ఏర్పాటు

ఈ చర్యల అమలుకు కేంద్రం ప్రత్యేకంగా ఒక కమిటీని ఏర్పాటు చేయనుంది. ఈ టీమ్‌కు ఇంటెలిజెన్స్ బ్యూరో (IB), నేషనల్ ఇన్వెస్టిగేషన్ ఏజెన్సీ (NIA), హోంశాఖ టెక్నికల్ విభాగాలు, సైబర్ సెల్ అధికారులు సభ్యులుగా ఉండనున్నారు. వీరు సోషల్ మీడియా ప్లాట్‌ఫామ్‌లు, వెబ్‌సైట్లపై ఉన్న కంటెంట్‌ను స్కాన్ చేసి, దేశద్రోహానికి ప్రేరేపించే, విద్వేషాన్ని రెచ్చగొట్టే, తప్పుడు సమాచారం వ్యాప్తి చేసే పోస్ట్‌లను గుర్తిస్తారు.

అకౌంట్లు బ్లాక్, కేసులు నమోదు

గుర్తించినట్లయితే సంబంధిత అకౌంట్లను వెంటనే బ్లాక్ చేయించడంతో పాటు, ఆ కంటెంట్‌ను పోస్ట్ చేసినవారిపై ఫిర్యాదు నమోదు చేసి చట్టపరమైన చర్యలు తీసుకోనున్నారు. ఐటీ యాక్ట్, దేశద్రోహ నిబంధనలు, యూఏపీఏ వంటి చట్టాల కింద కేసులు నమోదు చేసే అవకాశం ఉంది.

-స్వేచ్ఛ vs బాధ్యత

ఈ చర్యల నేపథ్యంలో సామాన్య ప్రజల్లో స్వేచ్ఛకు భంగం కలుగుతుందా అనే ప్రశ్నలు కూడా తెరపైకి వచ్చాయి. అయితే అధికారులు అంటున్నది ఏంటంటే “వ్యక్తిగత అభిప్రాయానికి దేశం ఎప్పుడూ గౌరవం ఇస్తుంది. కానీ అది హద్దులు దాటి, దేశ సమగ్రతను దెబ్బతీసేలా ఉంటే మాత్రం సహించం.”

-ముందస్తుగా హెచ్చరికలు

ఇకపై దేశ వ్యతిరేక కంటెంట్‌ను షేర్ చేసే ముందు ప్రజలు పదిసార్లు ఆలోచించాలని ప్రభుత్వం సూచిస్తోంది. తప్పుగా వినిపించే వీడియోలు, పోస్టులు, నకిలీ వార్తలు వైరల్ చేయడం వలన దేశ భద్రతకు ప్రమాదం ఏర్పడే అవకాశాలున్నాయి.

ఇది సాంకేతికంగా వేగంగా అభివృద్ధి చెందుతున్న కాలం. సమాచారాన్ని పంచుకోవడంలో ఏ మాత్రం జాప్యం ఉండదు. అటువంటి సందర్భాల్లో సామాజిక బాధ్యతతో వ్యవహరించకపోతే దాని ప్రభావం తీవ్రంగా ఉంటుంది. అందువల్లే కేంద్రం కఠినంగా వ్యవహరించాలని నిర్ణయించుకోవడం గమనార్హం. ప్రజల భద్రత, దేశ భద్రత రెండింటినీ సమతూకంగా కాపాడటం ప్రభుత్వ లక్ష్యం.సామాజిక మాధ్యమాల్లో స్వేచ్ఛతో పాటు బాధ్యత కూడా ఉండాలని గుర్తించాల్సిన సమయం ఇది!