కారు నంబర్ల కోసం ఇదేం క్రేజు రా నాయన!

చాలామందికి కార్లు అంటే ఇష్టం. దీనికి సాధారణ ప్రజలే కాకుండా సెలబ్రిటీలు, సినీ తారలు, రాజకీయ నేతలు, వ్యాపారవేత్తలు, క్రీడాకారులు కూడా అతీతం కాదు. నచ్చిన కారు కోసం భారీగా వెచ్చించడం ఒక ఎత్తయితే.. నచ్చిన నంబర్‌ ను చేజిక్కించుకోవడం మరో ఎత్తు. నచ్చిన నంబర్‌ కోసం ఎన్ని లక్షలయినా ఖర్చు పెడతారు. ముఖ్యంగా 9 నంబర్‌ కు క్రేజ్‌ ఎక్కువ. ఈ నంబర్‌ కు ఇలాంటి, అలాంటి క్రేజు ఉండదు. గతంలో ప్రముఖ నటుడు జూనియర్‌ ఎన్టీఆర్‌ తన కొత్త లంబోర్గిని కారుకు TS 09 FS 9999 అనే నంబర్‌ కోసం ఏకంగా రూ.17 లక్షలు ఖర్చు పెట్టిన సంగతి తెలిసిందే.

ఇప్పుడు తాజాగా మరోసారి తమకు కావాల్సిన కారు నంబర్ల కోసం వాహనదారులు భారీగా ఖర్చుపెట్టారు. హైదరాబాద్‌ లోని ఖైరతాబాద్‌ ఆర్టీఏ కార్యాలయంలో ఫ్యాన్సీ నంబర్ల కోసం వాహనదారులు ఎగబడ్డారు. తమకు నచ్చిన నంబర్‌ TS 11 EZ 9999 కోసం ఒక వ్యక్తి ఏకంగా రూపాయి తక్కువగా రూ.10 లక్షలు పెట్టడం విశేషం. ఈ నంబర్‌ను ఒక ఎడ్యుకేషనల్‌ సొసైటీకి విక్రయించారు.

అలాగే TS 11 FA 0001 నంబర్‌ ను సాయి శివనాగ్‌ అనే వ్యక్తి రూ.3 లక్షలకు దక్కించుకున్నాడు. అదేవిధంగా TS 11 FA 0011 నంబర్‌ 1.55 లక్షలకు అమ్ముడుబోయింది. ఈ నంబర్‌ ను రోహిత్‌ రెడ్డి అనే వ్యక్తి కొనుగోలు చేశాడు.

ఈ ఫ్యాన్సీ నంబర్లను ఫ్యాన్సీ ధరలకు వాహనదారులు కొనుగోలు చేయడంతో ఈ వేలం విక్రయాల ద్వారా మొత్తం రూ.18 లక్షలు సమకూరాయి. ఈ మేరకు ఖైరతాబాద్‌ ఆర్టీఏ వెల్లడించింది.