133 మంది విదేశీ విద్యార్థులకు ఊరట.. ట్రంప్ కు షాకిచ్చిన ఫెడరల్ జడ్జి!

ట్రంప్ అడ్మినిస్ట్రేషన్ హయాంలో ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ICE) , హోంల్యాండ్ సెక్యూరిటీ (DHS) అకస్మాత్తుగా రద్దు చేసిన 133 మంది అంతర్జాతీయ విద్యార్థుల ఎఫ్-1 వీసాల లీగల్ స్టేటస్‌ను తక్షణమే పునరుద్ధరించాలని జార్జియాలోని ఒక ఫెడరల్ న్యాయమూర్తి ఆదేశించారు. ఈ ప్రక్రియను మంగళవారం సాయంత్రం 5 గంటల లోగా పూర్తి చేయాలని న్యాయమూర్తి తన ఉత్తర్వుల్లో స్పష్టం చేశారు.

బాధిత విద్యార్థుల్లో చాలామంది అకడమిక్ ప్రతిభతో గ్రాడ్యుయేషన్‌కు చేరువలో ఉన్నారు. హోంల్యాండ్ సెక్యూరిటీ ఉపయోగించే నాన్-ఇమ్మిగ్రెంట్ విద్యార్థులను పర్యవేక్షించే ఎస్.ఈ.వీ.ఐ.ఎస్ (Student and Exchange Visitor Information System) డేటాబేస్ నుండి ఎటువంటి ముందస్తు నోటీసు, సరైన వివరణ లేకుండా.. స్పందించే అవకాశం ఇవ్వకుండానే వారి రికార్డులను తొలగించడంపై విద్యార్థులు అభ్యంతరం వ్యక్తం చేశారు.

బిడెన్ నియమించిన యూఎస్ డిస్ట్రిక్ట్ కోర్ట్ న్యాయమూర్తి విక్టోరియా కాల్వెర్ట్, పిటిషనర్ల తరపున తాత్కాలిక నిలుపుదల ఉత్తర్వులు మంజూరు చేస్తూ ఈ కీలక నిర్ణయం తీసుకున్నారు. విద్యార్థుల స్టేటస్‌ను మార్చి 31, 2025 నాటి నుండి పునరుద్ధరించాలని ఆమె ఇమ్మిగ్రేషన్ , హోంల్యాండ్ సెక్యూరిటీలను ఆదేశించారు.

"ఎస్.ఈ.వీ.ఐ.ఎస్ రిజిస్ట్రేషన్‌ను రద్దు చేయడం శాసన, నియంత్రణ అధికార పరిధిని మించిందని, అందువల్ల ఇది చట్టవిరుద్ధమని పిటిషనర్లు రుజువు చేసే అవకాశం ఉంది" అని న్యాయమూర్తి కాల్వెర్ట్ తన ఉత్తర్వుల్లో పేర్కొన్నారు. ఈ చర్య ఐదవ సవరణను కూడా ఉల్లంఘించే అవకాశం ఉందని ఆమె అభిప్రాయపడ్డారు.

ఈ దావాను ఏసీఎల్.యూ , ఇతర సంస్థలు నార్తర్న్ డిస్ట్రిక్ట్ ఆఫ్ జార్జియాలో దాఖలు చేశాయి. గత ట్రంప్ అడ్మినిస్ట్రేషన్‌కు చెందిన అధికారులు అటార్నీ జనరల్ పామ్ బాండి, హోంల్యాండ్ సెక్యూరిటీ సెక్రటరీ క్రిస్టీ నోమ్ , ఐసీఈ తాత్కాలిక డైరెక్టర్ టాడ్ లియోన్స్ ఈ కేసులో ప్రతివాదులుగా ఉన్నారు.

ఎస్.ఈ.వీ.ఐ.ఎస్ రద్దులను చట్టబద్ధమైన అమలు చర్యగా కాకుండా, విద్యార్థులను బలవంతంగా దేశం విడిచి వెళ్లేలా చేయడానికి ఉపయోగించిన బలవంతపు సాధనంగా పిటిషనర్లు వాదించారు. చాలా మంది విద్యార్థులకు క్రిమినల్ రికార్డులు లేవని, చెల్లుబాటు అయ్యే విద్యార్థి వీసాలు కలిగి ఉన్నప్పటికీ, వారిని 'స్వీయ-దేశబహిష్కరణ'కు గురి చేయడానికి ప్రయత్నించారని ఆరోపించారు. పలువురు STEM కార్యక్రమాలలో ఉండటం వారి విద్యా ప్రతిభకు నిదర్శనమని తెలిపారు.

విద్యార్థులు క్రిమినల్ రికార్డుల తనిఖీలలో పట్టుబడినప్పుడు లేదా వారి వీసాలు రద్దు చేయబడినప్పుడు, ఈ రద్దులు చట్టబద్ధమే అని ప్రభుత్వం వాదించింది. అరెస్ట్ లేదా నేర నిరూపణ లేకపోయినా బహిష్కరణకు కారణమయ్యే అంశాలు ఉన్నాయని పేర్కొంది. అయితే, ఈ విద్యార్థులకు ఉపశమనం కల్పించడం కార్యనిర్వాహక "ఇమ్మిగ్రేషన్‌పై నియంత్రణ"ను ప్రభావితం చేస్తుందన్న ప్రభుత్వ వాదనను న్యాయమూర్తి తిరస్కరించారు.

చట్టపరమైన స్టేటస్, విద్య, ఉపాధి కోల్పోవడం, తీవ్రమైన మానసిక క్షోభ వంటి కోలుకోలేని నష్టాన్ని విద్యార్థులు ఎదుర్కొన్నారని, ,నష్టాల సమతుల్యం, ప్రజా ప్రయోజనం విద్యార్థులకు అనుకూలంగా ఉన్నాయని న్యాయమూర్తి తన తీర్పులో పేర్కొన్నారు.

ఈ కేసుపై ప్రిలిమినరీ ఇంజక్షన్ కోసం ఏప్రిల్ 24 గురువారం నాడు తదుపరి విచారణ జరిగింది. ఇది విద్యార్థులకు దీర్ఘకాలిక ఉపశమనాన్ని అందించే అవకాశం ఉంది.