ఆయిల్ ధరలు పెరిగితే ఆఫీస్ కల్చర్ మారుతుందా?.. WFH పై చర్చలు
గతంలో కరోనా వైరస్ భయంతో ఇంటికే పరిమితమయ్యాం, కానీ ఇప్పుడు పెట్రోల్, డీజిల్ ధరల భయం వెంటాడుతోంది.
By: Tupaki Desk | 10 March 2026 1:39 PM IST
కరోనా పుణ్యమా అని మొదలైన 'వర్క్ ఫ్రమ్ హోమ్' కల్చర్ ఇప్పుడిప్పుడే కనుమరుగవుతోంది అనుకుంటున్న సమయంలో, మళ్ళీ పాత రోజులు రాబోతున్నాయా? అవును, ప్రస్తుతం ప్రపంచవ్యాప్తంగా నెలకొన్న ఆయిల్ సంక్షోభం సామాన్యుడి జేబుకే కాదు, ఆఫీసు కల్చర్కు కూడా సెగ తగిలిస్తోంది. ఆయిల్ ధరలు ఆకాశాన్ని తాకడం, గ్యాస్ కొరత ఏర్పడటంతో చాలా దేశాలు మళ్ళీ ఇంటి నుండే పని చేసే విధానాన్ని పరిశీలిస్తున్నాయి. అసలు ఈ ఇంధన సెగ మన ఉద్యోగాలపై ఎలాంటి ప్రభావం చూపబోతోంది? ఆ వివరాలు ఇప్పుడు చూద్దాం.
ఇంధన సంక్షోభం.. ఆఫీసులకు వెళ్లడం భారమేనా?:
గతంలో కరోనా వైరస్ భయంతో ఇంటికే పరిమితమయ్యాం, కానీ ఇప్పుడు పెట్రోల్, డీజిల్ ధరల భయం వెంటాడుతోంది. హార్ముజ్ జలసంధి వద్ద నెలకొన్న ఉద్రిక్తతల వల్ల చమురు సరఫరాకు తీవ్ర అంతరాయం ఏర్పడింది. ఇక దీనివల్ల రవాణా ఖర్చులు విపరీతంగా పెరిగిపోయాయి. పెట్రోల్ ధరలు పెరగడం వల్ల ఉద్యోగులు ఆఫీసులకు వెళ్లడం ఆర్థికంగా భారం అవుతోంది. ఇక మరోవైపు, కమర్షియల్ గ్యాస్ కొరత వల్ల మన దేశంలోని కొన్ని హోటళ్లు కూడా తాత్కాలికంగా మూతపడుతున్నాయంటే పరిస్థితి ఎంత తీవ్రంగా ఉందో అర్థం చేసుకోవచ్చు. ఇంధనాన్ని ఆదా చేయడమే ఇప్పుడు ప్రపంచ దేశాల ముందున్న ఏకైక మార్గం.
ప్రపంచ దేశాల అడుగులు.. WFH వైపు మొగ్గు:
పాకిస్థాన్ వంటి దేశాలు ఇప్పటికే ఇంధన వినియోగాన్ని తగ్గించేందుకు తమ ఉద్యోగులను, ప్రజలను వీలైనంత వరకు ఇంట్లోనే ఉండాలని సూచిస్తున్నాయి. అభివృద్ధి చెందిన దేశాలు సైతం గ్యాస్ వినియోగాన్ని నియంత్రించేందుకు మళ్ళీ వర్క్ ఫ్రమ్ హోమ్ నిబంధనలను అమలు చేయాలని యోచిస్తున్నాయి. భారత్లో కూడా ఇదే పరిస్థితి తలెత్తే అవకాశం ఉందని నిపుణులు హెచ్చరిస్తున్నారు.ఇక వాహనాల వినియోగం తగ్గితే పెట్రోల్ డిపెండెన్సీ తగ్గుతుందని, తద్వారా ఆర్థిక వ్యవస్థపై భారం తగ్గుతుందని ప్రభుత్వాలు భావిస్తున్నాయి. ఒక రకంగా ఆఫీస్ కల్చర్ను ఇంధన ధరలే శాసించే పరిస్థితి కనిపిస్తోంది.
మళ్ళీ ఇంటి నుండే పని.. లాభమా? నష్టమా:
ఒకవేళ మళ్ళీ వర్క్ ఫ్రమ్ హోమ్ అమల్లోకి వస్తే, అది ఉద్యోగులకు మిశ్రమ ఫలితాలను ఇస్తుంది. ట్రాఫిక్ కష్టాలు తప్పడం, పెట్రోల్ ఖర్చులు మిగలడం వంటివి ఊరటనిచ్చే అంశాలే. అయితే, గ్యాస్ కొరత వల్ల నిత్యావసర ధరలు కూడా పెరిగే ప్రమాదం ఉంది. కంపెనీలు తమ ఆఫీసుల నిర్వహణ ఖర్చులను తగ్గించుకోవడానికి ఇది ఒక అవకాశంగా చూడవచ్చు. ప్రస్తుతానికైతే ఇది చర్చల స్థాయిలోనే ఉన్నప్పటికీ, అంతర్జాతీయంగా ఆయిల్ సరఫరా మెరుగుపడకపోతే మాత్రం మనం త్వరలోనే మళ్ళీ ల్యాప్టాప్లు పట్టుకుని బెడ్రూమ్లకే పరిమితం కాక తప్పదు.