23 క్యారెట్ల అద్భుతం.. చరిత్రలో అరుదైన రత్నం..గోల్కొండ బ్లూ డైమండ్ వేలం రద్దు

చరిత్రలో ఎంతో అరుదైనది.. అత్యంత విలువైనదిగా పేర్గాంచిన గోల్కొండ బ్లూ డైమండ్ వేలానికి రాబోతుందన్న వార్త ప్రపంచ వ్యాప్తంగా కలకలం రేపింది. న్యూయార్క్‌లో ఈ అద్భుతమైన రత్నాన్ని వేలం వేయడానికి అన్ని ఏర్పాట్లు పూర్తయ్యాయి. కానీ ఊహించని విధంగా, క్రిస్టీస్ వేలం సంస్థ ఈ వజ్రాన్ని అమ్మకానికి పెట్టడం లేదని ప్రకటించింది. ఆశ్చర్యకరమైన విషయం ఏమిటంటే. ప్రస్తుత యజమానులు ఈ రత్నాన్ని తమ కుటుంబంలోనే ఉంచుకోవాలని నిర్ణయించున్నారు. దీంతో వజ్రాల కలెక్టర్లు, రత్నాల మీద ఆసక్తి ఉన్న వారు తీవ్ర నిరాశకు గురయ్యారు.

'ది గోల్కొండ బ్లూ'గా పిలువబడే ఈ అద్భుతమైన 23.24 క్యారెట్ల బ్లూ డైమండ్‎కు గొప్ప చరిత్ర ఉంది. ఆంధ్రప్రదేశ్‌లోని కొల్లూరు గనుల్లో దొరికిన ఈ డైమండ్ ఒకప్పుడు భారతదేశపు రాజుల ఆభరణంగా ఉండేది. ఇండోర్‌కు చెందిన హోల్కర్‌లు, బరోడాకు చెందిన గైక్వాడ్‌ల చేతులు మీదుగా ఇది ప్రయాణించింది. 1923లో దీనిని ఒక అందమైన కంకణంలో పొదిగారు. తర్వాత దానిని పియర్ ఆకారపు వజ్రాలతో కూడిన అద్భుతమైన నెక్లెస్ గా మర్చారు.

నేచురల్ బ్లూ డైమండ్స్ అత్యంత అరుదుగా లభిస్తాయి. అన్ని వజ్రాలలో కేవలం 0.02శాతం మాత్రమే ఈ మంత్రముగ్ధులను చేసే కలర్ కలిగి ఉంటాయి. చాలా బ్లూ డైమండ్స్ 10 క్యారెట్ల కంటే తక్కువ బరువు కలిగి ఉంటాయి, గోల్కొండ బ్లూ డైమండ్స్ దీనికి అసాధారణమైన మినహాయింపు. దీని అంచనా విలువ అక్షరాలా రూ.425 కోట్లు (సుమారు 50 మిలియన్ డాలర్లు).

1947లో న్యూయార్క్‌కు చెందిన ఆభరణాల వ్యాపారి హ్యారీ విన్‌స్టన్ ఈ వజ్రాన్ని కొనుగోలు చేశారు.. కానీ చివరికి అది ప్రైవేట్ సేకరణలకు చేరడానికి ముందు భారతీయ రాయల్టీకి తిరిగి వచ్చింది. క్రిస్టీస్ వేలం ఇంటి వేలానికి ముందు ఒక పెద్ద ప్రదర్శనను ఏర్పాటు చేయడానికి ప్రణాళిక వేసినప్పటికీ యజమానుల చివరి నిమిషంలో తీసుకున్న నిర్ణయం కారణంగా ఈ పురాణ రత్నం ప్రస్తుతానికి ప్రజల దృష్టికి దూరంగా ఉంటుంది. గోల్కొండ నీలి వజ్రం కేవలం ఒక డైమండ్ కాదు, ఇది చరిత్రలో ఒక భాగం. అది ఎప్పటికీ కుటుంబ సంపదగా భద్రంగా ఉండిపోతుందా లేదా మళ్లీ ఎప్పుడైనా వెలుగులోకి వస్తుందా అనేది తెలియాల్సి ఉంది.