టెక్నాలజీతో భూకంపానికి చెక్.. ఈ దేశాల ఐడియా అదుర్స్ !

రెండు రోజుల క్రితం పశ్చిమ నేపాల్‌లో రెండుసార్లు భూకంపం సంభవించడంతో ప్రజలు భయాందోళనలకు గురయ్యారు. దీని తీవ్రత 5.2గా నమోదైంది. మొదటి ప్రకంపన రాత్రి 8.07 గంటలకు, రెండోది కొద్ది నిమిషాల తర్వాత 8.10 గంటలకు వచ్చింది. రెండో భూకంప తీవ్రత 5.5గా నమోదైంది. ఈ రెండు భూకంపాల కేంద్రం పానిక్ ప్రాంతంలోని జజర్కోట్‌లో ఉంది. నేపాల్‌తో పాటు ఉత్తర భారతదేశంలో కూడా దీని ప్రభావం కనిపించింది. లక్నో, లడఖ్, పితోర్‌గఢ్, ఉత్తరాఖండ్‌లో భూకంప భయంతో ప్రజలు వణికిపోయారు.

మయన్మార్, థాయ్‌లాండ్‌లో భూకంప బీభత్సం

అయితే ఎక్కడా ప్రాణనష్టం జరిగినట్లు సమాచారం లేదు. కొన్ని రోజుల క్రితమే మయన్మార్, థాయ్‌లాండ్‌లో కూడా భారీ భూకంపాలు సంభవించాయి. అక్కడ సహాయక చర్యలు కొనసాగుతున్నాయి. మరణించిన వారి సంఖ్య 2000 దాటింది. కానీ ప్రపంచంలో కొన్ని దేశాలు భూకంపం రాకముందే దానిని గుర్తించగలవని మీకు తెలుసా? అవేంటో తెలుసుకుందాం.

భూకంపం రాకముందే తెలిసే ప్రదేశాలు

జపాన్, కాలిఫోర్నియా భూకంపం సంభవించడానికి 60 సెకన్ల ముందే గుర్తించగల ప్రదేశాలు. అక్కడ ప్రజలు అప్రమత్తంగా ఉంటారు. వాస్తవానికి ఈ ప్రాంతాల్లో సెన్సార్లు, అలారం వ్యవస్థలు ఉన్నాయి. దీనివల్ల 60 సెకన్ల ముందే అలర్ట్ జారీ చేయబడుతుంది. ఈ వ్యవస్థ భూకంప కేంద్రం నుండి వెలువడే పి-వేవ్‌లను గుర్తించి పనిచేస్తుంది. ఇవి ఎస్-వేవ్‌ల కంటే ముందుగా చేరుకుంటాయి. పి-వేవ్‌ల ఆధారంగా ఈ వ్యవస్థ భూకంప తీవ్రత, నష్టాన్ని ముందుగానే అంచనా వేసి ప్రజలను అప్రమత్తం చేస్తుంది.

జపాన్‌లో భారీ భూకంపం వచ్చే ఛాన్స్

జపాన్, కాలిఫోర్నియా రెండూ చురుకైన భూకంప ప్రాంతాల్లో ఉన్నాయి. ఇక్కడ తరచుగా బలమైన భూకంపాలు వస్తుంటాయి. అందుకే ప్రజలను హెచ్చరించడానికి ఇలాంటి వ్యవస్థను ఏర్పాటు చేశారు. ఇటీవల జపాన్ ప్రభుత్వం ఒక హెచ్చరిక జారీ చేసింది. పసిఫిక్ మహాసముద్ర తీరం సమీపంలో భారీ భూకంపం వచ్చే అవకాశం ఉందని తెలిపింది. ఇది సునామీకి కూడా దారితీయవచ్చని హెచ్చరించింది. ఈ విపత్తులో దాదాపు మూడు లక్షల మంది ప్రాణాలు కోల్పోయే ప్రమాదం ఉంది. ఇలాంటి పరిస్థితుల్లో ఈ అలారం ప్రజలను కొంతవరకు సురక్షితంగా ఉంచడానికి సహాయపడుతుంది.