మనుషులకు సాయం చేయాల్సిన రోబోట్‌తో వేధింపులు.. టెక్నాలజీ వినియోగంపై కొత్త ప్రశ్నలు

రోబోట్లు మనిషి జీవితాన్ని సులభతరం చేయాలి.. ప్రమాదాలను తగ్గించాలి.. అవసరమైనప్పుడు సహాయం అందించాలి. కానీ అదే రోబోట్‌ వేధింపులకు సాధనంగా మారితే? ఆధునిక సాంకేతికత ఎంత వేగంగా అభివృద్ధి చెందుతున్నా దాన్ని ఉపయోగించే వ్యక్తుల ఉద్దేశాలపై నియంత్రణ లేకపోతే ఎలాంటి పరిణామాలు ఎదురవుతాయో జర్మనీలో చోటుచేసుకున్న ఓ ఘటన చర్చనీయాంశంగా మారింది.

సినిమాల్లో రోబోట్లు మనుషుల్లా ప్రవర్తించడం, భావోద్వేగాలను ప్రదర్శించడం ప్రేక్షకులను ఆకట్టుకుంటుంది. వాస్తవ ప్రపంచంలోనూ కృత్రిమ మేధస్సు, రోబోటిక్స్‌ రంగాలు వేగంగా అభివృద్ధి చెందుతున్నాయి. హోటళ్లు, ఆసుపత్రులు, పరిశ్రమలు, బహిరంగ ప్రదేశాల్లో రోబోట్ల వినియోగం పెరుగుతోంది. అయితే వీటిని సరైన విధంగా ఉపయోగించకపోతే సాంకేతికతే సమస్యగా మారుతుందనే విషయాన్ని జర్మనీలోని కొలోన్‌ ఘటన మరోసారి గుర్తుచేస్తోంది.

యువతుల పట్ల అసభ్య ప్రవర్తన.. వైరల్‌గా మారిన ఘటన

బ్రిటన్‌కు చెందిన డైలీ మెయిల్‌ కథనం ప్రకారం.. జర్మనీలోని కొలోన్‌ నగరంలో ఆదివారం రాత్రి సుమారు 11.45 గంటల సమయంలో ఈ ఘటన చోటుచేసుకుంది. నగరంలోని హోహెన్‌జోలెర్న్‌రింగ్‌ వీధిలో ఓ ఫాస్ట్‌ఫుడ్‌ రెస్టారెంట్‌ వెలుపల 16 ఏళ్ల బాలిక తన స్నేహితులతో కలిసి ఉన్న సమయంలో సుమారు 1.2 మీటర్ల ఎత్తున్న ఎరుపు, బంగారు రంగుల రోబోట్‌ ఆమె వద్దకు వచ్చింది.

‘అహ్మద్‌’ అనే పేరుతో ఉన్న ఆ రోబోట్‌ బాలికను వెనుక నుంచి అసభ్యంగా తాకినట్లు ఆరోపణలు వచ్చాయి. అంతేకాకుండా అసభ్యకరమైన సైగలు, చేష్టలు చేసినట్లు సమాచారం. మరో యువతితోనూ ఇదే విధంగా ప్రవర్తించినట్లు కథనాలు పేర్కొన్నాయి. ఈ ఘటనకు సంబంధించిన దృశ్యాలను కొందరు వీడియో తీసి సోషల్‌ మీడియాలో ప్రసారం చేయడంతో విషయం వెలుగులోకి వచ్చింది.

రోబోట్‌ వెనుక మనుషుల పాత్ర ఎంత?

ఈ ఘటనలో అత్యంత కీలకమైన ప్రశ్న రోబోట్‌ స్వయంగా అలా ప్రవర్తించిందా? లేక దాని కదలికలను ఎవరైనా కావాలనే నియంత్రించారా? అనేదే. అందుబాటులో ఉన్న సమాచారం ప్రకారం ఈ ఘటనకు సంబంధించి 16 ఏళ్ల బాలుడు, అతనితో ఉన్న 19 ఏళ్ల యువకుడి పాత్రపై పోలీసులు దర్యాప్తు చేస్తున్నారు. వారిని అదుపులోకి తీసుకుని, వారి ఫోన్లను స్వాధీనం చేసుకున్నట్లు కథనం పేర్కొంది.

రోబోట్‌ను రిమోట్‌ ద్వారా నియంత్రించారా? ముందుగానే అలాంటి కదలికలకు ప్రోగ్రామ్‌ చేశారా? యువతులను వేధించాలనే ఉద్దేశంతోనే దాన్ని ఉపయోగించారా? అనే అంశాలను పోలీసులు పరిశీలిస్తున్నారు. ఈ వ్యవహారంపై లైంగిక వేధింపులకు సంబంధించిన అనుమానాలతో క్రిమినల్‌ దర్యాప్తు ప్రారంభించినట్లు సమాచారం.

సాంకేతికత పెరిగింది.. బాధ్యత పెరిగిందా?

ఈ ఘటనను కేవలం ఓ వింత సంఘటనగా చూడటం సరైంది కాదు. మనుషుల కదలికలను అనుకరించగలిగే, పరిసరాలను గుర్తించగలిగే , ఆదేశాల మేరకు పనిచేయగలిగే యంత్రాలు అందుబాటులోకి వస్తున్నాయి. అయితే వాటిని ఉపయోగించే వ్యక్తుల ఉద్దేశాలను గుర్తించడం.. అనుచిత ప్రవర్తనను అడ్డుకోవడం, బాధితుల భద్రతకు ప్రాధాన్యం ఇవ్వడం వంటి అంశాలు కూడా అంతే ముఖ్యమైనవి.

ముఖ్యంగా బహిరంగ ప్రదేశాల్లో పనిచేసే రోబోట్లకు భద్రతా పరిమితులు, కదలికలపై నియంత్రణ, దుర్వినియోగాన్ని గుర్తించే వ్యవస్థలు అవసరం. సాంకేతిక పరికరాన్ని ఉపయోగించి తప్పు చేసినప్పుడు.. దాని వెనుక ఉన్న వ్యక్తుల బాధ్యతను కూడా చట్టపరంగా పరిశీలించాల్సి ఉంటుంది.

వైరల్‌ వీడియోల కంటే విచారణే ముఖ్యం

సోషల్‌ మీడియాలో వీడియోలు వైరల్‌ కావడంతో ప్రజల్లో ఆగ్రహం వ్యక్తమవుతోంది. అయితే వీడియోలో కనిపించే దృశ్యాల ఆధారంగా మాత్రమే పూర్తి నిజానిజాలను నిర్ధారించలేం. రోబోట్‌ ఎలా పనిచేసింది.. దాన్ని ఎవరు నియంత్రించారు.. ఘటన వెనుక ఉద్దేశం ఏమిటి అనే విషయాలను దర్యాప్తు ద్వారా తేల్చాల్సి ఉంది.

మొత్తానికి జర్మనీలో వెలుగులోకి వచ్చిన ఈ ఘటన ఆధునిక సాంకేతికత వినియోగంపై కొత్త చర్చకు తెరలేపింది. రోబోట్లు ఎంత తెలివిగా మారినా వాటి వినియోగానికి నైతిక విలువలు, స్పష్టమైన నియంత్రణలు, చట్టపరమైన బాధ్యతలు అవసరమే. లేకపోతే మనుషులకు సహాయం చేయాల్సిన యంత్రాలే ఇతరులను వేధించడానికి ఉపయోగపడే ప్రమాదం ఉంది.