2025లో ఎలాన్ మస్క్‌కు రూ. 10.1 లక్షల కోట్ల నష్టం

టెస్లా సీఈఓ ఎలాన్ మస్క్‌కు 2025 సంవత్సరం ఆర్థికంగా కలిసి రాలేదు. బ్లూమ్‌బెర్గ్ బిలియనీర్స్ ఇండెక్స్ ప్రకారం, ఈ సంవత్సరం ప్రారంభం నుండి ఆయన తన నికర విలువలో ఏకంగా 121 బిలియన్ డాలర్లకు పైగా నష్టపోయారు. ఇది మన భారతీయ కరెన్సీలో సుమారుగా రూ. 10.1 లక్షల కోట్లకు సమానం. ప్రపంచంలోని టాప్ 10 అత్యంత ధనవంతుల జాబితాలో ఈ ఏడాది అత్యధికంగా నష్టపోయిన వ్యక్తిగా మస్క్ నిలిచారు.

ఈ భారీ నష్టం ఉన్నప్పటికీ ఏప్రిల్ 10 నాటికి అంచనా వేసిన 311 బిలియన్ డాలర్ల నికర విలువతో ఎలాన్ మస్క్ ప్రపంచంలోనే అత్యంత ధనవంతుడిగా కొనసాగుతున్నారు. అయితే ఆయన సంపద వేగంగా క్షీణిస్తుండటం గమనార్హం.

ఇతర బిలియనీర్లు కూడా ఈ కాలంలో నష్టాలను చవిచూశారు. అమెజాన్ అధినేత జెఫ్ బెజోస్ 36.5 బిలియన్ డాలర్లు, మెటా సీఈఓ మార్క్ జుకర్‌బర్గ్ 13.9 బిలియన్ డాలర్లు , మైక్రోసాఫ్ట్ సహ వ్యవస్థాపకుడు బిల్ గేట్స్ 2.57 బిలియన్ డాలర్లు నష్టపోయారు. అయితే ఈ నష్టాలు మస్క్ నష్టంతో పోలిస్తే చాలా తక్కువగా ఉన్నాయి.

ఎలాన్ మస్క్ ఇంత భారీగా నష్టపోవడానికి ప్రధాన కారణం టెస్లా కంపెనీ షేర్ల విలువ గణనీయంగా పడిపోవడమే. కంపెనీ పనితీరుపై పెట్టుబడిదారులు ఆందోళన చెందడం.. అంతర్జాతీయ మార్కెట్‌లో నెలకొన్న అస్థిరత్వం దీనికి ముఖ్య కారణాలుగా తెలుస్తున్నాయి.

ఒక్క మూడు రోజుల వ్యవధిలోనే, ప్రపంచంలోని టాప్ 10 అత్యంత ధనవంతులు కలిసి మొత్తం 172 బిలియన్ డాలర్ల సంపదను కోల్పోయారు. ఇందులో ఎలాన్ మస్క్ ఒక్కరే 35 బిలియన్ డాలర్ల నష్టాన్ని చవిచూడటం ఆయన ఆర్థిక పరిస్థితి తీవ్రతను తెలియజేస్తోంది.

మస్క్ సంపదలో ఎక్కువ భాగం ఆయనకు టెస్లా, స్పేస్‌ఎక్స్ వంటి ప్రముఖ కంపెనీలలో ఉన్న వాటాల ద్వారా వచ్చింది. ఆయన నికర విలువ డిసెంబర్ 2024లో అత్యధికంగా 400 బిలియన్ డాలర్లకు పైగా చేరుకుంది. అయితే, అప్పటి నుండి ఆయన సంపద క్రమంగా తగ్గుతూ వస్తోంది.

ఇటీవల కాలంలో అధ్యక్షుడు డొనాల్డ్ ట్రంప్‌తో ఆయనకున్న సంబంధాలు.. ఫెడరల్ ప్రభుత్వంతో ఆయన చేస్తున్న సహకారం కొంతమంది పెట్టుబడిదారులలో ఆందోళన కలిగిస్తోంది. మస్క్ తన దృష్టిని టెస్లాపై నుండి మరల్చి రాజకీయాలపై కేంద్రీకరిస్తున్నారనే భయం వారిలో నెలకొంది.

దీనికి తోడు, ఇటీవల టెస్లా కంపెనీకి చెందిన కొన్ని సౌకర్యాలపై జరిగిన విధ్వంసం.. కాల్పుల ఘటనలు ఆందోళనలను మరింత పెంచాయి. ఈ ఘటనలపై అధికారులు రాజకీయ కోణంలో కూడా దర్యాప్తు చేస్తున్నారు.

ప్రస్తుతానికి, టెస్లా షేర్ల విలువ క్షీణించడం కొనసాగుతోంది. ఇది ఎలాన్ మస్క్ యొక్క వ్యక్తిగత సంపదపై మరింత ప్రతికూల ప్రభావాన్ని చూపుతోంది. రానున్న రోజుల్లో ఆయన ఆర్థిక పరిస్థితి ఎలా ఉంటుందో వేచి చూడాలి.